ສາລະວັນ ປະຊຸມຜູ້ບໍລິຫານການສຶກສາທົ່ວແຂວງ

   ກອງປະຊຸມຜູ້ບໍລິຫານການສຶກສາທົ່ວແຂວງສາລະວັນ, ຊຶ່ງໄດ້ຈັດຂຶ້ນເມື່ອອາທິດຜ່ານມາທີ່ຫ້ອງປະຊຸມສະໂມສອນວິທະຍາໄລຄູສາລະວັນໂດຍເປັນປະທານຂອງທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກີລາແຂວງ, ເປັນກຽດເຂົ້າຮ່ວມຂອງ ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນຜູ້ຊີ້ນຳວຽກງານ ວັດທະນະທຳ-ສັງຄົມ, ມີບັນດາທ່ານຫົວໜ້າພະແນກການ, ຮອງພະແນກການຕ່າງໆອ້ອມຂ້າງແຂວງ, ເຈົ້າເມືອງ, ຮອງເຈົ້າເມືອງ ແລະຫົວໜ້າຫ້ອງການສຶກສາ ທິການ ແລະກີລາເມືອງໃນ 8 ຕົວເມືອງເຂົ້າຮ່ວມ.

   ທ່ານ ວຽງແກ້ວ ຈັນເບັງແສງ ຫົວໜ້າຂະແໜງກວດກາ-ປະເມີນຜົນ ແລະປະກັນຄຸນນະພາບກໍ່ໄດ້ຂຶ້ນຜ່ານມະຕິກອງປະຊຸມຜູ້ບໍລິຫານການສຶກສາ ແລະກີລາທົ່ວ ແຂວງ, ກອງປະຊຸມຄັ້ງນີ້ກໍ່ໄດ້ຮັບຟັງການຜ່ານບົດລາຍງານຜົນສຳເລັດການຈັດຕັ້ງປະຕິບັດແຜນພັດທະນາການສຶກສາ ແລະກີລາສົກ ປີ 2019-2020 ແລະແຜນພັດທະນາການສຶກສາປະຈຳປີ 2020-2021, ມະຕິກອງປະຊຸມຜູ້ບໍລິຫານການສຶກສາ ແລະກີລາທົ່ວປະເທດປະຈຳສົກຮຽນ 2019-2020, ບົດຮຽນການສ້າງຕັ້ງກຸ່ມໂຮງຮຽນ, ບົດຮຽນການດັດສົມຄູ, ການແກ້ໄຂຄູອາສາສະໝັກ, ຄູຈ້າງຕາມສັນຍາ, ສະພາບນັກຮຽນປະລະໃນຊັ້ນປະຖົມ ແລະມັດທະຍົມ, ການເລື່ອນຂັ້ນແບບຕໍ່ ເນື່ອງ ແລະຫົວຂໍ້ອື່ນໆອີກທີ່ສຳຄັນຈຳນວນໜຶ່ງ, ຜ່ານການຄົ້ນຄວ້າ ແລະປະກອບຄຳຄິດເຫັນຕໍ່ເນື້ອໃນເອກະສານຕ່າງທີ່ໄດ້ສະເໜີມາກອງປະຊຸມກໍ່ໄດ້ເຫັນດີຮັບຮອງເອົາຄື: ເຫັນດີເປັນເອກະພາບຕໍ່ບົດລາຍງານຜົນການຈັດຕັ້ງປະຕິບັດແຜນພັດທະນາການສຶກສາ ແລະກີລາປະຈຳປີ 2019-2020 ແລະການຈັດຕັ້ງປະຕິບັດບັນດາຄາດໝາຍຈຳນວນ 15 ຄາດໝາຍທີ່ໄດ້ກໍານົດໃນມະຕິສະພາແຫ່ງຊາດ ແລະກໍ່ເຫັນໄດ້ວ່າມີ 3 ຄາດໝາຍທີ່ບັນລຸໄດ້ຕາມແຜນ ແລະມີ 5 ຄາດໝາຍທີ່ມີຄວາມກ້າວ ໜ້າເມື່ອທຽບໃສ່ສົກຮຽນປີຜ່ານມາ, ແຕ່ມີ 5 ຄາດໝາຍທີ່ບໍ່ສາມາດບັນລຸໄດ້ ແລະອີກ 2 ຄາດໝາຍແມ່ນຍັງລໍຖ້າຂໍ້ມູນທ້າຍປີ, ກອງປະຊຸມຍັງໄດ້ເຫັນດີປະຕິບັດມາດຕະການໃນການປ້ອງກັນໂຄວິດ-19 ຢ່າງເຂັ້ມງວດ ແລະໄດ້ເຫັນດີໃນການຂະຫຍາຍຕາໜ່າງການສຶກສາກ່ອນໄວຮຽນໃຫ້ກວ້າງຂວາງໂດຍສະເພາະແມ່ນຫ້ອງກຽມຊັ້ນປະຖົມຢູ່ບັນດາເມືອງທຸກຍາກແລະເຂດຫ່າງໄກສອກຫຼີກ.

   ພ້ອມນັ້ນກອງປະຊຸມຍັງໄດ້ເຫັນດີຮັບຮອງເອົາວຽກງານການສ້າງຕັ້ງ, ການພັດທະນາກຸ່ມໂຮງຮຽນ, ວຽກປັບປຸງຄຸນນະພາບໃນການສຶກສາຂັ້ນພື້ນຖານ,ການແກ້ໄຂ ປະລະການຮຽນໃນຊັ້ນປະຖົມ, ມັດທະຍົມ, ວຽກຝຶກອົບຮົມວິຊາຊີບ ແລະການກະກຽມຄວາມພ້ອມດ້ານຕ່າງໆ ເພື່ອເຂົ້າຮ່ວມການແຂ່ງຂັນກີລາແຫ່ງຊາດຄັ້ງທີ XI ທີ່ແຂວງຊຽຽຂວາງ ແລະ ກຽມຄວາມພ້ອມໃຫ້ແກ່ການຈັດການແຂ່ງຂັນກີລານັກຮຽນທົ່ວປະເທດຄັ້ງທີ VII ທີ່ແຂວງສາລະວັນເປັນເຈົ້າພາບ, ໂດຍມອບໃຫ້ພາກສ່ວນຕ່າງໆທີ່ກ່ຽວຂ້ອງເປັນຜູ້ປະສານສົມທົບໃນການຈັດຕັ້ງປະຕິບັດໃນແຕ່ລະໜ້າວຽກ, ເອົາໃຈໃສ່ການຊຸກຍູ້ຕິດຕາມກວດກາ, ການປະຕິບັດໜ້າທີ່ວຽກງານຂອງຜູ້ບໍລິຫານໂຮງຮຽນໃຫ້ທົ່ວເຖິງ, ພ້ອມກັນນັ້ນກອງປະຊຸມຍັງໄດ້ເຫັນດີບໍ່ໃຫ້ມີຮ້ານຂາຍເຄື່ອງໃນເດີ່ນໂຮງຮຽນແລະດ້ານນອກຕິດກັບຮົ້ວ,ຫ້າມນັກຮຽນເອົາໂທລະສັບສະມາດໂຟນມາໂຮງຮຽນ, ອະນຸຍາດໃຫ້ໃຊ້ແຕ່ລຸ້ນໃຊ້ໂທເທົ່ານັ້ນ ແລະຫ້າມນັກຮຽນທີ່ມີອາຍຸຕໍ່າກວ່າ 15 ປີຂີ້ລົດຈັກ-ລົດໃຫຍ່ມາໂຮງຮຽນ.

   ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນກໍ່ໄດ້ມີຄຳເຫັນໂອ້ລົມຊີ້ທິດເຍືອງທາງໃຫ້ຜູ້ເຂົ້າຮ່ວມໂດຍໄດ້ເນັ້ນໜັກໃຫ້ເອົາໃຈໃສ່ວຽກງານສຶກສາອົບການເມືອງແນວຄິດ, ແນວທາງນະໂຍບາຍຂອງພັກ-ລັດຕ້ອງເຂົ້າໃຈ ແລະກຳໃຫ້ມັນໄດ້ບໍ່ວ່າຈະເປັນວຽກງານການເມືອງການພັດທະນາເສດຖະກິດ-ສັງຄົມ ແລະ ອື່ນໆ, ຢາກພັດທະນາການສຶກສາກໍ່ຕ້ອງພັດທະນາຄູໃຫ້ມີຄຸນນະພາບ, ມີຄວາມຮູ້ຄວາມສາມາດ, ພ້ອມທັງຍົກລະດັບຄຸນນະພາບການສຶກສາໃນຂັ້ນທ້ອງຖິ່ນໃຫ້ສູງຂຶ້ນ, ເອົາໃຈໃສ່ຂະຫຍາຍຕາໜ່າງການສຶກສາໃຫ້ໄປເຖິງເຂດຫ່າງໄກສອກຫຼີກ, ປະຕິບັດຕາມ 5 ຫຼັກມູນຂອງການສຶກສາ ແລະຂັ້ນຕອນຕ່າງໆເພາະວ່າເດັກນ້ອຍໃນວັນນີ້ກໍ່ຄືຜູ້ໃຫຍ່ໃນວັນໜ້າ, ພ້ອມທັງປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງໜັກແໜ້ນ ແລະ ບຸກຄະລະກອນຕ່າງໆ, ນອກຈາກນັ້ນກໍ່ຕ້ອງໄດ້ເອົາໃຈໃສ່ໃນການເຝົ້າລະວັງພະຍາດໂຄວິດ-19, ພະຍາດໄຂ້ຍຸງລາຍ ແລະການສັກຢາປ້ອງກັນພະຍາດຕ່າງໃຫ້ບັນລຸຕາມແຜນ ແລະເອົາໃຈໃສ່ ໃນການກໍ່ສ້າງສະໜາມກີລາຂອງແຂວງ ແລະຮົ້ວອ້ອມເດີ່ນເພື່ອກຽມຄວາມພ້ອມໃນການເປັນເຈົ້າພາບຈັດງານກີລານັກຮຽນທົ່ວປະເທດ.

-------------

ຂຽນໂດຍ: ສິດຕາ ເພັດວົງສາ

แชร์