ທ່ານ ແສງຈັນ ອິນສີມີໄຊ ປະທານສານປະຊາຊົນແຂວງຫຼວງພະບາງໃຫ້ສຳພາດຕໍ່ທີມຂ່າວພວກເຮົາວ່າງບໍ່ດົນນີ້ວ່າ: ໃນ 5 ປີຜ່ານມາຄະນະນໍາສານປະຊາຊົນແຂວງຫຼວງພະບາງໄດ້ເອົາໃຈໃສ່ຊີ້ນຳໆນຳພາວຽກງານຂອງສານເຮັດໃຫ້ພະນັກງານຜູ້ພິພາກສາມີທັດສະນະລັກໝັ້ນ, ມີຄຸນທາດການເມືອງໜັກແໜ້ນ, ມີຈັນຍາທຳຕໍ່ອາຊີບ ຂອງຕົນເປັນແບບຢ່າງນໍາໜ້າໃນການເຄົາລົບລະບຽບກົດໜາຍ ແລະ ພັດທະນາວຽກງານຍຸຕິທຳແກ້ໄຂຄະດີຕ່າງໆ ຢູ່ພາຍໃນແຂວງຫຼວງພະບາງໄດ້ມີຜົນສໍາເລັດຫຼາຍດ້ານເປັນກ້າວໆມາ.

   5 ປີຜ່ານມາ ພາຍໃຕ້ການຊີ້ນຳໆ ພາຂອງອົງຄະນະພັກແຂວງກໍຄືສານປະຊາຊົນໄດ້ເອົາໃຈໃສ່ປະຕິບັດພາລະບົດບາດໜ້າທີ່ຂອງຕົນດ້ວຍການປະສານສົມທົບກັນຢ່າງກົມກຽວໃນການຕິດຕາມກວດກາ, ການປະຕິບັດລະບຽບກົດໝາຍຂອງອົງການລັດ, ອົງການຈັດຕັ້ງສັງຄົມ ແລະພົນລະເມືອງເພື່ອປົກປ້ອງກົດໝາຍໃຫ້ມີຄວາມສັກ ສິດ, ການພິຈາລະນາແກ້ໄຂຄະດີຕ່າງໆມີຄວາມວ່ອງໄວ, ພາວະວິໄສ, ຖືກຕ້ອງ ແລະເປັນຮູບທຳ, ອັນໄດ້ເຮັດໃຫ້ສິດຜົນປະໂຫຍດທີ່ຊອບທຳຂອງລັດ,ຂອງພົນລະເມືອງຖືກປົກປ້ອງ, ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍມີຄວາມສັກສິດ ແລະ ຍຸຕິທຳຫຼາຍຂຶ້ນ, ຊຶ່ງໃນ 5 ປີຜ່ານມາມີຄະດີເຂົ້າມາສານປະຊາຊົນແຂວງທັງໝົດ 2.140 ເລື່ອງ, ແກ້ໄຂໄດ້1.693 ເລື່ອງ ແລະ ພວມດຳເນີນຄະດີ 177 ເລື່ອງ, ຄະດີທີ່ເກີດຂຶ້ນຫຼາຍກວ່າໝູ່ແມ່ນຄະດີແພ່ງກ່ຽວກັບບັນຫາການກູ້ຢື່ມ ແລະ ຂໍ້ຂັດແຍງບັນຫາທີ່ດິນນອກຈາກທີ່ໄດ້ເອົາໃຈໃສ່ແກ້ໄຂຄະດີແລ້ວຍັງໄດ້ຍົກສູງຄວາມຮັບຜິດຊອບສາມັກຄີພາຍໃນໃຫ້ມີຄວາມສະຫງົບ ແລະເປັນລະບຽບຮຽບຮ້ອຍ, ເຫັນໄດ້ວ່າການຈັດຕັ້ງປະຕິບັດວຽກງານມີສົມຜົນສຳເລັດໃນຫຼາຍດ້ານ, ນອກຈາກວຽກງານວິຊາສະເພາະແລ້ວກໍຍັງໄດ້ສ້າງຂະບວນການປ້ອງກັນສຳນັກງານ, ອົງການ, ການລົງໂຄສະນາເຜີຍແຜ່ກົດໝາຍ, ລົງກວດກາບັນດາສານເຂດທີ່ຂຶ້ນກັບຄວາມຮັບຜິດຊອບຂອງຕົນ, ເຮັດໃຫ້ການພິຈາລະນາຕັດສິນຄະດີຂອງແຂວງມີຄວາມວ່ອງໄວຂຶ້ນກວ່າເກົ່າ,ນອກນີ້ໄດ້ຊຸກຍູ້ພະນັກງານສ້າງເສດຖະກິດຄອບຄົວດ້ວຍການປູກ,ການລ້ຽງ,ການບໍລິການ ແລະອື່ນໆທີ່ສາມາດສ້າງລາຍຮັບຕາມເງື່ອນໄຂຂອງຄອບຄົວທີ່ຖືກຕ້ອງລະບຽບກົດໝາຍ.

  ທ່ານປະທານຍັງກ່າວຕື່ມອີກວ່າ: ຜ່ານມາໄດ້ຫັນລົງສູ່ຮາກຖານໃນການໂຄສະນາເຜີຍແຜ່ກົດໝາຍໃຫ້ພະນັກງານ, ທະຫານ, ຕໍາຫຼວດ ແລະປະຊາຊົນບັນດາເຜົ່າໄດ້ຮັບຮູ້ ແລະພ້ອມກັນຈັດຕັ້ງປະຕິບັດຢ່າງກວ້າງຂວາງ, ເລິກເຊິ່ງ, ເຮັດໃຫ້ພົນລະເມືອງພາຍໃນແຂວງຮັບຮູ້, ເຂົ້າໃຈກົດໝາຍ ແລະ ມີສະຕິເຄົາລົບກົດໝາຍສູງຂຶ້ນສັງຄົມມີຄວາມສະເໝີພາບຕໍ່ໜ້າກົດໝາຍ, ນອກນີ້ໄດ້ເປີດການຮຽນບຳລຸງກົດໝາຍຊັ້ນຕົ້ນໃຫ້ພະນັກງານຫຼັກແຫຼ່ງ ແລະອົງການປົກຄອງບ້ານ, ການສ້າງຄອບຄົວ ແລະບ້ານແບບຢ່າງໃນການປະຕິບັດກົດໝາຍໄດ້ດຳເນີນໄປຢ່າງຕໍ່ເນື່ອງ ແລະ ມີຜົນສຳເລັດ ແລະ ໃນໂອກາດກອງປະຊຸມໃຫຍ່ ຄັ້ງທີ່ VIII ຂອງຜູ້ແທນອົງຄະນະພັກ ແຂວງຫຼວງພະບາງ ທີ່ຈະໄຂຂຶ້ນໃນມໍ່ໆ ນີ້ທ່ານໄດ້ຖືໂອກາດອວຍພອນມາຍັງກອງປະຊຸມໃຫຍ່ຄັ້ງທີ່ VIII ຂອງຜູ້ແທນອົງຄະນະພັກແຂວງຫຼວງພະບາງຈົ່ງດຳເນີນໄປດ້ວຍຜົນສຳເລັດຕາມຄາດໝາຍ.

-------------

ຂ່າວ: ສີສຸວັນ, ຮູບພາບ: #ຫນັງສືພິມເສດຖະກິດສັງຄົມ

แชร์