ມ້າງກຸ່ມມົ້ວສຸມຢາເສບຕິດ 30 ຕິດ

ເຈົ້າໜ້າທີ່ ປກສ ນະຄອນໄກສອນ ພົມວິຫານ ໄດ້ມ້າງກຸ່ມແກ໋ງມົ້ວສຸມຢາ ເສບຕິດ ສາມາດກັກຕົວພວກມົ້ວສຸມໄດ້ 30 ຄົນ ໃນນີ້ມີພວກຖືກຂໍ້ຫາຄ້າຂາຍ ຢາເສບຕິດ 3 ຄົນ ພ້ອມຂອງກາງຢາບ້າ 210 ເມັດ.

ເຈົ້າໜ້າທີ່ ປກສ ນະຄອນໄກສອນ ພົມວິຫານ ໃຫ້ຮູ້ວ່າ: ໃນຄັ້ງວັນທີ 7 ກຸມພາຜ່ານມານີ້ໄດ້ຮັບການລາຍງານຈາກພົນລະເມືອງດີວ່າມີກຸ່ມຄົນບໍ່ດີເຄື່ອນໄຫວຄ້າຂາຍ ແລະ ມົ້ວສຸມຢາເສບຕິດຢູ່ຂອບເຂດບ້ານໂພໄຊ ນະຄອນໄກສອນພົມວິຫານ ຈາກ, ນັ້ນເຈົ້າໜ້າທີຈຶ່ງໄດ້ແຕ່ງຕັ້ງວິຊາສະເພາະລົງຕິດຕາມພິສູດແຫຼ່ງຂ່າວ ແລະເຫັນວ່າມີມູນຄວາມຈິງແທ້ດັ່ງນັ້ນ, ຈຶ່ງໄດ້ແຕ່ງຕັ້ງພະນັກງານວິຊາສະເພາະສົມທົບກັບອຳນາດການປົກຄອງບ້ານ ແລະ ພາກສ່ວນທີ່ກ່ຽວຂ້ອງລົງກວດກາ ແລະ ມ້າງຈຸດມົ້ວສຸມດັ່ງກ່າວຕົກມາຮອດເວລາປະມານ 10 ໂມງຂອງວັນດຽວກັນຈຶ່ງໄດ້ສະແດງຕົວເຂົ້າກວດຄົ້ນ ແລະກັກຕົວ ທ້າວ ປ໋ອງ ອາຍຸ 35 ປີ, ບ້ານໂພໄຊ, ເຊິ່ງເປັນເຈົ້າຂອງເຮືອນທີ່ເປັນບ່ອນຄ້າຂາຍ-ມົ້ວສຸມຢາເສບຕິດ, ຈາກການກວດຄົ້ນພົບເຫັນຢາເສບຕິດປະເພດຢາບ້າຈຳນວນ 188 ເມັດທີ່ຊຸກເຊື່ອງໄວ້ຂ້າງບ່ອນນອນຂອງຜູ້ກ່ຽວ ແລະໄດ້ກັກຕົວ ທ້າວ ເສັງເພັດ ຫຼື ຫຼ້າ ອາຍຸ 37 ປີ, ວ່າງງານຢູ່ບ້ານໂພນສະຫວ່າງໃຕ້ເຊິ່ງເປັນໝູ່ຂອງທ້າວ ປ໋ອງເຈົ້າຂອງເຮືອນ, ກວດຄົ້ນພົບເຫັນຢາບ້າຈຳນວນ 04 ເມັດ ຢູ່ໃນຖົງໂສ້ງດ້ານໜ້າຂ້າງຂວາ, ກັກຕົວທ້າວ ອະນຸສອນ ຫຼື ລັ່ງ ອາຍຸ 26 ປີວ່າງງານຢູ່ບ້ານໂພນສະຫວ່າງໃຕ້ກວດຄົ້ນພົບເຫັນຢາບ້າຈຳນວນ 18 ເມັດ ຢູ່ຖົງໂສ້ງໜ້າຂ້າງຊ້າຍ, ພວກກ່ຽວທັງສາມຄົນເປັນຄົນນະຄອນໄກສອນ ພົມວິຫານ ພ້ອມດຽວກັນນີ້ກໍ່ໄດ້ກັກຕົວພວກມົ້ວສຸມເສບຢາເສບຕິດຢູ່ຈຸດດັ່ງກ່າວຈໍານວນ 27 ຄົນ.

 ຕໍ່ກັບລາຍຄະດີດັ່ງກ່າວຍັງຢູ່ໃນຂັ້ນຕອນດຳເນີນການສຶບສວນ-ສອບສວນຂອງເຈົ້າໜ້າທີ່ສ່ວນກຸ່ມພວກມົ້ວສຸມຢາເສບຕິດທັງ 27 ຄົນ ແມ່ນທາງເຈົ້າໜ້າ ທີ່ຕຳຫຼວດ ປກສ ນະຄອນໄກສອນ ພົມວິຫານ ໄດ້ສຶກສາອົບຮົມ ແລະເຜີຍແຜ່ຜົນຮ້າຍຂອງຢາເສບຕິດກ່ອນປ່ອຍຕົວໃຫ້ຜູ້ປົກຄອງໃນວັນທີ 13 ກຸມພານີ້,  ໂດຍການເຜີຍແຜ່ເອກະສານຂອງ ທ່ານ ພັຕ ຄຳພູນ ຊອມບຸບຜາ ຮອງພະແນກຕຳຫຼວດ ປກສ ນະຄອນໄກສອນພົມວິຫານ, ມີພາກສ່ວນທີ່ກ່ຽວຂ້ອງພ້ອມຜູ້ປົກຄອງຂອງກຸ່ມມົ້ວສຸມດັ່ງກ່າວເຂົ້າຮ່ວມ.

แชร์