ໂຮງຮຽນທິດສະດີການເມືອງ ຫົວພັນປິດຊຸດຮຽນ

   ວັນທີ 18 ກັນຍາ ຜ່ານມາ ໂຮງຮຽນທິດສະດີການເມືອງ ແລະການປົກຄອງແຂວງຫົວພັນໄດ້ຈັດພິທີປິດຊຸດຮຽນທິດສະດີການເມືອງ ແລະ ການປົກຄອງລະບົບຊັ້ນ ກາງຮຸ່ນທີ XI ທີ່ໂຮງຮຽນດັ່ງກ່າວ ໂດຍການເຂົ້າຮ່ວມ ແລະມອບປະກາສະນີຍະບັດຈົບການຮຽນໂດຍທ່ານ ຄໍາຜີວ ວົງສະຫວັນ ຮອງເລຂາພັກແຂວງ, ປະທານແນວ ລາວສ້າງຊາດແຂວງ, ມີຄູ-ອາຈານ, ແຂກຖືກເຊີນພ້ອມດ້ວຍນັກສຶກສາລະບົບຮຸ່ນທີ 11 ແລະ12 ເຂົ້າຮ່ວມນຳ.

  ທ່ານ ອົ້ມ ອິນທະລາ ວ່າການຫົວໜ້າໂຮງຮຽນທິດສະດີກາເມືອງ ແລະການປົກຄອງແຂວງ ໄດ້ຜ່ານບົດສະຫຼຸບການເຄື່ອນໄຫວສິດສອນ -ຮໍ່າຮຽນຊຸດທີ 11 ໂດຍໄດ້ຍົກໃຫ້ເຫັນຊຸດຮຽນໃນຄັ້ງນີ້ມີນັກສຶກສາທັງໝົດ 53 ສະຫາຍ, ຍິງ 8 ສະຫາຍ, ຊຶ່ງໄດ້ເລີ່ມຕົ້ນຮຽນນັບແຕ່ຕົ້ນເດືອນພຶດສະພາ ປີ 2019 ເຖິງຕົ້ນເດືອນສິງຫາ ປີ 2020 ລວມເວລາຮຽນທັງໝົດ 15 ເດືອນ, ມີ 28 ວິຊາທີ່ປະກອບດ້ວຍ 3 ໝວດຄື: ໝວດວິຊາຄວາມຮູ້ ທົ່ວໄປປະກອບມີ 15 ວິຊາຄື: ພູມສາດການເມືອງໂລກ, ພາສາອັງກິດ,ຄອມພີວເຕີ,ປະຫວັດສາດລາວ,ປະຫວັດສາດພັກ, ປະຊາກອນສາດ, ວັດທະນະທຳ, ຄຸນສົມບັດ,ກົດໝາຍລັດຖະທຳມະນູນ,ກົດໝາຍອາຍາ, ກົດໝາຍແພ່ງ, ທິດສະດີລັດ ແລະກົດໝາຍ, ການເມືອງວິທະຍາ, ສັງຄົມສາດ ແລະພາສາຫວຽດນາມ; ໝວດວິຊາ ເຕັກນີກສະເພາະປະກອບມີ 7 ວິຊາຄື: ວິຊາ ປກສ-ປກຊ , ເສດຖະສາດພັດທະນາ, ບໍລິຫານອົງການ, ເຕັກນິກບໍລິຫານ, ຈິດຕະສາດສັງຄົມ, ຄຸ້ມຄອງບຸກຄະລາກອນ ແລະວິຊາຄຸ້ມຄອງເສດຖະ ກິດ; ໝວດວິຊາຫຼັກປະກອບມີ 6 ວິຊາຄື:  ປັດສະຍາມາກ-ເລນີນ, ເສດຖະສາດການເມືອງມາກ-ເລນີນ, ລັດທິສັງຄົມນິຍົມວິທະຍາສາດ, ການປົກຄອງ, ກໍ່ສ້າງພັກ ແລະວິຊາຂົນຂວາຍມະຫາ ຊົນ, ປະກອບມີ 80 ໜ່ວຍກິດ, ໃນການສິດສອນຄູ-ອາຈານໄດ້ແຕ່ງບົດສອນ, ສົ່ງຄວາມຮູ້, ກວ້າງຂວາງ, ເລິກເຊິ່ງ, ມີເອກະສານ ແລະຂໍ້ມູນຂ່າວສານໃໝ່ປະກອບເຂົ້າໃນບົດສອນພ້ອມທັງໄດ້ນໍາໃຊ້ສື່ເຂົ້າໃນການສິດສອນ ແລະປະສານສົມທົບການສອນແບບໝູນເຊື້ອກັບການສອນແບບຕັ້ງໜ້າ, ສອນແບບເອົານັກຮຽນເປັນສູນກາງ, ສ່ວນນັກສຶກສາກໍ່ໄດ້ປະຕິບັດຂໍ້ກຳນົດກົດລະບຽບຂອງໂຮງຮຽນວາງອອກໄດ້ດີ, ຂຶ້ນຫ້ອງທັນໂມງເວລາ, ມີທັດສະນະມະຫາຊົນກວ້າງຂວາງ, ຕັ້ງໜ້າສຶກສາຄົ້ນຄວ້າຮໍ່າຮຽນນໍາຄູ-ອາຈານ, ຄົ້ນຄວ້າດ້ວຍຕົນເອງ ແລະຕັ້ງໜ້າປະກອບສ່ວນເຂົ້າໃນວຽກງານຂອງໂຮງຮຽນ, ຜ່ານການຮຽນທັງໝົດ 28 ວິຊາມີນັກສຶກສາທີ່ມີຄະແນນສະ ເລ່ຍໄດ້ເກດ A ຄ່າຄະແນນ 4,00 ມີ 4 ສະ ຫາຍ, ຍິງ 3 ສະຫາຍເທົ່າກັບ 7% ສະເລ່ຍໄດ້ເກດ B+ ຄ່າຄະ ແນນ 3,50 ມີ 49 ສະຫາຍ, ຍິງ 5 ສະຫາຍ ເທົ່າກັບ 43%, ຜົນຂອງ ການປ້ອງກັນບົດມີຄື: ປ້ອງກັນບົດໄດ້ເກດ A ຈັດປະເພດດີເລີດມີ 45 ສະຫາຍ, ຍິງ 8 ສະຫາຍ ເທົ່າກັບ 84,90%, ປ້ອງກັນໄດ້ເກດ B+ ຈັດປະເພດດີຫຼາຍມີ 8 ສະຫາຍ ເທົ່າກັບ 15,10%.

   ຕໍ່ກັບຜົນການຮຽນມີນັກສຶກສາທີ່ມີຜົນງານຮຽນດີຮຽນເກັ່ງມີວິໄນດີປະເພດ 1 ໄດ້ຮັບໃບຍ້ອງຍໍທ່ານເຈົ້າແຂວງໆຫົວພັນຈຳນວນ 18 ສະຫາຍ, ຍິງ 5 ສະຫາຍ, ຮັບໃບຍ້ອງຍໍຫົວໜ້າໂຮງຮຽນການເມືອງ ແລະການປົກຄອງແຂວງຈຳນວນ 20 ສະຫາຍ, ຍິງ 3 ສະຫາຍ.

_________

ຂຽນໂດຍ: ນິດສະໜອມ, ຮູບພາບ: #ຫນັງສືພິມເສດຖະກິດສັງຄົມ

แชร์