ການລ້ຽງງົວແບບເປັນຟາມຕິດພັນການຄ້າຂາຍພາໃຫ້ຄອບຄົວມີລາຍຮັບ 2,9 ຕື້ກີບຕໍ່ປີ

  ໂດຍອີງໃສ່ທີ່ຕັ້ງເງື່ອນໄຂທໍາມະຊາດທີ່ດິນອຸດົມສົມບູນເໝາະແກ່ການປູກຫຍ້າລ້ຽງສັດໃຫຍ່ບວກໃສ່ກັບຄວາມຮູ້ຄວາມສາມາດຄວາມດຸໝັ່ນຂະຫຍັນຄວາມຕ້ອງການຂອງຕະຫຼາດກໍຄືສັງຄົມໃນການບໍລິໂພກຊີ້ນຈຶ່ງບັນໂດນໃຈເຮັດໃຫ້ຄອບຄົວຂອງທ່ານ ສະໄໝ ສຸກກະເສີມ ຢູ່ບ້ານແກ່ນທ້າວ ເມືອງແກ່ນທ້າວ ແຂວງໄຊຍະບູລີ ມີແນວຄິດລິເລີ່ມລ້ຽງງົວແບບເປັນຟາມເພື່ອປ້ອນຕະຫຼາດປີໜຶ່ງສາມາດສ້າງລາຍຮັບຈາກການຂາຍງົວໄດ້ 187 ລ້ານກວ່າກີບ.

   ທ່ານ ສະໄໝ ສຸກກະເສີມ ສະມາຊິກສະພາປະຊາຊົນແຂວງ, ປະທານສະມາຄົມເກັບຊື້ ແລະສົ່ງອອກຜົນຜະລິດກະສິກໍາຄົບວົງຈອນເມືອງແກ່ນທ້າວໄດ້ເປີດເຜີຍໃນກອງປະຊຸມສະຫຼຸບຂະບວນການແຂ່ງຂັນຮັກຊາດ ແລະພັດທະນາທົ່ວແຂວງໄຊຍະບູລີທີ່ສໍາເລັດໄປຫວ່າງບໍ່ດົນມານີ້ໃນນາມຕົວແບບການລ້ຽງງົວແບບເປັນຟາມວ່າ:ການລິເລີ່ມລ້ຽງງົວແບບເປັນຟາມແມ່ນເລີ່ມແຕ່ປີ 2011 ເປັນຕົ້ນມາໃສ່ສວນຫຍ້າ 4 ຕອນ ມີເນື້ອທີ່ທັງໝົດ 100 ເຮັກຕາ, ໃນໄລຍະແຕ່ປີ 2011-2015 ມີງົວທັງ ໝົດ 105 ໂຕ,ສາຍພັນງົວບາຊິນ, ບາມັນ ແລະໄທໃຫຍ່ມາຮອດປະຈຸບັນນີ້ແມ່ນມີງົວທັງໝົດ 180 ໂຕ ໃນນີ້ມີງົວແມ່ພັນ 150 ໂຕ, ພໍ່ພັນ 8 ໂຕ, ການລ້ຽງໄລຍະຜ່ານມາແມ່ນລ້ຽງໃສ່ສວນ ຫຍ້າພັນລຸຊີແບ່ງເປັນລ໊ອກໝູນ ວຽນຜົນໄດ້ຮັບເມື່ອຂາຍອອກ ແມ່ນບໍ່ໄດ້ດີປານໃດເຮັດໃຫ້ບໍ່ໄດ້ ນໍ້າໜັກດີ, ຊີ້ນບໍ່ຫຼາຍ.

  ມາຮອດປີ 2018 ຈຶ່ງໄດ້ແບ່ງດິນມາທົດລອງປູກຫຍ້າພັນເນເປຍໃນເນື້ອທີ່ 5 ເຮັກຕາ, ມີລະບົບນໍ້າຫົດຫຍ້າທີ່ທັນສະໄໝດູດຈາກນໍ້າເຫືອງຂຶ້ນມາເຫັນວ່າການປູກຫຍ້າດັ່ງກ່າວແມ່ນໄດ້ຮັບຜົນດີໃຊ້ເວລາ 45-60 ວັນໄດ້ຕັດອອກ, ມີລົດຊອຍຫຍ້າແບບທັນສະໄໝຕັດ ແລະ ບົດພ້ອມ ແລະ ເຫັນວ່າສັດໂຕໃດທີ່ເໝາະສົມຈະນໍາອອກຂາຍກໍ່ຈະໄດ້ເອົາເຂົ້າຄອກທອມໄວ, ໃຫ້ອາຫານກິນເປັນເວລາ, ຫຍ້າບົດທີ່ໝັກ, ໃຫ້ນໍ້າແລະມີອາຫານປະສົມຂຸ້ນ, ການທອມຊຸດໜຶ່ງຈະມີ 30 ໂຕ ໃຊ້ເວລາທອມ 4-6 ເດືອນ ພາຍຫຼັງທອມແລ້ວສະເລ່ຍນໍ້າໜັກງົວໂຕໜຶ່ງປະມານ 350 ກິໂລ,ການຂາຍແມ່ນພໍ່ຄ້າພາຍໃນມາຮັບຊື້ເຮັດແບບນີ້ຈະເຮັດໃຫ້ສັດມີນໍ້າໜັກດີ,ມີຊີ້ນຫຼາຍ ຊຶ່ງເປັນທີ່ ຕ້ອງການຂອງຕະຫຼາດພາຍໃນ ແລະຕ່າງປະເທດ, ໃນປີໜຶ່ງຈະຂາຍງົວອອກ 30 ໂຕ ສັງລວມ ແລ້ວໃນໄລຍະ 5 ປີຜ່ານມາສາມາດນໍາງົວອອກຂາຍໄດ້ 150 ໂຕ ໄດ້ເງິນທັງໝົດ1 ຕື້ກວ່າກີບ.

   ທ່ານຍັງກ່າວຕື່ມວ່າ: ໃນການລ້ຽງສັດຂອດສໍາຄັນແມ່ນການຕິດຕາມກວດກາເຝົ້າລະວັງພະຍາດສັດຢ່າງເປັນປົກກະຕິ, ສັກຢາປ້ອງກັນພະຍາດປີໜຶ່ງ 2 ຄັ້ງ ຕໍ່ໂຕ, ສັກວັກຊິນກັນປາກເປືອຍລົງເລັບ ແລະເຕົ້າໂຮມເລືອດ, ເອົາໃຈໃສ່ຮັກສາສວນຫຍ້າບໍາລຸງຮັກສາທໍາຄວາມສະອາດບໍ່ໃຫ້ຮົກເຮື້ອ, ສວນໜຶ່ງແບ່ງອອກ 2-3 ຕອນ ແຕ່ລະຕອນໃຊ້ເວລາໃຫ້ງົວເຂົ້າກິນຫຍ້າ 7 ວັນ ຈຶ່ງໝູນອອກໄປຕອນໃໝ່,ນອກຈາກການລ້ຽງງົວແລ້ວຄອບຄົວຂອງເພິ່ນຍັງໄດ້ເຮັດທຸລະກິດບໍລິການຂາຍເຄື່ອງວັດສະດຸກໍ່ສ້າງແບບຄົບວົງຈອນເປັນຕົວແທນຈໍາໜ່າຍດ້ານແນວພັນສາລີຈາກປະເທດໄທເພື່ອສະໜອງໃຫ້ພໍ່ຄ້າຄົນກາງ ແລະ ຊາວກະສິກອນຢູ່ແຂວງໄຊຍະບູລີກໍ່ຄືເມືອງແກ່ນທ້າວ ພ້ອມຍັງໄດ້ເກັບຊື້ຜົນຜະລິດກະສິກໍາເຮັດນາປູກ ເຂົ້າ ໂດຍສັງລວມແລ້ວໃນປີໜຶ່ງ ຄອບຄົວຂອງເພິ່ນສາມາດສ້າງ ລາຍຮັບຈາກການລ້ຽງສັດຂາຍແບບເປັນຟາມຕິດພັນກັບການປູກຫຍ້າລ້ຽງການບໍລິການຄ້າຂາຍ ແລະຂາຍເຂົ້າໄດ້ທັງໝົດ 2,97 ຕື້ກີບ ສະເລ່ຍໃສ່ຫົວຄົນໜຶ່ງພາຍ ໃນຄອບຄົວໄດ້ 494 ລ້ານກີບ ຕໍ່ຄົນຕໍ່ປີໃນນີ້ລາຍຮັບຈາກການຂາຍງົວ 187 ລ້ານກວ່າກີບ,ລາຍຮັບຈາກການເກັບຊື້ພືດກະສິກໍາ ແລະສົ່ງອອກ 1,25 ຕື້ກີບ,ລາຍຮັບຈາກການຂາຍວັດສະດຸເຄື່ອງກໍ່ສ້າງ 1,5 ຕື້ກີບ ແລະລາຍຮັບຂາຍເຂົ້າ 30 ລ້ານກີບ.

  ນອກນີ້ຍັງໄດ້ຊຸກຍູ້ຊ່ວຍເຫຼືອພັກ-ລັດ ກໍຄືສັງຄົມລວມມູນຄ່າ 110 ລ້ານກີບ ແລະ ໃນຕໍ່ໜ້າຄອບຄົວຂອງເພິ່ນຈະຂະຫຍາຍຟາມທອມງົວຂະໜາດໃຫຍ່ ແລະ ໃຫ້ ເຂົ້າສູ່ລະບົບເຕັກນິກທີ່ທັນສະໄໝສາມາດຮັບຮອງງົວໃຫ້ໄດ້ 500 ໂຕຂຶ້ນໄປ,ສະນັ້ນບັນດາທ່ານໃດຊາວກະສິກອນຜູ້ມັກຮັກອາຊີບການລ້ຽງງົວຂາຍທີ່ຢາກໄດ້ບົດຮຽນ, ເຕັກນິກການປູກຫຍ້າ, ການລ້ຽງງົວແບບເປັນຟາມ ແລະການທອມງົວເພື່ອຈະຂາຍອອກມາສຶກສາຮໍ່າຮຽນນໍາທ່ານ ສະໄໝ ສຸກກະເສີມ ທ່ານພ້ອມແລ້ວທີ່ຖ່າຍທອດບົດຮຽນ ແລະໃຫ້ການຮ່ວມມືແກ່ພວກທ່ານສະເໝີ.

---------------

ຂຽນໂດຍ: ບຸນທີ

ຮູບພາບ: #ຫນັງສືພິມເສດຖະກິດສັງຄົມ

แชร์