ສຳເລັດກອງປະຊຸມໃຫຍ່ຜູ້ແທນພະສົງທົ່ວເມືອງຫົງສາ

  ກອງປະຊຸມໃຫຍ່ຜູ້ແທນພະສົງທົ່ວເມືອງຫົງສາ ຄັ້ງທີ V ໄດ້ສໍາເລັດລົງໃນຕອນບ່າຍວັນທີ 16 ກັນຍາ 2020 ຢູ່ຫໍປະຊຸມຂອງເມືອງໂດຍການເປັນປະທານຂອງພະອາຈານ ອ່ອນຕາ ສາລິກາທອງ ຄະນະກຳມະການ ອພສ ແຂວງໄຊຍະບູລີ, ເຈົ້າຄະນະເມືອງຫົງສາ, ໃຫ້ກຽດເຂົ້າຮວ່ມມີພະອາຈານບຸນທຽນ ພຸດທະວະໂຣ ຄະນະກຳ ມະການສູນກາງ ອພສ,ເຈົ້າຄະນະແຂວງໄຊຍະບູລີ,ມີທ່ານ ຄໍາຫຼ້າ ຜິວວັນນາ ກໍາມະການພັກແຂວງເລຂາພັກເມືອງເຈົ້າເມືອງໆຫົງສາ, ມີແຂກຖືກເຊີນ,ຜູ້ແທນ ແລະພະສົງສາມະເນນທົ່ວເມືອງເຂົ້າຮວ່ມ.

   ໃນກອງປະຊຸມໄດ້ຮັບຮອງເອົາບົດລາຍງານຜົນການຈັດຕັ້ງປະຕິບັດຂອງອົງການພຸດທະສາສະໜາສໍາພັນລາວເມືອງຫົງສາ ໄລຍະ 5 ປີຜ່ານມາ ແລະພາກທິດທາງແຜນການ 5 ປີໃນຕໍ່ໜ້າ, ຍົກໃຫ້ເຫັນຜົນງານການຈັດຕັ້ງປະຕິບັດທີ່ຍາດມາໄດ້ໃນໄລຍະຜ່ານມາ, ດ້ານດີ-ດ້ານອ່ອນ, ຂໍ້ຄົງຄ້າງ ແລະບົດຮຽນທີ່ຖອດຖອນໄດ້, ໂດຍໄດ້ ຮັບການຊີ້ນໍາໆພາຂອງອົງພຸດສາສະໜາສໍາພັນລາວແຂວງໄຊຍະບູລີ, ອົງການຈັດຕັ້ງພັກ-ລັດທຸກໆຂັ້ນ, ໄລຍະຜ່ານມາໄດ້ລົງເຄື່ອນ ໄຫວໂຄສະນາວຽກງານຕ່າງໆ ໃຫ້ພະສົງສາມະເນນຊາວພຸດທະບໍລິສັດສະນິກກະຊົນທັງຫຼາຍໃຫ້ຄວາມສາມັກຄີປອງດອງຮັກແພງຊວ່ຍເຫຼືອເຊິ່ງກັນ ແລະກັນໄດ້ລົງເຜີຍແຜ່ສິນລະທໍາຂັ້ນເມືອງ, ຂັ້ນບ້ານ, ເພື່ອສັ່ງສອນໃຫ້ຄົນມີນໍ້າ ໃຈຮັກຊາດ, ຮັກບ້ານເກີດເມືອງນອນຂອງຕົນ, ມີສະຕິລະວັງຕົວຕໍ່ກຸ່ມຄົນບໍ່ຫວັງດີເຂົ້າມ້າງເພທໍາລາຍສາສະໜາໄດ້ນໍາພາຊາວພຸດປົກປັກຮັກສາເອກະລັກວັດທະນະທໍາຮີດຄອງປະເພນີອັນດີງາມ, ສັ່ງສອນຄົນໃຫ້ຮູ້ຈັກບາບບຸນຄຸນໂທດຮູ້ປະຕິບັດຕາມຄໍາສັ່ງສອນຂອງພະພຸດທະເຈົ້າ,ຄໍາສັ່ງສອນຂອງທ່ານຜູ້ນໍາ ແລະອື່ນໆ.

   ນອກຈາກນັ້ນກອງປະຊຸມຍັງໄດ້ຄົ້ນຄວ້າປະຊາມະຕິຮັບຮອງເອົາຄະນະກຳມະການ ອພສ ເມືອງຫົງສາຈຳນວນທັງໝົດ 11 ອົງ, ຮັບຮອງເອົາຄະນະປະຈຳ ອພສ ເມືອງ 7 ອົງ, ຮັບຮອງເອົາພະອາຈານ ສົມພອນ ຄໍາຈະເລີນ ເປັນເຈົ້າຄະນະເມືອງ ແລະແຕ່ງຕັ້ງຮອງ ເຈົ້າຄະນະເມືອງ 4 ອົງ, ຮັບຮອງເອົາຫົວໜ້າ-ຮອງຫົວໜ້າຫ້ອງການບໍລິຫານ, ຫົວໜ້າ-ຮອງຫົວໜ້າກໍາມາທິການຕ່າງໆຄົບຊຸດ, ນອກນັ້ນຍັງໄດ້ມອບໃບກຽດຕິຄຸນໃຫ້ຄະນະ ອພສ ເມືອງຊຸດເກົ່າ, ມອບໃບກຽດຕິຄຸນໃຫ້ພາກສ່ວນຕ່າງໆ ທີ່ມີຜົນງານປະກອບສ່ວນຕໍ່ວຽກງານ ອພສ ເມືອງໃນໄລຍະຜ່ານມາ.

  ທ່ານ ຄໍາຫຼ້າ ຜິວວັນນາ ເຈົ້າເມືອງໆຫົງສາ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະ ອພສ ເມືອງຊຸດເກົ່າທີ່ຍາດຜົນງານມາໄດ້ໃນໄລຍະຜ່ານມາ, ພ້ອມທັງຊີ້ນໍາໃຫ້ຕໍ່ຄະນະຊຸດໃໝ່ຈົ່ງພ້ອມກັນເອົາໃຈໃສ່ສືບຕໍ່ຕັ້ງໜ້າປະຕິບັດໜ້າທີ່ວຽກງານທີ່ຍັງຄົງຄ້າງ, ສ້າງແຜນວຽກ, ແຜນງານໃນການຊີ້ນໍາໆພາອົງການພຸດທະສາສະໜາສໍາພັນລາວເມືອງຫົງສາ ໃຫ້ມີບາດກ້າວອັນໃໝ່ໃຫ້ ສອດຄ່ອງກັບລະບຽບກົດໝາຍ ແລະທຳມະນູນສົງ, ກອງປະຊຸມຄັ້ງນີ້ຍັງໄດ້ຮັບຟັງຄຳໂອວາດຈາກພະອາຈານບຸນທຽນ ພຸດທະວະໂຣ ເຈົ້າຄະນະແຂວງໄຊຍະບູລີ ໃນການສຶກສາອົບຮົມເຕົ້າໂຮມຄວາມສາມັກຄີກັນໃຫ້ເປັນປຶກແຜ່ນແໜ້ນໜາທາງຝ່າຍສົງ ແລະຝ່າຍນອກ, ພ້ອມກັນຜັນຂະ ຫຍາຍມະຕິກອງປະຊຸມຄັ້ງນີ້ລົງສູ່ວັດຕ່າງໆໃນທົ່ວເມືອງໃຫ້ປະກົດຜົນເປັນຈິງ.

__________

ຂຽນໂດຍ: ບຸນປອນ

ຮູບພາບ: ໜັງສືພິມເສດຖະກິດ-ສັງຄົມ

แชร์