ນາຍົກ ເນັ້ນຫຼາຍບັນຫາຕໍ່ ສຄອຊ ຊຸດໃໝ່ໃຫ້ສືບຕໍ່ແກ້ໄຂ

   ກອງປະຊຸມໃຫຍ່ສະພາການຄ້າ ແລະອຸດສາຫະກໍາແຫ່ງຊາດລາວຄັ້ງທີ VIII ຈັດຂຶ້ນໃນວັນທີ 25 ກັນຍານ 2020 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະການຄ້າ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກໍາແຫ່ງຊາດລາວ (ສຄອຊ),  ພ້ອມດ້ວຍບັນດານັກທຸລະກິດ, ສະມາຊິກ ສຄອຊ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

 ກອງປະຊຸມໄດ້ສະຫຼຸບຄືນຜົນງານການເຄື່ອນໄຫວວຽກງານຂອງສະພາການຄ້າ ແລະອຸດສາຫະກໍາແຫ່ງຊາດລາວແຕ່ປີ 2017-2019, ສະຫຼຸບວຽກງານການເງິນ, ວາງທິດທາງແຜນການເຄື່ອນໄຫວວຽກງານ 3 ປີ, ນັບແຕ່ປີ2021-2023, ຮັບຟັງແຜນຍຸດທະສາດການພັດທະນາພາກທຸລະກິດ 2021-2025 ລວມມີ 6 ເສົາຄໍ້າຄື: ເສົາຄໍ້າທີ 1: ການພົບປະລະຫວ່າງລັດທຸລະກິດເພື່ອປັບປຸງແວດລ້ອມການດໍາເນີນທຸລະກິດໂດຍການຈັດຕັ້ປະຕິບັດກອງປະຊຸມລາວ, ເສົາຄໍ້າທີ2: ການພັດທະນາສົ່ງເສີມທຸລະກິດຂະໜາດນ້ອຍ ແລະຂະໜາດກາງໂດຍຜ່ານສູນບໍລິການ, ເສົາຄໍ້າທີ 3: ການສົ່ງເສີມຕະຫລາດຜະລິດຕະພັນລາວ, ເສົາຄໍ້າທີ 4: ການເຊື່ອມໂຍງເສດຖະກິດພາກພື້ນ ແລະການສົ່ງເສີມການລົງທຶນທີ່ຍືນຍົງ, ເສົາຄໍ້າທີ 5: ການພັດທະນາຜູ້ປະກອບການ ແລະກິດຈະກໍາຜູ້ໃຊ້ແຮງງານ, ເສົາຄໍ້າທີ 6: ຂໍ້ມູນຂ່າວ ສານ, ການພົວພັນມວນຊົນ ແລະການບໍລິການໃຫ້ແກ່ສະມາຊິກ.

  ກອງປະຊຸມຄັ້ງນີ້ຍັງໄດ້ມີພິທີຍ້ອງຍໍໃຫ້ແກ່ຜູ້ທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານຂອງສະພາການຄ້າ ແລະອຸດສາຫະກໍາແຫ່ງຊາດຕະຫຼອດໄລຍະ 3 ປີ ຜ່ານມາ ແລະປ່ອຍບັດເລືອກຕັ້ງເອົາຄະນະບໍລິຫານງານສະພາການຄ້າ ແລະອຸດສາຫະກໍາແຫ່ງຊາດລາວຊຸດທີ VIII ໂດຍໄດ້ເລືອກເອົາທ່ານ ອຸເດດ ສຸວັນນະວົງ ເປັນປະທານ ສຄອຊ ອີກສະໄໝ ແລະຮອງປະທານພ້ອມດ້ວຍຄະນະຈຳນວນໜຶ່ງ.

  ໃນຕອນບ່າຍຂອງວັນດຽວກັນກອງປະຊຸມຍັງໄດ້ຮັບກຽດຟັງການໂອ້ລົມຈາກ ທ່ານ ທອງລຸນ ສີສຸລິດ ນາຍົກລັດຖະມົນຕີກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະ ສຄອຊ ທີ່ຍາດຜົນງານມາໄດ້ໃນຕະຫຼອດໄລຍະຜ່ານມາພ້ອມນີ້ທ່ານຍັງໄດ້ເນັ້ນໜັກບາງບັນຫາທີ່ສໍາຄັນເພື່ອໃຫ້ ສຄອຊ ພ້ອມດ້ວຍສະມາຊິກສືບຕໍ່ແກ້ໄຂໃນຕໍ່ໜ້າເພື່ອໃຫ້ພາກທຸລະກິດສາມາດຜ່ານວິກິດໂຄວິດ-19 ສາມາດແຂ່ງຂັນກັບສາກົນປະກອບສ່ວນຄຽງຄູ່ກັບພາກລັດໃນການພັດທະນາເສດຖະກິດ-ສັງຄົມຂອງປະເທດ ຊາດໃຫ້ມີຄວາມເຕີບໃຫຍ່ເຂັ້ມແຂງຕາມແຜນການທີ່ພັກ ແລະລັດວາງເອົາໄວ້.

____________

ຮູບພາບ: #ຫນັງສືພິມເສດຖະກິດສັງຄົມ

แชร์