ຈະພັດທະນາຕາດໝາໄນໃຫ້ເປັນແຫຼ່ງທ່ອງທ່ຽວໜ້າສົນໃຈອີກແຫ່ງຢູ່ທ່າແຕງ

 ແຫຼ່ງທໍາມະຊາດຕາດໝາໃນຢູ່ເມືອງທ່າແຕງແຂວງເຊກອງຈະເປັນແຫຼ່ງທ່ອງທ່ຽວທາງທຳມະຊາດອີກແຫ່ງໜຶ່ງໂດຍບໍລິສັດ ແກ້ວທະວີຊັບກໍ່ສ້າງ ແລະສ້ອມແປງຂົວ-ທາງຈຳກັດຜູ້ດຽວໄດ້ສະເໜີເຈດຈຳນົງເພື່ອພັດທະນາຊຶ່ງຫຼ້າສຸດໃນວັນທີ24 ກັນຍາ ຜ່ານມາທີ່ເມືອງທ່າແຕງ ໄດ້ຈັດກອງປະຊຸມປຶກສາຫາລືຄວາມເປັນໄປໄດ້ໃນການພັດທະນາ ໂດຍມີຫ້ອງການ ແລະຂະແໜງການກ່ຽວຂ້ອງເຂົ້າຮ່ວມ.

  ທ່ານນາງ ແກ້ວລາວັນ ແກ້ວລາດຊະວົງໄຊ ເຈົ້າຂອງບໍລິສັດ ແກ້ວທະວີຊັບກໍ່ສ້າງ ແລະສ້ອມແປງຂົວ-ທາງຈໍາກັດ ຜູ້ດຽວກ່າວວ່າ: ການພັດທະນານໍ້າຕົກຕາດໝາໄນເປັນສະຖານທີ່ທ່ອງທ່ຽວຈະໃຫ້ໄດ້ຕາມຮູບແບບໃນມູນຄ່າການລົງທຶນທັງໝົດ 5 ຕື້ກີບ ຊຶ່ງປະກອບມີຫຼາຍກິດຈະກຳເຊັ່ນ: ບຸກເບີກເສັ້ນທາງ, ປູກຕົ້ນໄມ້ 7 ຊັ້ນ (ຕົ້ນ ໄມ້ປາລະມີ), ກໍ່ສ້າງໂຮມສະເຕ, ລີສອດ, ໄຟຟ້າ, ນໍ້າປະປາ, ການຕົບແຕ່ງພາຍໃນຕາດ ແລະອື່ນໆ.

  ຍ້ອນເຫັນໄດ້ວ່າມີສະຖານທີ່ທ່ອງທ່ຽວ 2 ແຫ່ງ ທີ່ຢູ່ໃກ້ກັບນໍ້າຕົກຕາດໝາໄນ, ຫ່າງກັນປະມານ 3 ກິໂລແມັດ ຊຶ່ງເໝາະແກ່ການສ້າງເປັນແຫຼ່ງທ່ອງທ່ຽວແຫ່ງໃໝ່ໃຫ້ຕໍ່ເນື່ອງຢູ່ພາຍໃນເມືອງທ່າແຕງເພື່ອເຮັດໃຫ້ການດໍາເນີນງານເປັນໄປຢ່າງມີປະສິດທິພາບ, ຖືກຕ້ອງຕາມລະບຽບຫຼັກການຂອງຂະແໜງການກ່ຽວຂ້ອງໃນການພັດທະນາແຫຼ່ງທ່ອງທ່ຽວທາງທໍາມະຊາດນໍ້າຕົກຕາດໝາໄນແຫ່ງໃໝ່ຂອງເມືອງທ່າແຕງໂດຍລວມຜູ້ເຂົ້າຮ່ວມໄດ້ປະກອບຄໍາຄິດເຫັນຢ່າງກົງໄປກົງມາເປັນຕົ້ນສະຖານທີ່ແຫຼ່ງທ່ອງທ່ຽວ, ສາດສະໜາ, ຮີດຄອງປະເພນີ, ທີ່ດິນ, ກະສິກໍາ, ແຜນການ ແລະການລົງທຶນ, ການເງິນໂດຍເຫັນດີໃຫ້ບໍລິສັດແກ້ວທະວີຊັບກໍ່ສ້າງ ແລະສ້ອມແປງຂົວ-ທາງຈໍາກັດຜູ້ດຽວພັດທະນາຕາດດັ່ງກ່າວຢ່າງຮັດກຸມ, ບັນດາຂະແໜງການຕ້ອງເປັນເຈົ້າເຮັດໜ້າທີ່ປະສານງານດ້ານເນື້ອໃນທີ່ຊີ້ແຈງໃຫ້ເຫັນຂໍ້ສະດວກ ແລະຂໍ້ ຫຍຸ້ງຍາກເພື່ອພ້ອມກັນຊອກຫາວິທີການ ແລະກົນໄກທີ່ເໝາະສົມເພື່ອລົງສໍາຫຼວດຕົວຈິງ, ຊຶ່ງເມືອງທ່າແຕງເປັນບ່ອນໄດ້ຮັບການຍົກລະດັບໃຫ້ເປັນແຫຼ່ງທ່ອງທ່ຽວທີ່ໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະ ຕ່າງປະເທດ, ຄຽງຄູ່ກັນນັ້ນກໍ່ຍັງມີທຳມະຊາດທີ່ໜ້າສົນໃຈອີກຫຼາຍບ່ອນທີ່ຍັງບໍ່ທັນໄດ້ຮັບການບູລະນະເທື່ອ, ຕາດໝາໄນແມ່ນໜຶ່ງໃນຫຼາຍໆຕາດທີ່ຍັງບໍ່ທັນໄດ້ຮັບການບຸກເບີກ, ປົວແປງໃຫ້ກາຍເປັນແຫຼ່ງທ່ອງທ່ຽວທີ່ດຶງດູດນັກທ່ອງທ່ຽວໃຫ້ຫຼາຍຂຶ້ນ.

----------------

ຂ່າວ: ພອນ ບຸນອຸທິດ 

ຮູບພາບ: #ຫນັງສືພິມເສດຖະກິດສັງຄົມ

แชร์