ສະຫາຍ ໄຊນະຄອນ ສຸດທິດາ ເລຂາຄະນະບໍລິຫານງານຊາວໜຸ່ມແຂວງໄດ້ໃຫ້ສໍາພາດຕໍ່ທີມຂ່າວພວກເຮົາວ່າງບໍ່ດົນນີ້ວ່າ: ໃນຕະຫຼອດໄລຍະ 5 ປີຜ່ານມາ ຄະນະຊາວໜຸ່ມ ສປປ ລາວ ແຂວງຫຼວງພະບາງ ໂດຍປະຕິບັດຕາມພາລະບົດບາດ, ໜ້າທີ່ໃນການສຶກສາອົບຮົມການເມືອງແນວຄິດ, ເຕົ້າໂຮມຄວາມສາມັກຄີເປັນປຶກແຜ່ນ, ບໍາລຸງ ແລະກໍ່ສ້າງການຈັດຕັ້ງຊາວໜຸ່ມ-ເຍົາວະຊົນ-ອະນຸຊົນໃຫ້ມີຄວາມໜັກແໜ້ນ, ເຂັ້ມແຂງທາງດ້ານການເມືອງແນວຄິດ ແລະການຈັດຕັ້ງ,ເປັນຕົວແທນປົກປ້ອງສິດ ແລະຜົນປະໂຫຍດອັນຊອບທໍາຊາວໜຸ່ມ-ໄວໜຸ່ມ, ເຍົາວະຊົນ-ອະນຸຊົນໃນທົ່ວແຂວງຈາກການຊີ້ນໍາໆຂອງ ຄຊປປລ ແຂວງໄດ້ມີຜົນສໍາເລັດຫຼາຍດ້ານທີ່ເປັນຮູບປະທໍາ.

  ຄະນະຊາວໜຸ່ມແຂວງໄດ້ຕັ້ງໜ້າເອົາໃຈໃສ່ໃນການຈັດຕັ້ງປະຕິບັດ 7 ແຜນງານ 21 ໂຄງການເປັນຕົ້ນ: ການຍົກລະດັບຄວາມຮູ້ຄວາມສາມາດໃຫ້ແກ່ຊາວໜຸ່ມ, ບັນ ດາມູນເຊື້ອສຳຄັນຂອງພັກ, ຂອງຊາດ,

  ການສ້າງຄວາມຮັບຮູ້ດ້ານກົດໝາຍໃຫ້ແກ່ຖັ້ນແຖວຊາວໜຸ່ມ, ການລົງເກັບກຳຂໍ້ມູນຂອງຄະນະບໍລິຫານງານຊາວໜຸ່ມແຂວງໃນແຕ່ລະໄລຍະ, ການສ້າງຄວາມເຂັ້ມແຂງດ້ານການຈັດຕັ້ງປັບປຸງແບບແຜນວິທີເຮັດວຽກ, ການສ້າງພະນັກງານສືບທອດປ່ຽນແທນ, ສົ່ງເສີມ ແລະສະໜັບສະໜູນດ້ານວິຊາການປັບປຸງກົນໄກປະສານງານຂອງຊາວໜຸ່ມໃນແຕ່ລະຂັ້ນ, ສ້າງຕັ້ງກອງເຍົາວະຊົນທັນວາໃຫ້ມີຄວາມເຂັ້ມແຂງ, ປົກປ້ອງຜົນປະໂຫຍດ ແລະຕ້ານປາກົດການຫຍໍ້ທໍ້ໃນສັງຄົມ.

  ຜ່ານການຈັດຕັ້ງປະຕິບັດບັນດາແຜນງານ ແລະໂຄງການດັ່ງກ່າວເຫັນວ່າມີຫຼາຍແຜນງານໄດ້ມີຜົນສຳເລັດເປັນກ້າວໆມາໂດຍພາຍໃຕ້ການນຳພາຂອງອົງຄະນະພັກແຂວງກໍຄືການນຳພາຂອງຄະນະບໍລິຫານງານຊາວໜຸ່ມໄດ້ພັດທະນາ ແລະມີທ່ວງທ່າດີຂຶ້ນ, ໂດຍສະເພາະຂະບວນການເຄື່ອນໄຫວຂອງຊາວໜຸ່ມ, ການປະຕິບັດໜ້າທີ່ວຽກງານວິຊາສະເພາະຕິດພັນກັບການສ້າງຂະບວນການແຂ່ງຂັນ 4 ບຸກ, ຊຶ່ງມາຮອກປະຈຸບັນໄດ້ປະກາດເປັນເມືອງຊາວໜຸ່ມ 4 ບຸກໄດ້ 10 ເມືອງ 1 ນະຄອນ ແລະໄດ້ປະກາດຂະບວນການທຸງໄຊນຳໜ້າຂອງຊາວໜຸ່ມ 4 ບຸກໄດ້ 2 ເມືອງຄື ເມືອງຊຽງເງິນ ແລະເມືອງນໍ້າບາກ, ສ່ວນພະແນກການອ້ອມຂ້າງໄດ້ຮັບທຸງໄຊນໍາໜ້າແລ້ວ 6 ພະແນກການ ແລະພວມກະກຽມປະກາດແຂວງຫຼວງພະບາງເປັນແຂວງຊາວໜຸ່ມ 4 ບຸກ ຕື່ມໃນອີກບໍ່ດົນນີ້.

    ສະຫາຍ ໄຊນະຄອນ ສຸດທິດາ ກ່າວຕື່ມວ່າ: ຈາກຜົນງານທີ່ຍາດມາໄດ້ກໍ່ຍ້ອນການຊີ້ນຳຢ່າງໃກ້ຊິດຂອງອົງຄະນະພັກແຂວງແຕ່ລະຂັ້ນທີ່ໃຫ້ການສະໜັບສະໜູນ, ນອກນີ້ຊາວໜຸ່ມຍັງໄດ້ສໍາເລັດການສ້ອມແປງຂົວນໍ້າຄານເກົ່າໄດ້ 2 ຄັ້ງ ແລະຂະບວນການອື່ນໆຢ່າງຕໍ່ເນື່ອງ, ຄ່ຽງຄູ່ຜົນສຳເລັດທີ່ຍາດມາໄດ້ຖ້າທຽບໃສ່ພາລະບົດບາດຂອງຊາວໜຸ່ມ ພາຍໃນແຂວງແລ້ວເຫັນວ່າຍັງມີຫຼາຍດ້ານທີ່ຈະໄດ້ສືບຕໍ່ແກ້ໄຂເປັນຕົ້ນການສຶກສາອົບຮົມການເມືອງແນວຄິດໃຫ້ ຖັ້ນແຖວຊາວໜຸ່ມ, ໄວໜຸ່ມບໍ່ທັນແຂງ ແຮງ, ຕໍ່ເນື່ອງ ແລະທົ່ວເຖິງ, ການຈັດຕັ້ງຊາວໜຸ່ມຢູ່ບາງບ່ອນບໍ່ທັນເຂັ້ມແຂງ, ບັນຫາປາກົດການຫຍໍ້ທໍ້ໃນຖັນແຖວຊາວໜຸ່ມຍັງເກີດຫຼາຍ, ການຫຼິ້ນກິນຟຸ່ມເຟື່ອຍ, ຫຼົງໄຫຼໄປຕາມກະແສຂອງສັງຄົມ, ການຫວ່າງງານ ແລະອື່ນໆອີກ.

  ໃນໂອກາດກອງປະຊຸມໃຫຍ່ຄັ້ງທີ່ VIII ຂອງຜູ້ແທນອົງຄະນະພັກແຂວງຫຼວງພະບາງ ທີ່ຈະໄຂຂຶ້ນໃນມໍ່ໆນີ້ສະຫາຍກໍໄດ້ຖືໂອກາດນີ້ອວຍພອນໃຫ້ການດຳເນີນກອງປະຊຸມໃຫຍ່ຄັ້ງທີ VIII ປະສົບຜົນສຳເລັດຕາມຄາດໝາຍທີ່ວາງໄວ້.

--------------

ຂ່າວ: ສີສຸວັນ 

ຮູບພາບ: ໜັງສືພິມເສດຖະກິດ-ສັງຄົມ

แชร์