ເມືອງມຸນລະປາໂມກ ປະຊຸມຜູ້ບໍລິຫານການສຶກສາ

  ວັນທີ 24 ກັນຍາ 2020 ຫ້ອງການສຶກສາທິການ ແລະກີລາເມືອງມຸນລະປາໂມກ ເປີດກອງປະຊຸມປະຈຳປີຜູ້ບໍລິຫານການສຶກສາທົ່ວເມືອງມຸນລະປາໂມກ ກອງປະຊຸມໄດ້ຈັດຂຶ້ນທີ່ຫ້ອງປະຊຸມຂອງຫ້ອງການສຶກສາທິການ ແລະກີລາເມືອງ, ໃຫ້ກຽດເປັນປະທານຂອງທ່ານ ສີສະຫວັດ ພົມມະລິວັນຮອງເຈົ້າເມືອງໆມຸນລະປາໂມກ, ທ່ານ ພູວົງ ອະໄພ ຮອງພະແນກສຶກສາທິການ ແລະກີລາແຂວງ ຈຳປາສັກ, ທ່ານ ພູວົງ ສຸວັນນີ ຮອງຫົວໜ້າຫ້ອງການສຶກສາທິການ ແລະກີລາເມືອງ, ມີປະທານກຸ່ມບ້ານ-ນາຍບ້ານ ແລະຜູ້ບໍລິຫານການສຶກສາທົ່ວເມືອງມຸນລະປາໂມກເຂົ້າຮ່ວມ.

  ກອງປະຊຸມໄດ້ຮັບຟັງບົດສະຫຼຸບການຈັດຕັ້ງປະຕິບັດຂະແໜງການສຶກສາ ແລະກີລາປະຈຳສົກຮຽນ 2019-2020 ແລະແຜນພັດທະນາຂະແໜງການສຶກສາ ແລະກີລາປະຈຳສົກຮຽນ 2020- 2021, ຜົນການຈັດຕັ້ງປະຕິບັດ 15 ຄາດໝາຍ, ຄາດໝາຍທີ່ບັນລຸມີ 5 ຄາດ ໝາຍຄື: ຈຳນວນເມືອງທີ່ບັນລຸອັດຕາເຂົ້າຮຽນເດັກ 5 ປີ ສູງກວ່າ 60% ປະຕິບັດໄດ້ 78,2% , ອັດຕາເຂົ້າຮຽນໃໝ່ສຸດທິປະຖົມປະຕິບັດໄດ້ 99,00%, ອັດຕາປະລະຂອງນັກຮຽນຊັ້ນປະຖົມສຶກສາ ປ1 ປະຕິບັດໄດ້ 1,6%, ການບັນລຸເຂົ້າຮຽນລວມໃໝ່ຮອດຊັ້ນ ປ5 ຂອງນັກ ຮຽນຍິງສຸງກວ່າ 50% ປະຕິບັດໄດ້ 99,00%, ສົ່ງເສີມໃຫ້ມວນຊົນທຸກປະເພດ, ທຸກໄວໄດ້ເຂົ້າຮ່ວມການຫັດກາຍະກຳບໍລິຫານ, ການອອກກຳລັງກາຍ ແລະຫຼິ້ນກີລາກາຍະກຳໃຫ້ໄດ້ 18% ຂອງພົນລະເມືອງປະຕິບັດໄດ້ 25%, ຄາດໝາຍທີ່ໃກ້ຈະບັນລຸມີ 4 ຄາດໝາຍອັດຕາຄ້າງຫ້ອງຂອງນັກຮຽນຊັ້ນປະຖົມສຶກສາ ປ1 ປະຕິບັດໄດ້ 5,5% ອັດຕາຄ້າງຫ້ອງ ຂອງນັກຮຽນຊັ້ນປະຖົມສຶກສາປະຕິບັດໄດ້ 2,5% ອັດ ຕາຫຼອດເຫຼືອ ປ5 ປະຕິບັດໄດ້ 72,9% ຈຳນວນເມືອງທີ່ບັນລຸອັດຕາເຂົ້າຮຽນລວມໃໝ່ຂັ້ນ ມ4 ຂອງນັກຮຽນຍິງສູງກວ່າ 60% ປະຕິບັດໄດ້ 57,4%, ຄາດໝາຍທີ່ບໍ່ບັນລຸມີ 5 ຄາດໝາຍອັດຕາປະລະຊັ້ນປະຖົມປະຕິບັດໄດ້ 6,2% ອັດຕາເຂົ້າຮຽນລວມຊັ້ນມັດທະຍົມຕອນຕົ້ນປະ ຕິບັດໄດ້ 59,00% ອັດຕາເຂົ້າລວມຊັ້ນມັດທະຍົມຕອນປາຍປະຕິບັດໄດ້ 35,00% ອັດຕາປະລະຊັ້ນມັດທະຍົມຕອນຕົ້ນປະຕິບັດໄດ້ 19,1% ອັດຕາປະລະຊັ້ນມັດທະຍົມຕອນປາຍປະຕິບັດໄດ້ 14,5% ສົ່ງເສີມນັກຮຽນທີ່ຮຽນຈົບມັດທະຍົມຕອນຕົນໄດ້ເຂົ້າຮຽນຕໍ່ສາຍອາຊີວະສຶກສາ 5% ນັກຮຽນທີ່ຮຽນຈົບຊັ້ນມັດທະຍົມຕອນປາຍໄດ້ຮຽນຕໍ່ໃນລະດັບຕ່າງໆ 80% ຂອງຈຳນວນນັກຮຽນດັ່ງກວ່າ.

  ທົ່ວເມືອງມີໂຮງຮຽນທັງໝົດ 88 ແຫ່ງ, ໃນນັ້ນໂຮງຮຽນອະນຸບານ 30 ແຫ່ງ, ຫ້ອງກຽມປະຖົມ 8 ຫ້ອງ, ໂຮງຮຽນປະຖົມ 46 ແຫ່ງ, ມັດ ທະຍົມຕອນຕົ້ນ 3 ແຫ່ງ ແລະມັດທະຍົມສົມບູນ 5 ແຫ່ງ, ມີອາຄານຮຽນທັງໝົດ 83 ຫຼັງ, ອາຄານຖາວອນ 47 ແຫ່ງ, ເຄີ່ງຖາວອນ 27 ແຫ່ງ, ຊຸດໂຊມ 9 ແຫ່ງ, ມີພະງານຄູ-ອາຈານ 472 ຄົນ (ນັບທັງຫ້ອງການສຶກສາ) ຍິງ 263 ຄົນ, ໃນນັ້ນຄູອາສາສະໝັກ 57 ຄົນ, ມີຈຳ ນວນນັກຮຽນທັງໝົດ 8.379 ຄົນ, ຍິງ 4.122.

  ກອງປະຊຸມໄດ້ຮັບຟັງການໂອ້ລົມຂອງທ່ານ ສີສະຫວັດ ພົມມະ ລິວັນ ຮອງເຈົ້າເມືອງໆມຸນລະປາໂມກ, ທ່ານຮຽກຮ້ອງໃຫ້ຜູ້ບໍລິຫານການສຶກສາແຕ່ລະຂັ້ນຕ້ອງເອົາໃຈໃສ່ຢ່າງໃກ້ສິດຕິດແທດຊີ້ນຳ-ນຳພາການເມືອງແນວຄິດຕິດຕາມກວດກາຊຸກຍູ້ການສິດສອນຂອງຄູ-ອາຈານແຕ່ລະໂຮງຮຽນ, ປັບປຸງຄຸນນະພາບການຮຽນ-ການສອນຂອງຄູສອນໃນແຕ່ລະໂຮງ ຮຽນໃຫ້ດີຂຶ້ນເທື່ອລະກ້າວ, ສົບທົບກັບອຳນາດການປົກຄອງທ້ອງຖິ່ນເພື່ອຊອກວີທີທາງສ້າງເງື່ອນໄຂໃຫ້ເດັກໃນແຕ່ລະເກນອາຍຸໃຫ້ໄດ້ເຂົ້າຮຽນໝົດທຸກຄົນ, ຊອກຫາວິທີເພື່ອຫຼຸດອັດຕາປະລະຂອງນັກຮຽນຂອງຊັ້ນປະຖົມ ແລະມັດຖະ ຍົມ, ຕ້ານ ແລະແກ້ໄຂ້ປາກົດການຫຍໍ້ທໍ້ໃນໝູ່ເຍົາວະຊົນນັກຮຽນ, ສ້າງໃຫ້ເປັນແຜນງານ, ໂຄງ ການລະອຽດເພື່ອພັດທະນາການສຶກສາຢູ່ຂັ້ນເມືອງ, ຂັ້ນໂຮງຮຽນໃຫ້ດີຂຶ້ນຄົ້ນຄວ້າຄືນພາລະບົດບາດຄວາມຮັບຜິດຊອບໃນແຕ່ລະຂັ້ນ, ແກ້ໄຂບັນຫາຕ່າງໆຢ່າງເປັນກ້າວໆ.

----

ໜັງສືພິມ ເສດຸະກິດ-ສັງຄົມ

แชร์