ພົນລະເມືອງດີ ກັກຜູ້ກໍ່ເຫດຢັນລົດຈັກມາແລ້ວ 9 ຄັນ

  ໃນວັນທີ 18 ກໍລະກົດ 2020 ພົນລະເມືອງດີຢູ່ບ້ານໂພນສະຫວ່າງ ເມືອງຈັນທະບູລີ ນະຄອນຫຼວງວຽງຈັນ ໄດ້ຊ່ວຍກັນກັກຕົວ ທ້າວ ຫຼ້າຕຸ້ຍ ອາຍຸ 37 ປີ ອາຊີບກໍາມະກອນພັກເຊົາຢູ່ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ ທີ່ກໍ່ເຫດຈັບກ້ອນຫີນດຶກໃສ່ລົດກະບະທີ່ສັນຈອນໄປ-ມາຕາມເສັ້ນທາງເຂດບ້ານໂພນສະຫວ່າງໄວ້ໄດ້ທັນເຫດ, ຊຶ່ງປະຫວັດຜ່ານມາຜູ້ກ່ຽວໄດ້ກໍ່ເຫດຢັນລົດຈັກຂອງປະຊາຊົນທີ່ສັນຈອນຕາມເສັ້ນທາງມາແລ້ວ 9 ຄັນ, ປະຈຸບັນອໍານາດການປົກຄອງບ້ານໂພນ ສະຫວ່າງໄດ້ມອບຕົວຜູ້ກ່ຽວໃຫ້ໜ່ວຍງານສືບສວນ-ສອບສວນຄະດີອາຍາ-ເສດຖະກິດ ປກສ ເມືອງໄຊເສດຖາ ນະຄອນຫຼວງວຽງຈັນ ເພື່ອດໍາເນີນການສືບ ສວນ-ສອບສວນຕາມລະບຽບກົດໝາຍ.

  ເຈົ້າໜ້າທີ່ໜ່ວຍງານສືບສວນ-ສອບສວນຄະດີອາຍາ-ເສດຖະກິດ ປກສ ເມືອງໄຊເສດຖາ ໄດ້ເປີດເຜີຍວ່າ: ທ້າວ ຫຼ້າຕຸ້ຍ ໄດ້ໃຫ້ການຍອມຮັບວ່າ: ສາເຫດທີ່ຈັບກ້ອນຫີນດຶກໃສ່ລົດກະບະຄັນດັ່ງກ່າວ,ຍ້ອນຄິດວ່າເປັນລົດຂອງເຈົ້າໜ້າທີ່ຕໍາຫຼວດຂັບຂີ່ໄລ່ຕິດຕາມນໍາຈັບຕົນເອງເພາະວ່າຕົນເອງເສບຢາບ້າເຂົ້າໄປ 3 ເມັດ, ພາຍຫຼັງກໍ່ເຫດແລ້ວກໍມີຜູ້ທີ່ຢູ່ໃກ້ຄຽງທີ່ເຫັນເຫດການໄດ້ເຂົ້າມາຈັບຕົນເອງໄວ້.

  ທ້າວ ຫຼ້າຕຸ້ຍ ໄດ້ໃຫ້ການສາລະພາບອີກວ່າ: ຕົນເອງໄດ້ເສບຢາບ້າມາແຕ່ປີ 1999 ມາ ໂດຍເສບມື້ລະ 2-3 ເມັດ, ຈຶ່ງເປັນສາເຫດເຮັດໃຫ້ຕົນເອງມີແນວຄິດຢ້ານທຸກຄັ້ງທີ່ເຫັນລົດນໍາຫຼັງມາເພາະຄິດວ່າເປັນລົດຂອງເຈົ້າໜ້າທີ່ຕໍາຫຼວດແລະໄລຍະຜ່ານມາຕົນເອງໄດ້ກໍ່ເຫດຢັນລົດຈັກຜູ້ໃຊ້ລົດ-ໃຊ້ຖະໜົນຕາມເສັ້ນທາງມາແລ້ວ 9 ຄັ້ງລວມມີ 9 ຄັນ ເພາະຄິດວ່າເປັນລົດຂອງເຈົ້າໜ້າທີ່ຕໍາຫຼວດຂັບຂີ່ຕິດຕາມນໍາຈັບຕົນເອງຄື: ຄັ້ງທີ 1 ກໍ່ເຫດຢູ່ເຂດບ້ານໂຊກໃຫຍ່, ຄັ້ງທີ 2 ກໍ່ເຫດຢູ່ເຂດບ້ານໜອງໜ່ຽງ, ຄັ້ງທີ 3 ກໍ່ເຫດ ຢູ່ເຂດບ້ານວັງຊາຍ, ຄັ້ງທີ 4 ກໍ່ເຫດ ຢູ່ເຂດບ້ານໂພນພະເນົາ, ຄັ້ງທີ 5 ກໍ່ເຫດຢູ່ເຂດບ້ານໂພນຕ້ອງ, ຄັ້ງທີ 6 ກໍ່ເຫດຢູ່ເຂດບ້ານສິວິໄລ, ຄັ້ງທີ 7 ກໍ່ເຫດ ຢູ່ເຂດບ້ານດົງໂດກ, ຄັ້ງທີ 8 ກໍ່ເຫດຢູ່ເຂດເສັ້ນທາງ 450 ປີ, ຄັ້ງທີ 9 ກໍ່ເຫດຢູ່ເຂດບ້ານຊຽງດາ.

แชร์