ໂຮງຮຽນສາມັນກິນນອນຊົນເຜົ່າໄດ້ຮັບເຄື່ອງຊ່ວຍເຫຼືອ

ໃນວັນທີ 17 ກັນຍາ 2020 ທີ່ຫ້ອງປະຊຸມຂອງມະຫາວິທະຍາໄລສະຫວັນນະເຂດ ໄດ້ຈັດພິທີມອບ-ຮັບເຄື່ອງຊ່ວຍເຫຼືອຊຸດເຄື່ອງແບບນັກຮຽນ ແລະອຸປະກອນການຮຽນ ໃຫ້ແກ່ໂຮງຮຽນສາມັນກິນນອນຊົນເຜົ່າແຂວງສະຫວັນນະເຂດຄັ້ງທີ 13, ລວມມູນຄ່າ 85,84 ລ້ານກີບ ຊຶ່ງໃຫ້ກຽດມອບໂດຍທ່ານ ຄາຊຸມິເນະ ຄິຄຸຕະ ຄະນະບໍລິຫານງານຂອງມູນນິທິມາຣຸເບນີເພື່ອສົ່ງເສີມການສຶກສາຢູ່ ສປປ ລາວ ທັງເປັນຜູ້ຈັດການຂອງຫ້ອງການຜູ້ຕາງໜ້າບໍລິສັດ ມາຣຸເບນີ ປະຈຳນະຄອນຫຼວງວຽງຈັນ ແລະຮັບໂດຍທ່ານ ສົມລິດ ອຸ່ນທະວີ ຜູ້ອຳນວຍການໂຮງຮຽນສາມັນກິນນອນຊົນເຜົ່າ, ໂດຍການເຂົ້າຮ່ວມເປັນສັກຂີພິຍານໃນພິທີຄັ້ງນີ້ຂອງທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະກີລາແຂວງ, ມີຕາງໜ້າຈາກກະຊວງສຶກສາທິການ ແລະກີລາພ້ອມຄະນະ, ພະແນກການກົມກອງທີ່ກ່ຽວຂ້ອງຕະຫຼອດເຖິງບັນດາຄູ-ອາຈານ ແລະນັກຮຽນຂອງໂຮງຮຽນແຫ່ງດັ່ງກ່າວເຂົ້າຮ່ວມຢ່າງພ້ອມພຽງ.

  ໂອກາດນີ້, ທ່ານ ສົມລິດ ອຸ່ນ ທະວີ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດແຜນພັດທະນາການສຶກສາ ໂດຍສັງເຂບ: ປະຈຸບັນ, ພາຍໃນໂຮງຮຽນມີພະ ນັກງານ-ຄູ-ອາຈານທັງໝົດ 55 ຄົນ, ຍິງ 37 ຄົນ (ຄູສອນ 45 ຄົນ, ຍິງ 22 ຄົນ), ມີນັກຮຽນທັງໝົດ 622 ຄົນ, ຍິງ 255 ຄົນ ໃນນີ້ມີນັກຮຽນນອນໃນທີ່ເປັນຄົນຊົນ ເຜົ່າມາຈາກເຂດຫ່າງໄກສອກຫຼີກຈຳນວນທັງໝົດ 420 ຄົນ, ຍິງ 159 ຄົນ, ຜ່ານມາມູນນິທິມາຣຸເບນີ ໄດ້ໃຫ້ການອຸປະຖຳຊ່ວຍເຫຼືອແກ່ໂຮງຮຽນສາມັນກິນນອນຊົນເຜົ່າຂອງພວກເຮົານັບແຕ່ປີ 2008 ຈົນເຖິງ ປີ 2020, ລວມ 13 ສົກຮຽນ, ມີມູນຄ່າລວມທັງໝົດ 2,32 ຕື້ກວ່າກີບ, ສະເພາະປີ 2020 ນີ້ມີມູນຄ່າ 85 ລ້ານກວ່າກີບ.

  ທ່ານ ຄິຄຸຕະ ຄາຊຸມິເນະກ່າວວ່າ: ມູນນິທິມາຣູເບນີ ເພື່ອສົ່ງເສີມການສຶກສາຢູ່ ສປປ ລາວ ຖືກສ້າງຕັ້ງຂຶ້ນມາໃນປີ 2008 ຊຶ່ງກົງກັບການສະເຫຼີມສະຫຼອງວັນຄົບ ຮອບ 150 ປີ ຂອງບໍລິສັດມາຣູເບນີ ຄໍໂປເຣຊັນສຳລັບການຊ່ວຍເຫຼືອໃນເທື່ອນີ້້ແມ່ນເປັນຄັ້ງທີ 13 ແລ້ວ, ຊຶ່ງໃນປີນີ້ມູນນິທິພວກເຮົາໄດ້ປະກອບສ່ວນຊ່ວຍເຫຼືອປຶ້ມຕຳລາຮຽນ ແລະເຄື່ອງແບບນັກຮຽນໃຫ້ແກ່ໂຮງຮຽນ 1 ແຫ່ງຄື: ໂຮງຮຽນສາມັນກິນນອນຊົນເຜົ່າແຂວງສະຫວັນນະເຂດເພື່ອຊ່ວຍເຫຼືອແກ່ນັກຮຽນໃນໂຮງຮຽນແຫ່ງນີ້ຈຳນວນ420 ຄົນ, ຍິງ 159 ຄົນ, ລວມມູນຄ່າທັງໝົດ 85,84 ລ້ານກີບ ແລະຄາດຫວັງວ່າອຸປະກອນການຮຽນເຫຼົ່ານີ້ຈະເປັນປະໂຫຍດ ແລະ ຊ່ວຍໃຫ້ພວກນ້ອງນັກຮຽນນຳໃຊ້ເຂົ້າໃນການພັດທະນາສັງຄົມຂອງ ສປປ ລາວ.

 

แชร์