ຫຼາຍພາກສ່ວນສົມທົບທຶນສ້າງຫຼັງຄາວິຫານພະເຈົ້າໃຫຍ່ ເມືອງເກົ່າສຸວັນນະໂຄມຄໍາ

  ພະເຈົ້າໃຫຍ່ອົງຫຼວງເມືອງເກົ່າສຸວັນນະໂຄມຄໍາ ເປັນມິ່ງຂວັນຂອງຊາວເມືອງຕົ້ນເຜິ້ງ ກໍ່ຄືຊາວ ແຂວງບໍ່ແກ້ວ ມາແຕ່ບູຮານນະການແລະເມືອງເກົ່າສຸວັນນະໂຄມຄໍາຍັງເປັນເມືອງທີ່ມີຮ່ອງຮອຍປະຫວັດສາດອັນຍາວນານແຕ່ດ້ວຍການເວລາທີ່ຜ່ານພົ້ນໄປເຮັດໃຫ້ພະທາດອົງດັ່ງກ່າວແຕກຫັັກບາງສ່ວນຊາວບ້ານຈຶ່ງຕົກລົງກັນປະຕິສັງຂອນຄືນໃໝ່ເພື່ອໃຫ້ລູກຫຼານໄດ້ສັກກາລະບູຊາສືບຕໍ່ໄປ.

  ດັ່ງນັ້ນໃນວັນທີ 24 ກັນຍາ 2020, ທ່ານ ນາງ ແກ້ວໂພໄຊ ປີລາແກ້ວ ນັກທຸລະກິດບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ພ້ອມດ້ວຍທີມງານໄດ້ນຳເອົາເງິນຈຳນວນ 10,5 ລ້ານກີບ ມາໂມທະນາທານເພື່ອສົມທົບທຶນກໍ່ສ້າງຫຼັງຄາວິຫານພະເຈົ້າໃຫຍ່ ເມືອງເກົ່າສຸວັນນະໂຄມຄໍາ, ຊຶ່ງເງິນຈໍານວນດັ່ງກ່າວໄດ້ມາຈາກການປະກອບສ່ວນໂມທະນາທານຂອງຄອບຄົວຍາດຕິພີ່ນ້ອງເພື່ອນມິດສະຫາຍຂອງທ່ານ ນາງ ແກ້ວ ໂພໄຊ ປີລາແກ້ວ ແລະການປະກອບສ່ວນໂມທະນາທານຂອງ ທ່ານ ໂນ້ ສັດທາຈາກນະຄອນຫຼວງວຽງຈັນ ຈໍານວນ 5 ແສນກີບ.

  ໂອກາດດັ່ງກ່າວນາຍບ້ານໆ ຮົ່ມເຢັນ ເມືອງຕົ້ນເຜິ້ງ ໄດ້ຕາງໜ້າໃຫ້ແກ່ອຳນາດການປົກຄອງກຸ່ມບ້ານດອນທາດ ຊຶ່ງເປັນກຸ່ມບ້ານເຈົ້າພາບທີ່ຮັບຜິດຊອບອະນາໄມປົກປັກຮັກສາແຫຼ່ງປະຫວັດສາດພະເຈົ້າໃຫຍ່ອົງຫຼວງເມືອງເກົ່າສຸວັນນະໂຄມຄໍາ ແລະຕາງໜ້າໃຫ້ທາງເມືອງໄດ້ສະແດງຄວາມຂອບໃຈມາຍັງທ່ານ ນາງ ແກ້ວ ໂພໄຊ ພ້ອມດ້ວຍທີມງານຄອບຄົວຍາດຕິພີ່ນ້ອງ ແລະເພື່ອນມິດສະຫາຍທີ່ມີຈິດໃຈເຫຼື້ອມ ໃສສັດທາປະກອບສ່ວນໂມທະນາທຶນໃນການກໍ່ສ້າງຫຼັງຄາວິຫານພະເຈົ້າໃຫຍ່ເມືອງເກົ່າສຸວັນນະໂຄມຄໍາໃນຄັ້ງນີ້.

----

ໂດຍ: ນໍ້າເໝີຍ

แชร์