ພະຍາດອະຫິວາໝູລະບາດທີ່ຊຽງຮ່ອນ

  ໃນລະຫວ່າງວັນທີ 21-23 ກັນຍາ 2020 ນີ້ ພະແນກກະສິກຳ ແລະປ່າໄມ້ ແຂວງໄຊຍະບູລີ ໄດ້ລົງສົມທົບກັບຫ້ອງການກະສິກຳ ແລະປ່າໄມ້ເມືອງຊຽງຮ່ອນໄດ້ລົງເກັບກຳຈຳນວນຜູ້ລ້ຽງໝູ ແລະ ທຳລາຍໝູທີ່ຕິດເຊື້ອພະຍາດອະຫິວາໝູອາຟຣິກາຢູ່ 2 ບ້ານຄື: ບ້ານແກ່ນ ແລະ ບ້ານສາມັກຄີໄຊເມືອງຊຽງຮ່ອນ ແຂວງໄຊຍະບູລີ ພາຍຫຼັງທີ່ໄດ້ຮັບຜົນກວດເລືອດ ແລະສີ້ນສ່ວນຂອງໝູຢູ່ 2 ບ້ານດັ່ງກ່າວຈາກສູນວິໄຈພະຍາດສັດກະຊວງກະສິກຳ ແລະປ່າໄມ້ພົບວ່າສີ້ນສ່ວນດັ່ງກ່າວກວດກາພົບເຫັນເຊື້ອໄວຣັດພະຍາດອະຫິວາໝູອາຟຣິກາໃນຄັ້ງວັນທີ 16 ກັນຍາ 2020 ຜ່ານມາ ປະຈຸບັນວິຊາການໄດ້ລົງເກັບກຳຂໍ້ມູນການລະບາດຂອງພະຍາດພະຍາດດັ່ງກ່າວໄດ້ແຜ່ລາມໄວທີ່ສຸດ ແລະ ແຜ່ລາມແລ້ວ 13 ບ້ານພາຍໃນເມືອງ ຊຽງຮ່ອນຄື: ບ້ານແກ່ນ, ບ້ານສາມັກຄີໄຊ, ບ້ານດອນເຟືອງ, ບ້ານຂິ່ງ, ບ້ານລາວສະໂນ,ບ້ານນໍ້າກອກ,

ບ້ານນາອອນ,ບ້ານຫົວນາ,ບ້ານດົງ, ບ້ານຫ້ວຍຮາກ, ບ້ານຊ້າງ, ບ້ານຄໍ້າ ແລະບ້ານນໍ້າຄ່ອມມີໝູຕາຍທັງໝົດ 195 ໂຕ ປະຈຸບັນທາງວິຊາການສັດຕະວະແພດ ແລະການນຳຂັ້ນເມືອງໄດ້ລົງລະດົມແນວຄິດຜູ້ທີ່ລ້ຽງໝູໃຫ້ການຮ່ວມມືກັບວິຊາການ ແລະອອກນິຕິກຳຕ່າງໆເພື່ອເປັນການສະກັດກັ້ນການແຜ່ລາມອອກເປັນວົງກວ້າງພ້ອມທັງທຳລາຍໝູທີ່ຕິດເຊື້ອຢູ່ບ້ານແກ່ນຈຳນວນ 216 ໂຕ ນໍ້າໜັກ 5.393 ກິໂລກຣາມ ແລະບ້ານສາມັກຄີໄຊ ຈໍານວນ 31 ໂຕ ນໍ້າໜັກ 804 ກິໂລກຣາມ ລວມມູນຄ່າໝູທີ່ທຳລາຍທັງໝົດ 200 ລ້ານກວ່າກີບ, ໄລຍະຜ່ານມາເຫັນວ່າອຳນາດການປົກຄອງບ້ານ ແລະຂະແໜງການທີ່ກ່ຽວຂ້ອງຂັ້ນເມືອງເປັນຕົ້ນແມ່ນຫ້ອງການກະສິກຳ ແລະປ່າໄມ້ໄດ້ເອົາໃຈໃສເຝົ້າລະວັງ ແລະສະກັດກັ້ນການລະບາດຂອງພະຍາດສັດເນື່ອງຈາກສະພາບດິນຟ້າອາກາດມີການປ່ຽນແປງກະທັນຫັນສັດລ້ຽງມີການຂາດແຄນອາຫານເຈົ້າຂອງສັດຈຳນວນໜຶ່ງຍັງຖືເບົາຕໍ່ການຮັກສາສຸຂະພາບສັດຂອງຕົນເອງ, ຜູ້ປະກອບການບາງພາກສ່ວນບໍ່ໄດ້ເອົາໃຈໃສ່ຕໍ່ການປະຕິບັດຕາມການຄຸ້ມຄອງການເຄື່ອນຍ້າຍສັດ ແລະ ຜະລິດຕະພັນສັດທີ່ວາງອອກຍັງມີການການຊື້ສັດມາຈາກບ່ອນທີ່ມີການລະບາດຂອງພະຍາດຈຶ່ງເປັນສາເຫດໃຫ້ມີການລະບາດຂອງພະຍາດເກີດ ຂຶ້ນ.

-------------

ຂ່າວ: ດອນຂຽວພະນາ

ຮູບພາບ: #ຫນັງສືພິມເສດຖະກິດສັງຄົມ

แชร์