ຈຳປາສັກ ປະຊຸມຜູ້ບໍລິຫານການສຶກສາ

  ໃນລະຫວ່າງວັນທີ 17-18 ກັນຍາ 2020 ທີ່ສະໂມສອນຫ້ອງວ່າການເມືອງໂຂງ ແຂວງຈຳປາສັກ ໄດ້ເປີດກອງປະຊຸມຜູ້ບໍລິຫານການສຶກສາ ແລະກີລາທົ່ວແຂວງປະຈຳສົກຮຽນ 2019-2020 ພາຍໃຕ້ການເປັນປະທານຂອງ ທ່ານ ໜູຈັນ ຈັນທະພົງ ປະທານກວດກາ ແຂວງຈຳປາສັກ, ທ່ານ ນາງ ຄຳພູ ລິດທິສັກ ເຈົ້າເມືອງ ໂຂງ, ທ່ານ ບົວໄຂ ສຸພາອອນ ຫົວໜ້າພະແນກສຶກສາທິການ ແລະກີລາແຂວງ, ມີບັນດາຮອງເຈົ້າ ເມືອງ 9 ເມືອງ, 1 ນະຄອນ, ຜູ້ບໍລິ ຫານການສຶກສາ ແລະກີລາຂັ້ນແຂວງ, ເມືອງ, ຜູ້ອຳນວຍການ ວິທະຍາໄລທັງພາກລັດ-ເອກະຊົນ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ບົວໄຂ ສຸພາອອນ ໃຫ້ຮູ້ວ່າ: ແຂວງຈໍາປາສັກ ມີໂຮງຮຽນສາມັນທັງໝົດ 1.188 ແຫ່ງ, ທຽບໃສ່ 2018-2019 ຫຼຸດລົງ 17 ແຫ່ງໃນນັ້ນໂຮງ ຮຽນລ້ຽງເດັກ-ອະນຸບານ 273 ແຫ່ງ, ເອກະຊົນ 28 ແຫ່ງ, ໂຮງຮຽນປະຖົມສຶກສາ 748 ແຫ່ງ, ເອກະຊົນ 12 ແຫ່ງ ແລະໂຮງຮຽນມັດທະຍົມ 167 ແຫ່ງ, ເອກະຊົນ 4 ແຫ່ງ ໃນນີ້ ມັດທະຍົມຕອນຕົ້ນ 82 ແຫ່ງ, ມັດທະຍົມຕອນປາຍ 4 ແຫ່ງ ແລະມັດທະຍົມສົມບູນ 81 ແຫ່ງ, ມີຈໍານວນນັກຮຽນສາມັນທັງໝົດ 147.501 ຄົນ, ຍິງ 72.677 ຄົນ, ໃນນັ້ນນັກຮຽນລ້ຽງເດັກ-ອະນຸບານ ແລະຫ້ອງກຽມປະຖົມ 17.987 ຄົນ, ຍິງ 8.981 ຄົນ, ນັກຮຽນປະຖົມສຶກສາ 76.984 ຄົນ, ຍິງ  37.624 ຄົນ ແລະນັກຮຽນມັດທະຍົມ  52.530  ຄົນ,  ຍິງ 26.072 ຄົນ ໃນນີ້ນັກຮຽນຊັ້ນມັດທະຍົມ ຕົ້ນ 35.026 ຄົນ ຍິງ 17.686 ຄົນ, ນັກຮຽນຊັ້ນມັດທະຍົມປາຍ 17.504 ຄົນ, ຍິງ 8.386 ຄົນ, ມີລັດຖະກອນສຶກສາທັງໝົດ 6.448 ຄົນ, ຍິງ 4.104 ຄົນ ແລະຄູສອນ 6.149 ຄົນ, ຍິງ 3.920 ຄົນ.

  ທ່ານ ໜູຈັນ ຈັນທະພົງ ໄດ້ເນັ້ນໜັກບາງບັນຫາຕື່ມວ່າ: ຕ້ອງໄດ້ເພີ່ມທະວີຈັດຕັ້ງເຊື່ອມຊຶມແນວທາງນະໂຍບາຍຂອງພັກໃຫ້ຜູ້ບໍລິຫານການສຶກສາແຕ່ລະຂັ້ນ ແລະຄູສອນໃຫ້ກວ້າງຂວາງເລິກເຊິ່ງ, ໜັກແໜ້ນ, ໂຮງຮຽນແຕ່ລະແຫ່ງຕ້ອງຖືເອົາການຈັດຕັ້ງປະຕິບັດ 3 ຂໍ້ ແຂ່ງຂັນ ແລະ3 ລັກສະນະ 5 ຫຼັກມູນຂອງຂະແໜງການສຶກສາເປັນສິ່ງສຳຄັນ, ສຸມໃສ່ສ້າງໂຮງຮຽນ ໃຫ້ກາຍເປັນໂຮງຮຽນຕົວແບບຄຸນນະພາບຕິດພັນກັບການສ້າງໂຮງຮຽນສີຂຽວ ແລະປອດຢາເສບຕິດ, ເອົາໃຈໃສ່ຫັນລົງກໍ່ສ້າງຮາກຖານການເມືອງສຸມໃສ່ບ້ານເປົ້າໝາຍ 3 ສ້າງ ແລະເຂດຫ່າງໄກສອກຫຼີກເພື່ອປັບປຸງວຽກງານການສຶກສາ ແລະກີລາໃຫ້ມີຄຸນນະພາບເທົ່າທຽມກັນລະຫວ່າງຕົວເມືອງ ແລະເຂດຊົນນະບົດ.

----

ໜັງສືພິມ ເສດຖະກິດ-ສັງຄົມ

แชร์