ຫຼວງພະບາງຖືກຢັ້ງຢືນເປັນຖິ່ນກຳເນີດຜ້າໄໝ

   ກະຊວງວິທະຍາສາດ ແລະເຕັກໂນໂລຊີ ໄດ້ຈັດພິທີມອບ-ຮັບ ໃບຢັ້ງຢືນຖິ່ນກຳເນີດຜ້າໄໝຫຼວງພະບາງໃຫ້ແກ່ສະມາຄົມສົ່ງເສີມຜ້າໄໝຫຼວງພະບາງຂຶ້ນວັນທີ 23 ກັນຍາ 2020 ນີ້ ທີ່ຫ້ອງປະຊຸມພະແນກກະສິກໍາ ແລະປ່າໄມ້ແຂວງໂດຍການເຂົ້າຮ່ວມຂອງທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ,ທ່ານ ສຸກັນ ບຸນຍົງ ຮອງເຈົ້າແຂວງຫຼວງພະບາງ, ມີຕາງກະຊວງ,ຫົວໜ້າກົມ ແລະພະແນກການກ່ຽວຂ້ອງຂອງແຂວງພ້ອມດ້ວຍສະມາຄົມສົ່ງເສີມຜ້າໄໝຫຼວງພະບາງເຂົ້າຮ່ວມ.

  ທ່ານ ນາງ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາກະຊວງວິທະຍາສາດ ແລະເຕັກໂນໂລຊີໄດ້ລາຍງານຜົນການຈັດຕັ້ງປະຕິບັດ ແລະການກະກຽມຈົດ ທະບຽນຖິ່ນກໍາເນີດຜ້າໄໝຫຼວງພະບາງໃນຕະຫຼອດໄລຍະຜ່ານມາພ້ອມທັງມອບໃບອະນຸຍາດນຳໃຊ້ກາໝາຍຖິ່ນກຳເນີດແຫ່ງຊາດໃຫ້ແກ່ສະມາຄົມສົ່ງເສີມຜ້າໄໝຫຼວງພະບາງຄຸ້ມຄອງຕາມພາລະບົດບາດທີ່ໄດ້ກໍານົດໄວ້ໃນລະບຽບຂອງສະມາຄົມ.

    ຈາກນັ້ນທ່ານລັດຖະມົນຕີກະຊວງວິທະຍາສາດ ແລະ ເຕັກໂນໂລຊີໄດ້ມີຄຳເຫັນຕໍ່ພິທີວ່າ: ການຈົດທະບຽນປົກປ້ອງຖິ່ນກຳເນີດຜ້າໄໝຫຼວງພະບາງແມ່ນແນໃສ່ປົກ ປ້ອງສື່ສຽງ ແລະອະນຸລັກຮັກສາເອກະລັກສະເພາະຂອງຊາວຫຼວງພະບາງທີ່ມີຄວາມສວຍສົດງົດງາມ,ຕິດພັນກັບວັດທະນະທຳ ແລະວິຖີການດໍາລົງຊີວິດຂອງຊາວຫຼວງພະບາງທີ່ມີມາແຕ່ດຶກດໍາບັນສືບທອດຕໍ່ກັນມາຫຼາຍເຊັ່ນຄົນຈົນມາຮອດປະຈຸບັນນີ້ທີ່ຍັງຮັກສາໄດ້ເອກະລັກດັ່ງກ່າວ.ພ້ອມນີ້ຍັງເປັນການປົກປ້ອງພູມປັນຍາທ້ອງຖິ່ນແບບດັ່ງເດີມທີ່ເປັນມູນມໍລະດົກທາງດ້ານວັດທະນະທຳໄດ້ສືບທອດຈາກບັນພະບູລຸດສູ່ຮຸ້ນຄົນປະຈຸບັນ ແລະອານຸລັກຮັກສາຕໍ່ກັນມາຢ່າງຍືນຍົງ.

   ການຈົດທະບຽນປົກປ້ອງຖິ່ນກຳເນີດຜ້າໄໝຫຼວງພະບາງໃນຄັ້ງນີ້ຈະເປັນການປະກອບສ່ວນອັນສຳຄັນເຮັດໃຫ້ເອກະລັກສະເພາະໄດ້ຮັບການປົກປັກຮັກສາ, ສົ່ງເສີມໃຫ້ເປັນທີ່ຮັບຮູ້ກວ້າງຂວາງທັງພາຍໃນ ແລະ ຕ່າງປະເທດເປັນທີ່ຍອມຮັບຂອງຜູ້ອຸປະໂພກຫຼາຍຂຶ້ນ ແລະ ເຮັດໃຫ້ຜ້າໄໝຫຼວງພະບາງມີມູນຄ່າສູງຂຶ້ນໄປຄຽງຄູ່ກັບການປົກປັກຮັກສາສະພາບແວດລ້ອມທາງທໍາມະຊາດຕາມທິດສີຂຽວ ແລະປົກປັກຮັກສາພູມ ປັນຍາທ້ອງຖິ່ນແບບດັ່ງເດີມ ທີ່ສື່ທອດ ກັນມາຈາກຫຼາຍເຊັ່ນຄົນໃຫ້ມີຄວາມຍືນຍົງຕະຫຼອດໄປ.ພ້ອມດຽວກັນນີ້ກໍ່ຈະເປັນການປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະເປັນການສ້າງຜົນງານເພື່ອຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ 8 ຂອງອົງຄະນະພັກແຂວງຫຼວງພະບາງທີຈະໄຂຂຶ້ນໃນມໍ່ໆນີ້.​

  ຈາກນີ້ ທ່ານ ສຸກັນ ບຸນຍົງ ກໍ່ໄດ້ມີຄຳເຫັນເນັ້ນໃຫ້ສະມາຄົມສົ່ງເສີມຜ້າໄໝຫຼວງພະບາງສືບຕໍ່ປະສານສົມທົບກັບພາກສ່ວນທີ່ກ່ຽວຂ້ອງເພື່ອອະນຸລັກຮັກສາ ແລະຊຸກ ຍູ້ສົ່ງເສີມວຽກງານດັ່ງກ່າວໃຫ້ມີການຂະຫຍາຍຕົວ ແລະຍືນຍົງ,ຕິດພັນກັນຮັກສາມູນເຊື້ອອັນດີງາມຂອງຊາວຫຼວງພະບາງນີ້ໄວ້ໃຫ້ ແລະພ້ອມກັນຂະຫຍາຍສະມາຊິກໄປແຕ່ລະເມືອງໃຫ້ທົ່ວເຖິງເອົາໃຈໃສ່ບໍລິຫານສະມາຄົມໃຫ້ມີຄວາມເຂັ້ມແຂງ, ໝັ້ນຄົງ ແລະຍືນຍົງ.

---------------

ຂ່າວ: ສີສຸວັນ 

ຮູບພາບ: #ຫນັງສືພິມເສດຖະກິດສັງຄົມ

แชร์