ວັນທີ 25 ກັນຍາຜ່ານມາທີ່ນະຄອນຫຼວງວຽງຈັນໄດ້ມີພິທີເປີດໂຕລາຍການໂທລະພາບ “ເຮືອນຂອງຂ້ອຍ “ສຳລັບເດັກກ່ອນໄວຮຽນໃຫ້ກຽດເຂົ້າຮ່ວມເປັນປະທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະກີລາ, ປະທານຮ່ວມ ທ່ານ ວັນສີ ກົວມົວ ຮອງລັດຖະມົນຕິກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ, ທ່ານ ດຣ ນາງ ເພັຍບຣິດໂຕ ຜູ້ຕາງໜ້າອົງການຢູນີເຊັບປະຈຳ ສປປ ລາວ, ພາກສ່ວນກ່ຽວຂ້ອງເຂົ້າຮ່ວມ.    

  ທ່ານ ນາງ ຂັນທະລີ ສີຣິພົງພັນ ໄດ້ສະແດງຄວາມຊົມເຊີຍມາຍັງຄະນະຮັບຜິດຊອບຜະລິດລາຍການໂທລະພາບສຳລັບເດັກກ່ອນໄວຮຽນທີ່ໄດ້ຫ້າງຫາກະກຽມທຸກສິ່ງຢ່າງ ແລະຈັດພິທີເປີດຕົວລາຍການທີ່ມີຄວາມສຳຄັນນີ້ຂຶ້ນຢ່າງເປັນທາງການ.

  ສຳລັບວຽກງານການສຶກສາກ່ອນໄວຮຽນມີຄວາມສຳຄັນ ແລະຈຳເປັນທີ່ສຸດເພາະເປັນການປູພື້ນຖານໃນການພັດທະນາຊັບພະຍາກອນມະນຸດຊຶ່ງເລີ່ມຈາກພັດທະນາເດັກແຕ່ໄວເດັກເປັນຕົ້ນມາ, ການສຶກສາກ່ອນໄວຮຽນແມ່ນການດູແລເບິ່ງແຍງ ແລະສຶກສາອົບຮົມເດັກເພື່ອພັດທະນາ ແລະສົ່ງເລີ່ມໃຫ້ເດັກມີການຂະຫຍາຍຕົວເໝາະ ສົມຕາມເກນອາຍຸໃຫ້ໄດ້ຮັບການສົ່ງເສີມພັດທະນາການທາງດ້ານຮ່າງກາຍ, ສະຕິປັນຍາ, ອາລົມຈິດໃຈ ແລະສັງຄົມຕະຫຼອດເຖິງການຮຽນຮູ້ປະສົບການຊີວິດເພື່ອກຽມຄວາມພ້ອມໃນການເຂົ້າຮຽນຊັ້ນປະຖົມສຶກສາຢ່າງມີຄຸນນະພາບ.

  ໄລຍະຜ່ານມາລັດຖະບານໄດ້ເຫັນຄວາມສຳຄັນຕໍ່ກັບວຽກງານດັ່ງກ່າວໂດຍສະເພາະກະຊວງສຶກສາທິການ ແລະກີລາໄດ້ຈັດບຸລິມະສິດໃນວຽກງານນີ້ເປັນບຸລິມະສິດທີ 1 ຂອງແຜນງານພັດທະນາການສຶກສາຂະແໜງການຍ່ອຍການສຶກສາກ່ອນໄວຮຽນຊຶ່ງໄດ້ສະໜອງງົບປະມານ, ວັດຖຸອຸປະກອນ, ສື່ການຮຽນ-ການສອນ ແລະສິ່ງອຳ ນວຍຄວາມສະດວກຕ່າງໆໃສ່ວຽກງານການສຶກສາກ່ອນໄວຮຽນດ້ວຍຄວາມເອົາໃຈໃສ່, ຄຽງຄູ່ກັນນີ້ການຜະລິດລາຍການໂທລະພາບສຳລັບເດັກກ່ອນໄວຮຽນຈະຊວ່ຍໃຫ້ເດັກນ້ອຍທຸກຄົນໄດ້ຮັບການພັດທະນາ ແລະ ຮຽນຮູ້ຈາກສິ່ງທີ່ໃກ້ຕົວ, ຈາກທຳມະຊາດ ແລະ ສິ່ງແວດລ້ອມອ້ອມຂ້າງໂດຍຜ່ານການຫຼິ້ນດ້ວຍເບິກບານຄວາມມ່ວນຊື່ນຕາມເນື້ອໃນຂອງການຮຽນຮູ້ທີ່ສອດຄ່ອງໄວອາຍຸຕາມຫຼັກສູດທີ່ກະຊວງສຶກສາທິການ ແລະກີລາກຳນົດໄວ້.

  ນອກຈາກນັ້ນເດັກຍັງໄດ້ຮັບຄວາມເອົາໃຈໃສ່ໃນການເບິ່ງແຍງດູແລທາງດ້ານສຸຂະພາບ, ການປົກປ້ອງເດັກໂດຍສະເພາະແມ່ນໄລຍະປ້ອງກັນການພະແຜ່ລະບາດຂອງເຊື້ອພະຍາດໂຄວິດ-19 ພ້ອມທັງສົ່ງເສີມໃຫ້ພໍ່ແມ່ຜູ້ປົກຄອງ, ຊຸມຊົນ ແລະ ພາກສ່ວນທີ່ກ່ຽວຂ້ອງຕະຫຼອດເຖິງຄູ່ຮ່ວມພັດທະນາອື່ນໆ ແລະ ການຈັດຕັ້ງຂອງສັງຄົມທຸກຂັ້ນໃນການເບິ່ງແຍງ-ດູແລ ແລະສຶກສາອົບຮົມເດັກ.

  ສຸດທ້າຍຮຽກຮ້ອງມາຍັງທຸກພາກສ່ວນໃນສັງຄົມ ແລະຄູ່ຮ່ວມພັດທະນາທັງພາຍໃນ ແລະຕ່າງປະເທດຈົ່ງໃຫ້ຄວາມຮ່ວມມື, ຮ່ວມແຮງ, ຮ່ວມໃຈເອົາໃຈໃສ່ຕໍ່ວຽກງານການສຶກສາກ່ອນໄວຮຽນຕະຫຼອດເຖິງສື່ມວນຊົນທຸກພາກສ່ວນຈົ່ງໃຫ້ຄວາມຮ່ວມມືຮ່ວມໃຈປະສານສົມທົບກັນໃນການໂຄສະນາເຜີຍແຜ່ລາຍການໂທລະພາບ “ເຮືອນຂອງຂ້ອຍ” ສຳລັບເດັກກ່ອນໄວຮຽນເພື່ອສົ່ງເສີມໃຫ້ເດັກນ້ອຍລາວໄດ້ຮັບການພັດທະນາ, ຮຽນຮູ້ພ້ອມທັງຮັກສາອະນາໄມໃຫ້ມີສຸຂະພາບແຂງແຮງມີຄວາມມ່ວນຊື່ນເພື່ອເປັນອະນາຄົດທີ່ດີຂອງສັງຄົມ ແລະຂອງຊາດ.

 

แชร์