ໂຮງກັ່ນນໍ້າມັນທົ່ວໂລກພົບບັນຫາ

  ໂຮງກັ່ນນໍ້າມັນທົ່ວໂລກພົບບັນຫາຄວາມຕ້ອງການນໍ້າມັນຫຼຸດລົງຂະນະທີ່ປະລິມານນໍ້າມັນຍັງຄ້າງສາງມີຫຼາຍເກີນໄປ.

  ຕາມຂ່າວຕ່າງປະເທດລາຍງານວ່າ ຜູ້ບໍລິຫານໂຮງກັ່ນນໍ້າມັນລວມທັງພະນັກງານ ແລະນັກວິເຄາະອຸດສາຫະກຳຊີ້ວ່າ ຜູ້ກັ່ນນໍ້າມັນທົ່ວໂລກຕ່າງກຳລັງຫຼຸດການຜະລິດນໍ້າມັນເຊື້ອໄຟໃນລະດູໜາວລົງເນື່ອງຈາກຄວາມຕ້ອງການນໍ້າມັນທີ່ຫຼຸດລົງຕໍ່ເນື່ອງມາດົນຫຼາຍເດືອນ ແລະມີນໍ້າມັນຄ້າງສາງເປັນຈຳນວນຫຼາຍ, ຊຶ່ງໂຮງກັ່ນນໍ້າມັນຫຼຸດກຳລັງການຜະລິດລົງຫຼາຍເຖິງ 35% ໃນລະດູໃບໄມ້ປົ່ງເນື່ອງຈາກການປິດເມືອງຈາກການລະບາດຂອງເຊື້ອໂຄວິດ-19 ໄດ້ຫຼຸດຄວາມຈຳເປັນໃນການເດີນທາງ ແລະເມື່ອຜ່ອນຄາຍມາດຕະການປິດເມືອງລົງຜູ້ກັ່ນນໍ້າມັນກໍຄ່ອຍໆເພີ່ມການຜະລິດຢ່າງຊ້າໆຈົນເຖິງທ້າຍເດືອນສິງຫາ.

  ການຫຼຸດການຜະລິດນໍ້າມັນເຊື້ອໄຟເກີດຂຶ້ນຫຼາຍທີ່ສຸດໃນຈີນ ຊຶ່ງ ເປັນຜູ້ບໍລິໂພກນໍ້າມັນເຊື້ອໄຟລາຍໃຫຍ່ອັນດັບສອງ ແລະເປັນຜູ້ນໍາຂອງໂລກໃນດ້ານການຟື້ນຕົວຂອງຄວາມຕ້ອງການນໍ້າມັນຫຼັງຈາກສາມາດຢັບຢັ້ງການລະບາດຂອງໂຄວິດ-19.

----

ໜັງສືພິມ ເສດຖະກິດ-ສັງຄົມ

• 22/09/2020