ນະຄອນຫຼວງວຽງຈັນ ສ້າງບ້ານວັດທະນະທຳໄດ້ 95,04%

  ຕະຫຼອດໃນໄລຍະຜ່ານມາ, ຂະແໜງວັດທະນະທໍານະຄອນຫຼວງວຽງຈັນ (ນວ) ໄດ້ເອົາໃຈໃສ່ໃນການສ້າງບ້ານ ແລະຄອບຄົວວັດທະນະທໍາ, ຊຶ່ງມາຮອດປະຈຸບັນທົ່ວນະຄອນຫຼວງວຽງຈັນ ສາມາດສ້າງຄອບຄົວວັດທະນະທຳໄດ້ 86,63% ທຽບໃສ່ແຜນການທີ່ວາງໄວ້ 95%, ສ້າງບ້ານວັດທະນະທຳໄດ້ 95,04% ຊຶ່ງປະຕິບັດໄດ້ລື່ນແຜນການທີ່ວາງໄວ້.

 ອີງຕາມຂໍ້ມູນຈາກພະແນກຖະແຫຼງຂ່າວວັດທະນະທໍາ ແລະທ່ອງທ່ຽວນະຄອນຫຼວງວຽງຈັນ ໃຫ້ຮູ້ວ່າ: ວຽກງານການສ້າງຄົນ, ຄອບຄົວ, ບ້ານ, ກຸ່ມບ້ານ, ກົມກອງວັດທະນະທໍາແມ່ນອີງໃສ່ 5ມາດຖານເງື່ອນໄຂຂອງຄອບຄົວວັດທະນະທໍາເຊັ່ນ: ຕ້ອງມີເຮືອນຢູ່ເປັນຂອງຕົນເອງແຕ່ເຄິ່ງຖາວອນຂຶ້ນໄປ,ມີອາຊີບໝັ້ນທ່ຽງຖືກຕ້ອງຕາມກົດໝາຍ ແລະກຸ້ມກິນຕ້ອງເປັນຄອບຄົວສາມັກຄີຖືກຕ້ອງປອງດອງກັນສະເໝີພາບ ແລະບໍ່ສ້າງຄວາມຫຍຸ້ງຍາກໃຫ້ແກ່ອໍານາດການປົກຄອງ, ຕ້ອງເອົາໃຈໃສ່ລ້ຽງລູກໃຫ້ຖືກຫຼັກອະນາໄມອົບຮົມສັ່ງສອນລູກເປັນຄົນມີຄວາມກະຕັນຍູຕໍ່ຜູ້ມີພະຄຸນ ແລະສົ່ງລູກໃຫ້ໄດ້ສຶກສາຮໍ່າຮຽນ; ຕ້ອງເປັນຄອບຄົວທີ່ດໍາລົງຊີວິດປອດໃສຂາວສະອາດບໍ່ເຊື່ອຖືງົມງວາຍ, ຮັກສາວັດທະນະທໍາຮີດຄອງປະເພນີອັນດີງາມຂອງຊາດ ແລະນັບຖືລະບຽບກົດໝາຍ; ຕ້ອງເປັນຄອບຄົວທີ່ມີຄວາມສາມັກຄີຊ່ວຍເຫຼືອເພື່ອແຜ່ເຊິ່ງກັນ ແລະກັນພາຍໃນບ້ານປະກອບສ່ວນສາທາລະນະປະໂຫຍດຂອງບ້ານເມືອງ.

  ຜ່ານການຈັດຕັ້ງປະຕິບັດສ້າງຄອບຄົວ ແລະບ້ານວັດທະນະທໍານັບແຕ່ປີ 2016-2020 ທົ່ວນະຄອນຫຼວງວຽງຈັນສາມາດສ້າງຄອບຄົວວັດທະນະທຳໄດ້86,63% ທຽບໃສ່ແຜນການທີ່ວາງໄວ້ 95%, ສ້າງບ້ານວັດທະນະທຳໄດ້ 95,04% ຊຶ່ງປະຕິບັດໄດ້ລື່ນແຜນການທີ່ວາງໄວ້; ໄດ້ສຳເລັດການຕິດຕັ້ງໂທລະໂຄ່ງໃຫ້ 23 ບ້ານ ແລະສຳລັດໂຄງການກໍ່ສ້າງສະຖານີໂທລະພາບ ນວ ປີ 2017 ທີ່ສາມາດກະຈາຍໄປທົ່ວປະເທດ ແລະປະເທດໃກ້ຄຽງຈໍານວນໜຶ່ງ, ນອກຈາກນີ້ຍັງສາມາດດຶງດູດນັກທ່ອງທ່ຽວເຂົ້າມາທ່ຽວນະຄອນຫຼວງວຽງຈັນສະເລ່ຍໄດ້ 1 ລ້ານກວ່າຄົນຕໍ່ປີທຽບໃສ່ແຜນການປະຕິບັດໄດ້ 84,90% ສະເລ່ຍລາຍຮັບຈາກນັກທ່ອງທ່ຽວໄດ້ໜຶ່ງຮ້ອຍກວ່າລ້ານໂດລາຕໍ່ປີທຽບໃສ່ແຜນການປະຕິບັດໄດ້ 72,81%.

แชร์