ໂຮງງານຊີມັງຄອນຈ໌ ຫຼວງພະບາງສາມາດຜະລິດຊີມັງ 3 ພັນໂຕນຕໍ່ມື້

 ໂຮງງານຊີມັງຄອນຈ໌ ແຂວງຫຼວງພະບາງ ໄດ້ສ້າງຕັ້ງຂຶ້ນໃນວັນທີ 24 ເດືອນເມສາ 2015 ຊຶ່ງຕັ້ງຢູ່ເຂດຜາແດງໄປທາງເມືອງໂພນໄຊ, ເປັນໂຮງງານອີກແຫ່ງໜຶ່ງໃນການຜະລິດຊີມັງທີ່ໄດ້ມາດຕະຖານອອກຮັບໃຊ້ສັງຄົມ, ມີກໍາລັງການຜະລິດແມ່ນ 3.000 ໂຕນຕໍ່ມື້ ລວມເຖິງການຊ່ວຍສ້າງວຽກເຮັດງານທໍາໃຫ້ກັບປະຊາຊົນລາວໂດຍສະເພາະກໍແມ່ນຊາວຫຼວງພະບາງປະຈຸບັດມີພະນັກງານຄົນລາວເຮັດວຽກຢູ່ໂຮງງານແຫ່ງນີ້ທັງໝົດ 223 ຄົນ.

   ທ່ານ ຫຼີ ຈຸ້ນ (LI JUN) ຜູ້ອໍານວຍການໃຫຍ່ໂຮງງານຊີມັງຄອນຈ໌ ຫຼວງພະບາງ ຈໍາກັດ ໄດ້ໃຫ້ສໍາພາດຕໍ່ທີມຂ່າວພວກເຮົາວ່າງບໍ່ດົນນີ້ວ່າ: ນັບແຕ່ໄດ້ສ້າງຕັ້ງໂຮງງານຊີມັງຂຶ້ນໃນວັນທີ 24 ເດືອນເມສາ 2015 ກໍໄດ້ຕັ້ງໜ້າໃສ່ໃນການຜະລິດຊີມັງເພື່ອສະໜອງໃຫ້ກັບສັງຄົມຢ່າງເປັນປົກກະຕິ, ວັດຖຸດິບທີ່ນໍາເຂົ້າໃນການຜະ ລິດຂອງໂຮງງານທັງໝົດແມ່ນຊື້ຢູ່ພາຍໃນປະເທດລາວ, ຖ່ານຫີນສ່ວນໃຫຍ່ແມ່ນນໍາເຂົ້າ ຈາກປະເທດ 60% ແລະ 40% ແມ່ນຊື້ຢູ່ພາຍໃນປະເທດລາວ, ກໍາລັງການຜະລິດກະຣິນເກີ້ແມ່ນ 2.500 ໂຕນຕໍ່ມື້, ກໍາລັງການຜະລິດຊີມັງແມ່ນ 3.000 ໂຕນຕໍ່ມື້, ຜະລິດຕະພັນຊີມັງແມ່ນໄດ້ຕາມມາດຕະຖານຂອງຈີນ ແລະຂອງອາເມລິກາສາມາດສະໜອງຕາມຄວາມຕ້ອງການໂຄງການກໍ່ສ້າງສໍາຄັນຕ່າງໆຢູ່ລາວໂດຍສະເພາະແມ່ນຢູ່ພາກເໜືອຂອງລາວ ແລະພາຍຫຼັງທີ່ເສັ້ນທາງລົດໄຟ ລາວ-ຈີນໄດ້ເປີດບໍລິການນໍາໃຊ້ແລ້ວທາງບໍລິສັດຍັງມີແຜນຈະສົ່ງຜະລິດຕະພັນຊີມັງຄອນຈ໌ ໄປຈີນຕື່ມອີກ, ຄຽງຄູ່ໄປກັບການຜະລິດຊີມັງທາງໂຮງງານແມ່ນໄດ້ຍົກສູງຄວາມສໍາຄັນໃນການປົກປັກຮັກສາສິ່ງແວດລ້ອມຢ່າງເຂັ້ມງວດຢູ່ພາຍໃນໂຮງງານ, ໄດ້ມີການລົງທຶນໃສ່ໃນການປົກປັກຮັກສາສິ່ງແວດລ້ອມໄດ້ກວມເອົາ 30% ໃນການລົງທຶນຂອງບໍລິສັດ, ສໍາລັບອາຍແກສ, ຂີ້ຝຸ່ນ ແລະສຽງດັງທີ່ເກີດຈາກການຜະລິດບໍລິສັດໄດ້ໃຊ້ມາດຕະຖານແກ້ໄຂ ແລະຫຼຸດຜ່ອນຜົນກະທົບສູ່ພາຍນອກ, ການລະເບີດຂຸດຄົ້ນແຮ່ແມ່ນແບ່ງເປັນຂັ້ນຕອນໂດຍຂຸດຄົ້ນແຕ່ຊັ້ນເທິງລົງຫາຊັ້ນລຸ່ມ, ການລະເບີດແມ່ນ ໃຊ້ວິທີລະເບີດແບບເລື່ອນວິລິບດາ, ບໍ່ມີຄວາມສະເທືອນ, ບໍ່ມີຫີນປີວ ແລະບໍ່ມີຂີ້ ຝຸ່ນລະອອງ.

  ທ່ານຜູ້ອໍານວຍການກ່າວຕື່ມອີກວ່າທາງບໍລິສັດຈະພະຍາຍາມສ້າງໂຮງງານໃຫ້ເປັນໂຮງງານຊີມັງແບບຢ່າງຂອງລາວຊຶ່ງທາງໂຮງງານກໍາລັງປູກຕົ້ນໄມ້ ແລະເຮັດສວນດອກໄມ້ແບບສີຂຽວຢູ່ຂອບເຂດການຜະລິດທີ່ນັບມືມີຄວາມສວຍງາມຂຶ້ນ ແລະ ໄດ້ສ້າງໂອກາດໃຫ້ກັບປະຊາຊົນໄດ້ມີວຽກເຮັດງານທໍາຢູ່ໃນໂຮງງານຊີມັງແຫ່ງນີ້ 81% ແມ່ນຄົນລາວ ແລະອີກ 5 ປີຂ້າງໜ້າທາງບໍລິສັດມີແຜນຈະເພີ່ມອັດຕາພະນັກງານລາວຮອດ 95% ໝາຍຄວາມວ່ານອກຈາກຕໍາແໜ່ງເຕັກນິກທີ່ສໍາຄັນ ແລະ ຜູ້ບໍລິຫານບໍລິສັດແລ້ວສ່ວນຕໍາແໜ່ງອື່ນໆ ທັງໝົດຈະເປັນຄົນລາວ, ພ້ອມນີ້ທາງບໍລິສັດກໍຄືໂຮງງານຊີມັງຍັງໄດ້ປະກອບສ່ວນຊ່ວຍເຫຼືອສັງຄົມລວມເຖິງການໃຫ້ບູລິມະສິດໃນການຊື້ຜະລິດຕະພັນກະສິກໍາຊາວບ້ານອ້ອມຂ້າງໂຮງງານເພື່ອສົ່ງເສີມລາຍໄດ້ໃຫ້ກັບປະຊາຊົນ ແລະໄດ້ສ້າງຂົວ, ເສັ້ນທາງເພື່ອອໍານວຍຄວາມສະດວກໃນການສັນ ຈອນໄປມາຂອງຊາວບ້ານຕື່ມອີກ.

   ສໍາລັບໃນຊ່ວງເກີດການລະບາດເຊື້ອພະຍາດໂຄວິດ-19 ນີ້ທາງໂຮງງານຊີມັງກໍໄດ້ພົບຄວາມຫຍຸ້ງຍາກພໍສົມຄວນເນື່ອງຈາກທົ່ວໂລກແມ່ນໄດ້ຮັບຜົນກະທົບລວມເຖິງປະເທດລາວກໍເປັນປະເທດໜຶ່ງທີ່ຖືກຜົນກະທົບ, ບັນດາໂຄງການກໍ່ສ້າງພື້ນຖານໂຄງລ່າງຕ່າງໆຢູ່ລາວຍັງບໍ່ທັນໄດ້ດໍາເນີນເປັນປົກກະຕິ, ຄວາມຕ້ອງການຕະຫຼາດຊີມັງຍັງບໍ່ຫຼາຍປີນີ້, ອີກຢ່າງທາງລັດຖະບານລາວໄດ້ປິດດ່ານ ແລະຄຸ້ມຄອງການໄປມາຫາສູ່ກັນຂອງປະຊາຊົນຢ່າງເຂັ້ມງວດສະນັ້ນວິຊາການເຕັກນິກຂອງປະເທດຈີນເຂົ້າມາ ຊ່ວຍວຽກມີຄວາມຫຍຸ້ງຍາກ ແລະການນໍາເຂົ້າອຸປະກອນໄດ້ໃຊ້ເວລາດົນ.

__________

ຂ່າວ: ສີສຸວັນ

ຮູບພາບ: #ຫນັງສືພິມເສດຖະກິດສັງຄົມ

แชร์