ສຶກສາຫຼວງພະບາງ ມອບອຸປະກອນການຮຽນໃຫ້ໂຮງຮຽນທີ່ຂາດເຂີນ

  ເມື່ອບໍ່ດົນມານີ້ທີ່ໂຮງຮຽນມັດທະຍົມຕອນຕົ້ນແກ້ງແຄນເມືອງຈອມເພັດ ແຂວງຫຼວງພະບາງໄດ້ມີພິທິມອບ-ຮັບເຄື່ອງອຸປະກອນການຮຽນ-ການສອນໃຫ້ໂຮງຮຽນທີ່ຍັງຂາດເຂີນ ໂດຍເປັນກຽດມອບ-ຮັບລະຫວ່າງທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະກີລາແຂວງ ແລະທ່ານ ຄຳຜາຍ ຄົມມະວົງ ຜູ້ອຳນວຍການໂຮງຮຽນມັດທະຍົມຕອນຕົ້ນແກ້ງແຄນ, ອຳນວຍການໂຮງ ຮຽນປະຖົມ 2 ແຫ່ງອ້ອມຂ້າງ, ຫົວໜ້າ-ຮອງຫົວໜ້າຫ້ອງການສຶກສາທິການ ແລະກີລາເມືອງຈອມເພັດ ພ້ອມດ້ວຍພະນັກງານ-ວິຊາການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ໂຮງຮຽນມັດທະຍົມຕອນຕົ້ນ ແກ້ງແຄນເປັນໂຮງຮຽນໜຶ່ງທີ່ຂຶ້ນກັບຫ້ອງການສຶກສາທິການ ແລະກີລາເມືອງຈອມເພັດ ເປັນໂຮງຮຽນທີ່ຢູ່ເຂດຫ່າງໄກສົກຫຼີກ ຊຶ່ງ ມີໄລຍະທາງຫ່າງຈາກຕົວເມືອງປະມານ 30 ກິໂລເເມັດ, ທາງດິນແດງຄ້ອຍຊັນສາມາດທ່ຽວໄດ້ດ້ວຍລົດພຽງລະດູດຽວປະກອບມີຄູ-ອາຈານທັງໝົດ 14 ຄົນ,  ຍິງ 9 ຄົນ ໃນນີ້ຄູອາສາສະໝັກ 5 ຄົນ, ຍິງ 3 ຄົນ, ມີນັກຮຽນ 85 ຄົນ, ຍິງ 41 ຄົນເນື່ອງຈາກໂຮງຮຽນແຫ່ງດັ່ງກ່າວເປັນໂຮງຮຽນທີ່ຢູ່ເຂດຫ່າງໄກສອກຫຼີກ ແລະຍັງຂາດເຂີນອຸປະກອນການຮຽນ-ການສອນພະແນກສຶກສາທິການ ແລະກີລາແຂວງເຫັນໄດ້ຄວາມສຳຄັນວຽກງານການສຶກສາໃຫ້ຄົບຕາມ 5 ຫຼັກມູນການສຶກສາແຫ່ງຊາດ ຈຶ່ງໄດ້ນຳເອົາອຸປະກອນການຮຽນການສອນດັ່ງກ່າວມອບໃຫ້ສໍາລັບອຸປະກອບທີ່ນໍາມາມອບຄັ້ງນີ້ປະກອບມີບານເຕະ, ບານສົ່ງ, ຕາໝ່າງໝາກຫວີດ, ກອງ, ແຊ໋ງ, ປາກເລີ, ກະຕໍ້ ແລະອຸປະກອນອື່ນໆ ແລະໂຮງຮຽນປະຖົມອ້ອມຂ້າງ 2 ແຫ່ງ.

  ທ່ານ ຊາຍສະຫວັນ ໄດ້ເນັ້ນໜັກຫຼາຍບັນຫາເປັນຕົ້ນບັນຫາຄຸນນະພາບການສຶກສາ ໂດຍສະເພາະການອ່ານ, ການຂຽນຂອງນ້ອງນັກຮຽນຊັ້ນປະຖົມຍັງບໍ່ທັນໄດ້ດີ, ບັນຫາຄູບໍ່ແຕ່ງບົດສອນ, ຄູປະເມີນບໍ່ຜ່ານນອກຈາກນີ້ທ່ານຍັງຮຽກຮ້ອງມາຍັງຜູ້ບໍລິຫານໂຮງຮຽນຕ້ອງເອົາໃຈໃສ່ໃນການສຶກສາອົບຮົມແນວຄິດຄູ-ອາຈານ, ນ້ອງນັກຮຽນພ້ອມທັງສຸມໃສ່ວາງແຜນພັດທະນາໂຮງຮຽນດ້ວຍການກຳນົດກິດຈະກຳຕ່າງໆ ໃຫ້ລະອຽດສາມາດຈັດຕັ້ງປະຕິບັດໄດ້, ສືບຕໍ່ຮ່ວມມືກັບຊຸມຊົນໃຫ້ເປັນປົກກະຕິ, ຄູ-ອາຈານທຸກຄົນຕ້ອງປະຕິບັດຕົນໃຫ້ຖຶກຕ້ອງຕາມຫຼັກວິຊາຄູ, ນ້ອງນັກຮຽນກໍ່ຕ້ອງໄດ້ເອົາໃຈໃສ່ດຸໝັ່ນຄົ້ນຄວ້າຮໍ່າຮຽນປະຕິບັດລະບຽບວິໄນຂອງໂຮງຮຽນເປັນນັກຮຽນທີ່ຮຽນດີຮຽນເກັ່ງຂອງຄູເປັນເດັກດີຂອງພໍ່ແມ່, ສ່ວນພໍ່ແມ່ນປະຊາຊົນກໍ່ຂໍໃຫ້ສືບຕໍ່ໃນການຮ່ວມມືສົ່ງລູກຫຼານມາໂຮງຮຽນນອກຈາກນີ້ ກໍ່ພ້ອມກັນຕ້ານສະກັດກັ້ນທຸກປາກົດການຫຍໍ້ທໍ້ທີ່ຈະເກີດຂຶ້ນໃນໂຮງຮຽນໃຫ້ໄດ້ພ້ອມກັນສ້າງໂຮງຮຽນໃຫ້ກາຍເປັນໂຮງຮຽນພື້ນທີ່ສີຂຽວສ້າງໃຫ້ໄດ້ຄູປະສົບການຄູຊຳ ນານງານໃຫ້ໄດ້ຫຼາຍຂຶ້ນ.

----

ໜັງສືພິມ ເສດຖະກິດ-ສັງຄົມ

แชร์