ໄຊເສດຖາເຊື່ອມຊຶມດຳລັດປົກປ້ອງເງິນຝາກ

 ກອງປະຊຸມເຜີຍແຜ່ດໍາລັດວ່າດ້ວຍການປົກປ້ອງເງິນຝາກໃຫ້ແກ່ບັນດາອົງການຈັດຕັ້ງພັກ-ລັດ ແລະບັນດາບ້ານອ້ອມຂ້າງເມືອງໄຊເສດຖາ ນະຄອນຫຼວງວຽງຈັນ ຊຶ່ງໄດ້ຈັດຂຶ້ນໃນຕອນແລງຂອງວັນທີ 22 ກັນຍາ 2020 ທີ່ສະໂມສອນເມືອງດັ່ງກ່າວພາຍໃຕ້ການເປັນປະທານຮ່ວມຂອງ ທ່ານ ຄໍາສະຫວັນ ໂຄດໄຊ ກໍາມະການປະຈໍາພັກ-ຮອງເຈົ້າ ເມືອງໄຊເສດຖາ ແລະທ່ານ ນາງ ແສງດາວວີ ວົງຄໍາຊາວ ກໍາມະການພັກທະນາຄານແຫ່ງ ສປປ ລາວ, ຫົວໜ້າສໍານັກງານປົກປ້ອງເງິນຝາກ (ສປງ) ແລະພ້ອມນີ້ກໍ່ມີຄະນະພັກຂັ້ນຕ່າງໆ-ຄະນະນໍາຂອງເມືອງ, ບັນດາຂະແໜງການ-ໜ່ວຍງານ, ບັນດາບ້ານອ້ອມຂ້າງເມືອງໄຊເສດຖາພ້ອມດ້ວຍວິຊາການທີ່ ກ່ຽວຂ້ອງເຂົ້າຮ່ວມ.

 ກອງປະຊຸມເຜີຍແຜ່ໃນຄັ້ງນີ້, ທ່ານ ນາງ ດາວມະນີວອນ ວິໄລວຽງ ຮອງຫົວໜ້າ ສປງ ໄດ້ຍົກໃຫ້ເຫັນຄວາມເປັນມາຂອງສປງ (ກອງທຶນປົກປ້ອງຜູ້ຝາກເງິນໃນເມື່ອກ່ອນ) ຮັບການສ້າງຕັ້ງຂຶ້ນໃນວັນທີ 23 ກັນຍາ 1999 ເປັນການຈັດຕັ້ງການເງິນຂອງລັດ, ມີຖານະທຽບເທົ່າກົມ, ເປັນນິຕິບຸກຄົນທີ່ເຄື່ອນໄຫວໂດຍບໍ່ສະແຫວງຫາຜົນກໍາໄລ, ມີຄວາມເປັນເອກະລາດທາງດ້ານການເງິນ ແລະຢູ່ພາຍໃຕ້ການຄຸ້ມຄອງຂອງທະນາຄານແຫ່ງ ສປປ ລາວ ຊຶ່ງມີພາລະບົດບາດເປັນເສນາທິການໃຫ້ແກ່ສະ ພາບໍລິຫານ ສປງ ແລະທະນາຄານແຫ່ງ ສປປ ລາວ ໃນການປົກປ້ອງສິດຜົນປະໂຫຍດອັນຊອບທໍາຂອງຜູ້ຝາກເງິນເປັນສ່ວນໜຶ່ງທີ່ມີຄວາມສໍາຄັນໃນຕາໜ່າງຄວາມປອດໄພຂອງຂະແໜງການເງິນ ແລະວຽກງານສໍາຄັນອື່ນໆທີ່ຕິດພັນກັບຂະແໜງການທະນາຄານ ແລະສະຖາບັນການເງິນຢູ່ ສປປ ລາວ.

  ພ້ອມນັ້ນ, ຍັງນໍາສະເໜີຄວາມຈໍາເປັນຂອງການສ້າງດໍາລັດວ່າດ້ວຍການປົກປ້ອງເງິນຝາກຊຶ່ງເປັນການຍົກບົດບາດທາງດ້ານການຈັດຕັ້ງຂອງ ສປງ ໃຫ້ມີຄວາມໜັກແໜ້ນເຂັ້ມແຂງ; ສ້າງຄວາມເຊື່ອໝັ້ນໃຫ້ແກ່ສັງຄົມຕໍ່ລະບົບສະຖາບັນການເງິນ ແລະປະກອບສ່ວນເຂົ້າໃນການຮັກສາສະຖຽນລະພາບຂອງລະບົບສະຖາບັນການເງິນຢູ່ ສປປ ລາວ ແລະນອກນີ້ຍັງຍົກໃຫ້ເຫັນກົດລະບຽບວ່າດ້ວຍກອງທຶນປົກປ້ອງຜູ້ຝາກເງິນໃນເມື່ອກ່ອນໃນສະບັບເລກທີ 283/ທຫລ, ລົງວັນທີ 30 ສິງຫາ 1999 ທີ່ມີບາງມາດຕາຍັງມີຂໍ້ຈໍາກັດ ແລະ ບໍ່ສອດຄ່ອງກັບນິຕິກໍາອື່ນໆທີ່ກ່ຽວຂອງທັງພາຍໃນ ແລະ ສາກົນນອກນີ້ຍັງນໍາສະເໜີພາບລວມຂອງດໍາລັດວ່າດ້ວຍການປົກປ້ອງເງິນຝາກ ແລະເນື້ອໃນບາງມາດຕາທີ່ສໍາຄັນຈໍານວນໜຶ່ງ.

  ທ່ານ ນາງ ແສງດາວວີ ວົງຄໍາຊາວ ກໍາມະການພັກທະນາຄານແຫ່ງ ສປປ ລາວ, ຫົວໜ້າ ສປງ ໄດ້ຕີລາຄາສູງຕໍ່ໝາກຜົນສໍາເລັດໃນການເຊື່ອມຊຶມດໍາລັດໃນຄັ້ງນີ້ ແລະກໍ່ເປັນຄັ້ງທໍາອິດທີ່ດໍາລັດວ່າດ້ວຍການປົກປ້ອງເງິນຝາກໄດ້ນໍາມາຈັດຕັ້ງເຜີຍແຜ່ໃຫ້ອໍານາດການປົກຄອງທ້ອງຖິ່ນຮັບຊາບເຂົ້າໃຈ ແລະນໍາໄປຈັດຕັ້ງການເຜີຍແຜ່ໃຫ້ປະຊາຊົນບັນດາເຜົ່າຢູ່ບ້ານຂອງຕົນ ແລະ ຜ່ານການເຜີຍແຜ່ດໍາລັດສະບັບນີ້ແລ້ວເຊື່ອໝັ້ນວ່າ: ຈະເປັນການເພີ່ມຄວາມຮັບຮູ້ ແລະ ເຂົ້າໃຈຈະແຈ້ງຕໍ່ກັບວຽກງານການປົກປ້ອງເງິນຝາກ, ການປົກປ້ອງສິດ ແລະຜົນປະໂຫຍດອັນຊອບທໍາຂອງຜູ້ຝາກເງິນທັງປະກອບສ່ວນສ້າງຄວາມເຊື່ອໝັ້ນໃຫ້ແກ່ຜູ້ຝາກເງິນຕໍ່ລະບົບສະຖາບັນການເງິນຢູ່ ສປປ ລາວ ນັບມື້ສູງຂຶ້ນ.

-------------

ຂ່າວ: ຣັດສະໝີ ດວງສັດຈະ

ຮູບພາບ: #ຫນັງສືພິມເສດຖະກິດສັງຄົມ

แชร์