ເທຣດເຊີລາວ ມອບເງິນ 300 ລ້ານກີບ ຊຸກຍູ້ກອງປະຊຸມໃຫຍ່ແຂວງຫຼວງພະບາງ

  ກຸ່ມບໍລິສັດ ເທຣດເຊີລາວ ໄດ້ມອບເງິນ ຈໍານວນ 300 ລ້ານກີບ ເພື່ອຊຸກຍູ້ໃຫ້ແກ່ກອງປະຊຸມໃຫຍ່ຂອງອົງຄະນະພັກແຂວງຫຼວງພະບາງຄັ້ງທີ່ VIII ທີ່ຈະຈັດຂຶ້ນໃນມໍ່ໆນີ້ແນໃສ່ສ້າງສິ່ງອໍານວຍຄວາມສະດວກໃຫ້ແກ່ກອງປະຊຸມດັ່ງກ່າວໄດ້ດໍາເນີນໄປດ້ວຍຜົນສໍາເລັດຕາມຄາດໝາຍ.

  ສໍາລັບການມອບເງິນ ແລະວັດຖຸອຸປະກອນຊຸກຍູ້ກອງປະຊຸມໃຫຍ່ຄັ້ງນີ້ກຸ່ມບໍລິສັດ ເທຣດເຊີ ລາວ ມອບເງິນຈໍານວນ 300 ລ້ານກີບ, ພ້ອມນີ້ກໍມີບໍລິສັດພັນທະມິດ ກໍ່ສ້າງ-ຂົວທາງ ຈໍາກັດມອບເງິນສົດຈໍານວນ 50 ລ້ານກີບ ແລະກອງກວດກາພາສີປະຈໍາແຂວງຫຼວງພະບາງມອບກະເປົ່າຫີ້ວຈໍານວນ 330 ໜ່ວຍ, ໂດຍມີຕາງໜ້າໃຫ້ກຽດມອບຈາກກຸ່ມບໍລິສັດ ເທຣດເຊີລາວ, ບໍລິສັດພັນທະມິດກໍ່ສ້າງ-ຂົວທາງ ແລະກອງກວດກາພາສີປະຈໍາແຂວງຫຼວງພະບາງ,ໃຫ້ກຽດຮັບໂດຍທ່ານ ຄໍາຂັນຈັນທະວີສຸກ ເຈົ້າແຂວງໆຫຼວງພະບາງ ພ້ອມດ້ວຍຄະນະຈາກນັ້ນທ່ານເຈົ້າ ແຂວງກໍໄດ້ກ່າວສະແດງຄວາມຂອບໃຈຕໍ່ກັບບັນດາບໍລິສັດ, ບັນດາຫ້ອງການທີ່ໄດ້ໃຫ້ການຊຸກຍູ້ຄັ້ງນີ້ຢ່າງຈິງໃຈ ແລະພ້ອມຈະນຳເອົາເງິນ ແລະເຄື່ອງຈໍານວນດັ່ງກ່າວເຂົ້າຮັບໃຊ້ກອງປະຊຸມໃຫຍ່ຄັ້ງ ທີ VIII ໃຫ້ເກີດຜົນປະໂຫຍດສູງສຸດ ແລະມີຄວາມໂປ່ງໃສ.

  ພິທີມອບດັ່ງກ່າວຈັດຂຶ້ນໃນວັນທີ 25 ກັນຍາ 2020 ນີ້, ທີ່ຫ້ອງຮັບແຂກຫ້ອງວ່າການປົກຄອງແຂວງຫຼວງພະບາງ, ໃຫ້ກຽດເຂົ້າຮ່ວມມີທ່ານ ສົມສະຫວາດ ເລັ່ງສະຫວັດ ອາດີດຮອງນາຍົກແຫ່ງ ສປປ ລາວ, ມີບັນດາຮອງເຈົ້າແຂວງ, ຫົວໜ້າຫ້ອງການປົກຄອງແຂວງຫຼວງພະບາງພ້ອມດ້ວຍນັກທຸລະກິດເຂົ້າຮ່ວມ.

---------------

ຂ່າວ: ສີສຸວັນ 

ຮູບພາບ: ໜັງສືພິມເສດຖະກິດ-ສັງຄົມ

แชร์