9 ເດືອນ ເມືອງນອງເກັບລາຍຮັບໄດ້ 628 ລ້ານກວ່າກີບ

  ວັນທີ 21 ກັນຍາ 2020 ທ່ານ ແສນສັກ ສຸລິສັກ ຫົວໜ້າພະແນກການເງິນ ແຂວງສະຫວັນນະເຂດ ພ້ອມດ້ວຍທີມງານລົງເຮັດວຽກປຶກສາຫາລືວຽກງານຕ່າງໆ ທີ່ເມືອງນອງທີ່ຫ້ອງປະຊຸມໃຫຍ່ຫ້ອງວ່າການປົກຄອງເມືອງນອງຊຶ່ງໃຫ້ການຕ້ອນຮັບຂອງທ່ານ ລຳແກ້ວ ແສງໜູທອງ ເລຂາພັກເມືອງເຈົ້ງເມືອງນອງພ້ອມດ້ວຍຄະ ນະປະຈຳພັກເມືອງ, ຫົວໜ້າຄະນະຫ້ອງການພ້ອມດ້ວຍພະນັກງານວິຊາການເຂົ້າຮ່ວມຢ່າງພ້ອມພຽງ.

  ທ່ານ ອານົງສັກ ນຽກວຽງສະຫວັນ ໄດ້ລາຍງານການຈັດຕັ້ງປະຕິບັດວຽກງານຕະຫຼອດໄລຍະຜ່ານມາຂອງຫ້ອງການໆເງິນເມືອງນອງວ່າ: ວຽກງານການຈັດເກັບ ລາຍຮັບເຂົ້າງົບປະມານແຫ່ງລັດຊຶ່ງລວມຍອດລາຍຮັບທັງໝົດຂອງແຜນປີ 1,87 ຕື້ກີບ,ປະຕິບັດໄດ້ໃນ 9 ເດືອນຜ່ານມາ 628 ລ້ານກວ່າກີບ ໃນນັ້ນຮັບຈາກສ່ວຍສາອາກອນ 1,32 ຕື້ກີບ, ປະຕິບັດໄດ້ 293 ລ້ານກວ່າກີບ, ຮັບຈາກທີ່ດິນ (ຄ່າຈົດທະບຽນ, ພາສີທີ່ດິນ) 410 ລ້ານກີບ, ປະຕິບັດໄດ້ 88 ລ້ານກວ່າກີບ, ຄ່າທຳນຽມ ຕ່າງໆ 85 ລ້ານກີບ, ປະຕິບັດໄດ້ 7 ລ້ານກວ່າກີບ, ລາຍຮັບຄ່າບໍລິການ, ວິຊາການ 75 ລ້ານກີບ, ປະຕິບັດໄດ້ 23 ລ້ານກວ່າກີບ.

  ຈາກນັ້ນກໍ່ໄດ້ເປີດໂອກາດໃຫ້ຄະນະຫ້ອງການອ້ອມຂ້າງເມືອງສະເໜີເຖິງວຽກງານທີ່ເຫັນວ່າອັນໃດທີ່ຍັງບໍ່ທັນໄດ້ສອດຄ່ອງກັບໜ້າວຽກຕົວຈິງໃນການຈັດຕັ້ງປະຕິບັດວຽກງານຜ່ານມາລະຫວ່າງແຂວງ ແລະເມືອງເພື່ອແລກປ່ຽນຖອກຖອນບົດຮຽນເຊິ່ງກັນ ແລະກັນ, ຮັບຟັງການລາຍງານແຜນພັດທະນາເສດຖະກິດ-ສັງຄົງ, ວິໄສທັດໃນການຈັດຕັ້ງປະຕິບັດວຽກງານ 5 ປີຕໍ່ໜ້າ.

 ໃນການລົງມາຢ້ຽມຢາມຄັ້ງນີ້ທ່ານ ແສນສັກ ສຸລິສັກ ຫົວໜ້າພະແນກການເງິນແຂວງໄດ້ໂອ້ລົມວຽກງານຫຼາຍໆດ້ານ ແລະທ່ານຍັງໄດ້ຮຽກຮ້ອງຕໍ່ບັນດາການນຳ, ພະ ນັກງານຫຼັກແຫຼ່ງຂອງເມືອງຈະຕ້ອງໄດ້ພ້ອມພາກັນຈັດຕັ້ງປະຕິບັດ 6 ບັນຫາທີ່ສຳຄັນຄື: ສູ້ຊົນສ້າງແຜນໃຫ້ສະຫວັນນະເຂດສ້າງແຜນກຸ້ມຕົນເອງທາງດ້ານງົບປະ ມານ, ສູ້ຊົນສ້າງຖານຂໍ້ມູນເກັບສະຖິຕິໃຫ້ໄດ້, ການຈັດເກັບລາຍຮັບຈັດເກັບພາສີທີ່ດິນໃຫ້ໄດ້, ກຳນົດເປົ້າໝາຍທີ່ຈະຮອງຮັບ ແລະກຳນົດລາຍຮັບທີ່ໝັ້ນຄົງ, ເມືອງກຸ້ມຕົນເອງທາງດ້ານງົບປະມານໂດຍໃຫ້ເມືອງຄຸ້ມຄອງຕົນເອງກຸ້ມຕົນເອງ ແລະ ສູ້ຊົນບຳລຸງສ້າງບຸກຄະລາກອນໃຫ້ມີຄວາມຮູ້ຄວາມສາມາດໃຫ້ພະນັກງານການເງິນ, ໂອ ກາດດັ່ງກ່າວທ່ານກໍ່ມີເຄື່ອງມອບໃຫ້ທາງການນໍາຂອງເມືອງຄື: ເຄື່ອງປິນເຕີ, ຊຸດກີລາ, ບານເຕະ ແລະອື່ນໆ ລວມມູນຄ່າ 6 ລ້ານກວ່າກີບ.

แชร์