ເອຊີລີດາ ລາວພັດທະນາແອັບທັນໃຈເພີ່ມເຕີມຕື່ມເພື່ອເປັນທະນາຄານໃນມືລູກຄ້າແທ້ຈິງ

   ແອັບເທິງມືຖື ຫຼືການບໍລິການເທິງມືຖືແມ່ນການບໍລິການທີ່ໃຫ້ບໍລິການໂດຍທະນາຄານ ຫຼືສະຖາບັນການເງິນອື່ນໆທີ່ຊ່ວຍໃຫ້ລູກຄ້າສາມາດດຳເນີນທຸລະກຳທາງດ້ານການເງິນໄດ້ໂດຍໃຊ້ອຸປະກອນມືຖືເຊັ່ນ: ໂທລະສັບສະມາດໂຟນ ຫຼືແທັບເລັດຊຶ່ງສາມາດເຮັດທຸລະກຳໄດ້ຕະຫຼອດ 24 ຊົ່ວໂມງ.

  ທະນາຄານ ເອຊີລີດາ ລາວ ຈຳກັດ, ປະຊາທະນາຄານທີ່ທ່ານໄວ້ວາງໃຈ ແລະມີວິໄສທັດເປັນຜູ້ນຳໃນດ້ານທະນາຄານເພື່ອທຸລະກິດຂະໜາດນ້ອຍ ແລະຂະໜາດກາງໃນ ສປປ ລາວ ໄດ້ຖືເປັນກຽດຢ່າງຍິ່ງທີ່ຈະແຈ້ງມາຍັງລູກຄ້າ ແລະ ປະຊາຊົນໄດ້ຮັບຊາບຢ່າງທົ່ງເຖິງກັນວ່າເພື່ອຕອບສະໜອງຄວາມຮຽກຮ້ອງຕ້ອງການຂອງລູກຄ້າ ແລະປະຊາຊົນ ແລະເພື່ອສອດຄ່ອງກັບການຂະຫຍາຍຍຸດທະສາດດິຈິຕອລຂອງທະນາຄານເພື່ອຮອງຮັບຄວາມຕ້ອງການໆບໍລິການດ້ານການເງິນດິຈິຕອລ, ທະນາຄານໄດ້ພັດທະນາຟັງຊັ່ນໃໝ່ຂອງເອຊີລີດາຕວັນເຈັດ (ທັນໃຈ) ຊຶ່ງໃຫ້ບໍລິການລູກຄ້າ ແລະສາທາລະນະຊົນໃນການເຮັດທຸລະກຳທຸກປະເພດທີ່ກ່ຽວຂ້ອງກັບການບໍລິການທະ ນາຄານ.

  ເອຊີລີດາ ຕວັນເຈັດ (ທັນໃຈ) ແມ່ນແອັບພິເຄຊັ່ນບໍລິການເທິງມືຖື (FinTech) ທີ່ນຳໃຊ້ລະບົບ iOS ຫຼື An droid ຊຶ່ງລູກຄ້າສາມາດເຮັດທຸລະກຳທາງທະນາ ຄານຜ່ານໂທລະສັບມືຖືໄດ້ຢ່າງສະດວກສະບາຍ ແລະປອດໄພຈາກທຸກທີ່ທຸກເວລາ.

  ທ່ານ ດຣ. ຮາຍ ສະວາຍ, ຜູ້ອຳນວຍການໃຫຍ່ຂອງທະນາຄານ ເອຊີລີດາ ລາວ ຈຳກັດ ກ່າວວ່າ “ເປັນເວລາຫຼາຍກວ່າ 2 ປີແລ້ວທີ່ທະນາຄານເອຊີລີດາ ລາວ ໄດ້ໃຫ້ການບໍລິການເອຊີລີດາຕວັນເຈັດ ແລະສືບຕໍ່ພັດທະນາຟັງຊັ່ນທີ່ມີຄວາມປອດໄພເພີ່ມເຕີມຂອງການບໍລິການຕ່າງໆຂອງທະນາຄານເພື່ອຕອບສະໜອງຄວາມຕ້ອງການຂອງລູກຄ້າ ແລະປະຊາຊົນໃນຍຸກດິຈິຕອລ, ຈຸດປະສົງຂອງຟັງຊັ່ນເຫຼົ່ານີ້ເຮັດໃຫ້ເອຊີລີດາຕວັນເຈັດກາຍເປັນຜູ້ໃຫ້ບໍລິການດ້ານການທະນາຄານເທິງໂທລະສັບມືຖືຢ່າງ ແທ້ຈິງ, ຈົນມາຮອດປະຈຸບັນນີ້, ມີລູກຄ້າປະມານ 60.000 ຄົນ ທີ່ໃຊ້ເອຊີລີດາຕວັນເຈັດ”.

   ທ່ານ ນາງ ໄກສອນ ລິນທອງ, ຫົວໜ້າພະແນກການຕະຫຼາດກ່າວວ່າໃນສະພາບແວດລ້ອມດັ່ງກ່າວ, ລູກຄ້າຜູ້ທີ່ມີເອຊີລີດາ ຕວັນເຈັດ (ທັນໃຈ) ສາມາດໃຊ້ງານ ແລະເຂົ້າເຖິງການບໍລິການຂອງທະນາຄານທີ່ກ່ຽວຂ້ອງໄດ້ທຸກທີ່ ແລະທຸກເວລາໂດຍບໍ່ຕ້ອງເຂົ້າມາຫ້ອງການຂອງທະນາຄານ ເພາະວ່າເອຊີລີດາ ຕວັນ ເຈັດ ມີຫຼາກຫຼາຍຟັງຊັ່ນທີ່ຊ່ວຍໃຫ້ລູກຄ້າສາມາດໃຊ້ບໍລິການທະນາຄານເຊັ່ນ: ການຊຳລະໃບບິນ (ນໍ້າປະປາ, ອີອອນ, ພຣູເດັນໂຊລ໌ປະກັນໄພຊີວິດ ແລະອື່ນໆ), ການຕື່ມມູນຄ່າໂທ (ລາວໂທລະຄົມ, ອີທີແອວ ແລະອື່ນໆ), ການໂອນເງິນ (ລະຫວ່າງບັນຊີ, ໝາຍເລກໂທລະສັບມືຖື, ທັນໃຈ, ບັນຊີຂອງບຸກຄົນອື່ນ ແລະອື່ນໆ),ການຊຳລະ P2P, ການສະແກນ QR ເພື່ອຊຳລະ ຫຼື ຈ່າຍ, ລະຫັດ QR ຂອງຂ້ອຍ, ກວດສອບຍອດເງິນໃນບັນຊີ ແລະລາຍການທຸລະກຳຫຼ້າສຸດ, ຊອກຫາທີ່ຕັ້ງ (ຕູ້ເອທີເອັມ, ສາຂາ ແລະຫ້ອງການ), ອັດເດດຂໍ້ມູນຂ່າວສານ ແລະອີກຫຼາກຫຼາຍຟັງຊັ່ນໃໝ່ໆໃນໄວໆນີ້.

 ຫຼາຍກວ່າ 12 ປີ ແຫ່ງການດຳເນີນທຸລະກິດໃນ ສປປ ລາວ, ທະນາຄານ ເອຊີລີດາ ລາວຈຳກັດ ໄດ້ຮັບການຍອມຮັບວ່າເປັນທະນາຄານທຸລະກິດອັນດັບ 1 ທີ່ປະກອບສ່ວນເຂົ້າໃນການສ້າງວຽກເຮັດງານທຳໃນຂະແໜງການທະນາຄານໃຫ້ແກ່ປະຊາຊົນລາວ ແລະ ເປັນທະນາຄານແຫ່ງທຳອິດໃນ ສປປ ລາວ ທີ່ໃຫ້ບໍລິການຖອນເງິນສົດຜ່ານຕູ້ເອທີເອັມໂດຍບໍ່ໃຊ້ບັດດ້ວຍລະຫັດ OTP. “ເອຊີລີດາ ຕວັນເຈັດ (ທັນໃຈ)” ຊ່ວຍໃຫ້ລູກຄ້າສາມາດເຮັດທຸລະກຳໄດ້ທຸກວັນ, ທຸກເວລາ ແລະທຸກທີ່.

 ໃນລະດັບພູມີພາກ,ກຸ່ມທະນາຄານເອຊີລີດາປະກອບມີທະນາຄານເອຊີລີດາມະຫາຊົນສ້າງຕັ້ງຂຶ້ນໃນປີ 1993 ແລະມີບໍລິສັດລູກທີ່ດຳເນີນທຸລະກິດຢູ່ປະເທດກຳປູເຈຍ, ລາວ ແລະມຽນມາດ້ວຍຊັບສິນທັງໝົດຫຼາຍກວ່າ 6 ຕື້ໂດລາສະຫະລັດ, 316 ສາຂາຫ້ອງການ,ຕູ້ເອທີເອັມ 718 ຕູ້, ໃຫ້ບໍລິການລູກຄ້າຫຼາຍລ້ານຄົນ ແລະບໍລິການໂອນເງິນໄປທົ່ວໂລກ.

----------------

ຮູບພາບ: ໜັງສືພິມເສດຖະກິດ-ສັງຄົມ

แชร์