ເລີ່ມບຸນພະທາດໂຜ່ນ

  ພິທີເປີດງານບຸນນະມັດສະການພະທາດໂຜ່ນປະຈໍາປີ 2019 ໄດ້ຈັດຂຶ້ນຢ່າງເປັນທາງການໃນຕອນແລງຂອງວັນທີ 15 ກຸມພາ 2019 ຢູ່ທີ່ເດີ່ນໜ້າສາລາກາງວັດພະທາດໂຜ່ນໂດຍການໃຫ້ກຽດເຂົ້າຮ່ວມຂອງທ່ານ ໂພໄຊ ໄຊຍະສອນ ຮອງເຈົ້າແຂວງ ສະຫວັນນະເຂດ, ມີຄະນະປະຈໍາພັກແຂວງ, ກໍາມະການພັກແຂວງ, ຄະນະສະມາຊິກສະພາແຫ່ງ ຊາດເຂດເລືອກຕັ້ງທີ 13 ແຂວງສະຫວັນນະເຂດ, ຄະນະອໍານວຍການສະ ຖາບັນການສຶກສາຕ່າງໆ, ຄະນະອໍານວຍການວິສາຫະກິດ, ຜູ້ປະກອບການ, ເລຂາພັກເມືອງ-ເຈົ້າເມືອງໆໄຊພູທອງ, ຄະນະປະຈໍາພັກເມືອງ-ກໍາມະການພັກເມືອງ, ຫ້ອງການອ້ອມຂ້າງເມືອງ,ບັນດາເລຂາໜ່ວຍພັກ-ນາຍບ້ານ, ອົງການຈັດຕັ້ງມະຫາຊົນ,ຕະຫລອດເຖິງປະຊາຊົນຜູ້ມາທ່ຽວງານບຸນເຂົ້າຮ່ວມຢ່າງຄຶກຄື້ນ.

  ໃນພິທີ ທ່ານ ຄໍາວິໃສ ຜຸຍຍະວົງ  ເຈົ້າເມືອງໄຊພູທອງປະທານຈັດງານບຸນກ່າວວ່າ: ການຈັດງານບຸນນະມັດສະການພະທາດໂຜ່ນປະຈໍາປີ 2019 ຊິ່ງເປັນບຸນໃຫຍ່ຂອງຊາວແຂວງສະຫວັນນະເຂດເວົ້າລວມເວົ້າສະເພາະກໍຄືຊາວເມືອງໄຊພູທອງທີ່ໄດ້ຈັດຂື້ນເປັນປະຈໍາໃນທຸກໆປີເພື່ອເປັນການສຶບທອດມູນເຊື້ອປະ ເພນີອັນດີງາມທີ່ເປັນເອກະລັກທາງດ້ານວັດທະນະທຳທີ່ອຸດົມສົມບູນມີຫຼາຍສີສັນ ແລະມີການເຂົ້າຮ່ວມກວ້າງຂວາງຂອງປວງຊົນລາວບັນດາເຜົ່າໃນຂອບເຂ ດທົ່ວປະເທດ ແລະປະເທດໃກ້ຄຽງ, ຈຸດປະສົງຂອງການຈັດງານດັ່ງກ່າວຮັບປະກັນໃຫ້ໄດ້ການອະນຸລັກຮັກສາການສົ່ງເສີມວັດທະນະທຳຮີດຄອງປະເພນີອັນດີງາມທີ່ໄດ້ສືບທອດກັນຫລາຍຮຸ່ນຄົນໃຫ້ມີຄວາມຍຶນຍົງຄົງຄູ່ຄົນລາວຕະຫຼອດໄປເປັນການສ້າງໂອກາດໃນການໂຄສະນາການທ່ອງທ່ຽວຂອງ ສປປ ລາວ ແລະການທ່ອງທ່ຽວຂອງເມືອງໄຊພູທອງ, ເປັນການຊຸກຍູ້ສົ່ງເສີມການຜະລິດເສດຖະກິດທຸກພາກສ່ວນເສດຖະກິດ.

  ທ່ານ ຄໍາວິໃສ ຜຸຍຍະວົງ ເຈົ້າເມືອງໆ ໄຊພູທອງ ຍັງໄດ້ຍົກໃຫ້ປະຫວັດຄວາມ ເປັນມາເຫັນໄດ້ເຖິງຄວາມເປັນຈິງຂອງ ເມືອງໄຊພູທອງ ຖືວ່າເປັນເມືອງໜຶ່ງໃນ ດິນແດນແຫ່ງອະລິຍະທໍາທັງນີ້ກໍຍ້ອນເປັນທີ່ຕັ້ງຂອງພະທາດໂຜ່ນເຊິ່ງແມ່ນປູ່ສະນີຍະສະຖານທີ່ມີຄວາມສັກສິດຄູ່ບ້ານຄູ່ເມືອງຂອງຊາວພຸດເວົ້າລວມກໍຄື ຊາວພຸດທະສາສະນິກະຊົນທີ່ໃຫ້ຄວາມ ເຄົາລົບບູຊາມາແຕ່ບູຮານນະການ ຊຶ່ງ ຕາມຕໍານານ ໄດ້ກ່າວໄວ້ວ່າ: ເຈົ້າແມ່ແພງສີໄດ້ພ້ອມໃຈກັນສ້າງພະທາດອົງນີ້ຂຶ້ນໃນຕອນຄ່ໍາຂອງວັນພຸດເດືອນ 12 ພສ 118 ສ້າງດ້ວຍຫີນເຂົ້າຈີ່ຫຼືເອີ້ນວ່າ: (ຫີນໝາມໜໍ່) ກໍເປັນທາດອຸໂມງ (ຮູບໂອຂວໍ່າ) ພະທາດຮູບນີ້ກວ້າງດ້ານລະ 12 ວາສ້າງມື້ໜຶ່ງກັບຄືນໜຶ່ງຈຶ່ງສໍາເລັດ. ມາເຖິງປັດຈຸບັນນີ້ມີອາຍຸເຖິງ 2.439 ປີ ສະນັ້ນສະຖານທີ່ແຫ່ງນີ້ຈຶ່ງຖືວ່າເປັນມໍລະດົກຕົກທອດ, ເປັນຊັບ ສົມບັດມິ່ງເມືອງທີ່ມີຄ່າສູງ, ໂດດເດັ່ນທາງດ້ານວັດທະນະທໍາອັນລໍ້າຄ່າ ແລະເປັນປະຫວັດສາດເຊິ່ງຕິດພັນກັບແບບແຜນດໍາລົງ ຊີວິດຂອງປະຊາຊົນລາວບັນດາເຜົ່າ ມາແຕ່ດຶກດໍາບັນ. ຢັ້ງຢືນເຖິງຄວາມເປັນ ມາຂອງຊາດລາວ, ຄົນລາວໃນແຕ່ລະຍຸກສະໄໝ ແລະຍັງເປັນສະຖານທີ່ທ່ອງທ່ຽວທາງດ້ານວັດທະນະທໍາທ່ີສໍາຄັນ ແລະມີຊື່ສຽງອີກແຫ່ງໜຶ່ງຂອງແຂວງສະຫວັນນະເຂດກໍຄືຂອງຊາວເມືອງໄຊພູທອງ.    

  ໃນພິທີ ທ່ານ ໂພໄຊ ໄຊຍະສອນ ຮອງ ເຈົ້າແຂວງໆສະຫວັນນະເຂດ ໄດ້ໃຫ້ ກຽດຂຶ້ນລັ່ນຄ້ອງ 9 ບາດ ເພື່ອເປັນສັນ ຍາລັກແຫ່ງການກ່າວເປີດງານຂຶ້ນຢ່າງ ເປັນທາງການ. ຈາກນັ້ນການນໍາພັກ-ລັດກໍໄດ້ເຂົ້າຮ່ວມການແຮ່ຜາສາດເຜິ້ງ ໃຫຍ່ ເພື່ອເປັນການສັກກາລະບູຊາເປັນການສຶບສານວັດທະນະທໍາລາວທີ່ເຄີຍ ປະຕິບັດກັນມາຖືວ່າເປັນປີທີສອງທີ່ໄດ້ຈັດໃຫ້ມີກິດຈະກໍານີ້ຂຶ້ນມາເພື່ອເປັນການບູຊາແດ່ອົງພະທາດໂຜ່ນ. ພ້ອມນີ້ກໍຍັງໄດ້ຊົມການສະແດງສິລະປະວັນນະ ຄະດີມີ 3 ຄື: ຂະບວນຟ້ອນຂອງນ້ອງນັກຮຽນ ມສ ພູມມະ ເຈດີ, ມສ ນາຄໍາ ແລະ ຂະບວນຟ້ອນຂອງນ້ອງນັກຮຽນມັດທະຍົມຕົ້ນມ່ວງໄຂ່.ເຊິ່ງພາຍໃນງານບຸນກໍ່ຈັດໃຫ້ມີຫຼາຍກິດຈະກໍາໃຫ້ແກ່ຜູ້ທີ່ມາທ່ຽວຊົມຂາບໄຫວພະທາດໂຜ່ນ ແລະ ໄດ້ທ່ຽວໄດ້ຊົມສິນຄ້າໂອດັອບຜະລິດຕະພັນພາຍໃນ ແລະຄອບຄົວຕົວແບບມີການຂັບລໍາຕາມທີ່ເຄີຍປະຕິບັດມາພິເສດພາຍໃນບຸນໃນຄໍ່າຄືນຂອງວັນທີ 16 ພົບກັບສິລະປິນຈາກປະເທດໄທເຕັມວົງຕ່າຍ ອໍລະໄທ, ຄ່ໍາຄືນວັນທີ 17 ທ່ານຈະໄດ້ພົບກັບໝໍລໍາເລື່ອງຫົງຟ້າອາທະສິນຈາກແຂວງຈໍາປາສັກ ແລະວັນທີ 18 ພົບການແຂ່ງຂັນຊົກມວຍລາວ-ໄທ ຈາກຄ້າຍມວຍ 8 ແມັກມວຍໄທ.

 ຂ່າວ: ພັນທະມິດ ວົງສຸທິ      

แชร์