ທ່ຽວຊົມຕາດຮະມອງ

  ແຂວງອັດຕະປື ກໍມີສະຖານທີ່ທ່ອງທ່ຽວທີ່ໜ້າສົນໃຈຫຼາຍແຫ່ງ ໂດຍສະເພາະແມ່ນສະຖານທີ່ທ່ອງທ່ຽວທາງທໍາມະຊາດທີ່ສວຍສົດງົດງາມຢ່າງຫຼວງຫຼາຍ, ສໍາລັບສະຖານທີ່ທ່ອງທ່ຽວໃນຮູບແບບຂອງການພັກຜ່ອນນີ້ ຊຶ່ງເໝາະກັບການພາຄົນຮັກ ຫຼື ຄອບຄົວໄປຫຼິ້ນທ່ຽວເພື່ອຜ່ອນຄາຍ, ສະຖານທີ່ດັ່ງກ່າວມີຄວາມສວຍງາມປະກອບກັບບັນຍາກາດທີ່ສົດຊື່ນນັ້ນກໍຄື ຕາດຮະມອງ.

  ຕາດຮະມອງ ເປັນຕາດທີ່ມີຄວາມສວຍສົດງົດງາມເປັນຢ່າງຍິ່ງ, ມີນໍ້າໃສສະອາດໄຫຼອອກມາຈາກຮ່ອມຜາລົງມາໂຕນໃສ່ຕາດທີ່ເປັນຫຼາຍຂັ້ນກະແຈກກະຈາຍ, ສູງປະມານ 85 ແມັດ ຊຶ່ງເປັນນໍ້າຕົກຕໍ່ເນື່ອງ 7 ຊັ້ນ ເກີດຈາກສາຂາຂອງນໍ້າເຊຊຸຕົກໃສ່ນໍ້າເຊກະໝານບໍລິເວນອ້ອມຂ້າງຕາດຄາມີທໍາມະຊາດທີ່ອຸດົມສົມບູນ, ມີປ່າໄມ້ທີ່ຂຽວກະຈີງົດງາມຍິ່ງ, ປະກອບດ້ວຍຕົ້ນໄມ້ນ້ອຍ-ໃຫຍ່ລວມທັງຊີວະນານາພັນອາໄສຢູ່ໃນເຂດດັ່ງກ່າວເມື່ອມາທ່ອງທ່ຽວ “ຕາດຮະມອງ” ແຫ່ງນີ້ນັກທ່ອງທ່ຽວຈະໄດ້ສໍາຜັດກັບນໍ້າທີ່ໃສສະອາດ, ອາກາດທີ່ເຢັນສົດຊື່ນ, ເພີດເພີນກັບບັນຍາກາດທີ່ຜ່ອນຄາຍ, ໄດ້ສໍາຜັດທ່ຽວຊົມຄວາມສວຍງາມທີ່ແຕກຕ່າງກັນຂອງຕາດຮະມອງທັງ 7 ຊັ້ນ ໂດຍການຄ່ອຍໆຍ່າງຂຶ້ນຕາມເສັ້ນທາງຂ້າງຕາດ ຫຼື ຂຶ້ນມາຕາມຕາດເລີຍເພື່ອສໍາຜັດກັບສາຍນໍ້າເຢັນສົດຊື່ນເມື່ອນໍ້າຕົກຟົ້ງໃສ່ພ້ອມທັງສາມາດເຂົ້າຫຼິ້ນນໍ້າເຂົ້າໄປໃນ ກ້ອງຕາດທີ່ມີນໍ້າໄຫຼຜ່ານຢ່າງໜ້າຕື່ນຕາຕື່ນໃຈເໝາະສໍາລັບຜູ້ທີ່ມັກການທ່ອງທ່ຽວໃນຮູບແບບພະຈົນໄພ.

  ສໍາລັບໃຜທີ່ຢາກໄປທົດລອງສໍາຜັດແຫຼ່ງທ່ອງທ່ຽວຕາດຮະມອງແມ່ນສາມາດໄປໄດ້ ຊຶ່ງຕັ້ງຢູ່ເມືອງ ພູວົງ ຫ່າງຈາກເມືອງສາມັກຄີໄຊປະ ມານ 75 ກິໂລແມັດ.

 ----

ໂດຍ: ວົງມະນີ

แชร์