ລະຄອນເພັງ ເລີ່ມຂື້ນທະບຽນພະພຸດທະຮູບທີ່ວັດພະບາດນາດູ່

   ໃນວັນທີ 22 ກັນຍາ 2020 ນີ້, ທ່ານ ມະໄລວອນ ສີປະເສີດ ຮັກສາການຫົວໜ້າພະແນກຖະແຫຼງຂ່າວ, ວັດທະນະທຳແລະທ່ອງທ່ຽວແຂວງສາລະວັນໄດ້ລົງຕິດ ຕາມການຂຶ້ນທະບຽນພະພຸດທະຮູບຢູ່ທີ່ວັດພະບາດນາດູ່, ໃຫ້ກຽດເຂົ້າຮ່ວມໂດຍມີທ່ານຮອງເຈົ້າເມືອງຜູ້ຊີ້ນຳວຽກງານວັດທະນະທຳ-ສັງຄົມ, ເຈົ້າອະທິການວັດພ້ອມດ້ວຍພາກສ່ວນຕ່າງໆ ທີ່ກ່ຽວຂ້ອງຕະຫຼອດຮອດນາຍບ້ານ, ອົງການຈັດຕັ້ງຂັ້ນບ້ານ, ປກຊ-ປກສ ແລະພໍ່ແມ່ປະຊາຊົນເຂົ້າຮ່ວມ.

   ທ່ານ ແກ້ວປະສິດ ຊິນນະຈັກ ຮັກສາການຫົວໜ້າຂະແໜງວິຈິດສິນ ແລະມໍລະດົກກໍ່ໄດ້ລາຍງານກ່ຽວກັບແຜນເຄື່ອນໄຫວລົງເກັບກຳຂໍ້ມູນຂຶ້ນບັນຊີພະພຸດທະຮູບ ແລະວັດຖຸທີ່ມີຄ່າວັດພະບາດນາດູ່ເມືອງລະຄອນເພັງ, ຊຶ່ງການລົງເຄື່ອນໄຫວຄັ້ງນີ້ແມ່ນໄດ້ປະຕິບັດຕາມກົດໝາຍວ່າດ້ວຍມໍລະດົກແຫ່ງຊາດສະບັບປັບປຸງເລກທີ 44/ສພຊ ລົງວັນທີ 24 ທັນວາ2013 ແລະອີງຕາມຂໍ້ຕົກລົງຂອງກະຊວງ ຖວທ ວ່າດ້ວຍການຈັດຕັ້ງ ແລະການເຄື່ອນໄຫວຂອງພະແນກ ຖວທ ແຂວງສາລະວັນ ເລກທີ

1491/ຖວທ. ເພື່ອເປັນການປົກປັກຮັກສາມໍລະດົກຂອງຊາດກໍ່ຄືຂອງທ້ອງຖິ່ນໄວ້ບໍ່ໃຫ້ຕົກເຮ່ຍເສຍຫາຍໄປ, ໄວ້ໃຫ້ເຊັນລູກ-ຫຼານ ແລະຮຸ້ນຕໍ່ໆໄປໄດ້ເຄົາລົບ, ສັກກະ ລະບູຊາເປັນທີ່ເພີ່ງທາງດ້ານຈິດໃຈ ແລະໄວ້ເປັນສີ່ງສັກສິດຄູ່ບ້ານຄູ່ເມືອງຕະຫຼອດໄປ, ການຂຶ້ນທະບຽນແມ່ນຈະໄດ້ເຮັດຢ່າງລະອຽດ, ພ້ອມທັງມີການບັນທຶກພາບພະພຸດທະຮູບແຕ່ລະອົງເພື່ອຕິດໃສ່ແບບຟອມ ແລະເກັບກຳຂໍ້ມູນປະຫວັດ, ປະເມີນອາຍຸ, ວັດແທກຂະໜາດ, ສັ່ງນຳໜັກຂອງພະພຸດທະຮູບແຕ່ລະອົງ,ພາຍຫຼັງທີ່ສຳເລັດກໍ່ຈະໄດ້ມີການສຳເນົານຳແຕ່ລະພາກສ່ວນທີ່ກ່ຽວຂ້ອງ, ການລົງເກັບກຳຂຶ້ນທະບຽນບັນຊີພະພຸດທະຮູບຢູ່ທີ່ວັດພະບາດນາດູ່ຄັ້ງນີ້ແມ່ນຈະໃຊ້ເວລາ 2 ອາທິດຈຶ່ງຈະສຳ ເລັດ ແລະເປັນແຫ່ງທີ 2 ຂອງແຂວງ, ພາຍຫຼັງໄດ້ສຳເລັດການຂຶ້ນທະບຽນພະພຸດທະຮູບແລ້ວຢູ່ວັດສີມຸງຄຸນ (ວັດກາງ) ເມືອງ ແລະແຂວງສາລະວັນ.

  ທ່ານ ບຸນປອນ ອິນທະສອນ ຮອງຫົວໜ້າພະແນກ ຖວທ ແຂວງໄດ້ໃຫ້ສຳພາດວ່າ: ຈຸດປະສົງຫຼັກທີ່ສຳຄັນອີກອັນໜຶ່ງໃນການຂຶ້ນທະບຽບບັນຊີພະພຸດທະຮູບແຫ່ງນີ້ເພື່ອກຽມຮັບຮອງເອົາວັດພະບາດນາດູ່ເປັນມໍລະດົກຂັ້ນທ້ອງຖິ່ນກໍ່ຄືຂອງແຂວງ ແລະເພື່ອເປັນຮັບປະກັນໃນເມື່ອວັດຖຸທີ່ມີການຕົກເຮ່ຍເສຍຫາຍຈະສາມາດນຳ ແລະທວງຄືນໄດ້ເພາະວ່າໄດ້ຂຶ້ນບັນຊີແລ້ວ, ນອກນັ້ນພາຍໃນວັດດັ່ງກ່າວກໍ່ຈະໄດ້ຈັດແບ່ງເປັນເຂດພັດທະນາ, ຂອບເຂດອະນຸລັກຮັກ ແລະ ເຂດຫວງຫ້າມເພື່ອສະດວກໃນການຄຸ້ມຄອງຈັດສັນ ແລະພັດທະນາດ້ານຕ່າງໆ, ພ້ອມນັ້ນກໍ່ຍັງຈະໄດ້ມີການສຳຫຼວດ, ສະນິຖານວັດຖຸຕ່າງໆທີ່ມີຢູ່ໃນວັດເປັນຕົ້ນ: ວັດຖຸທີ່ມີອາຍຸແຕ່ 50 ປີຂຶ້ນໄປຈະໄດ້ຂຶ້ນບັນຊີ້ເປັນມໍລະດົກຂັ້ນທ້ອງຖິ່ນ, ໂດຍສະເພາະແມ່ນຮອຍພະບາດ ແລະຮອຍສັງກະລີວ່າມີອາຍຸຈັກປີກໍ່ຍັງບໍ່ທັນຮູ້.

-------------

ຂ່າວ: ສິດຕາ ເພັດວົງສາ

ຮູບພາບ: #ຫນັງສືພິມເສດຖະກິດສັງຄົມ

แชร์