ຫວຽດນາມສູ້ຊົນສົ່ງອອກສັດນໍ້າບັນລຸ 8,9 ຕື້ໂດລາ

  ຈົນເຖິງທ້າຍເດືອນສິງຫາ ທີ່ຜ່ານມາ ມູນຄ່າການສົ່ງອອກສັດນໍ້າຂອງ ສສ ຫວຽດນາມບັນລຸ 5,4 ຕື້ໂດລາສະຫະລັດ ແລະສູ້ຊົນໃຫ້ບັນລຸ 8,9 ຕື້ໂດລາຕໍ່ປີ.

  ຕາມຂ່າວສານຫວຽດນາມລາຍງານວ່າ ທ່ານ ຟຸ່ງດຶກຕຽນ ຮອງລັດຖະມົນຕີກະຊວງກະສິກຳ ແລະພັດທະນາຊົນນະບົດຫວຽດນາມກ່າວວ່າ ຮອດທ້າຍເດືອນສິງຫາປີ 2020, ການສົ່ງອອກສັດນໍ້າຂອງຫວຽດນາມບັນລຸໄດ້ 5,4 ຕື້ໂດລາສະຫະລັດ, ສູ້ຊົນໝົດປີບັນລຸໄດ້ 8,9 ຕື້ໂດລາ, ນີ້ແມ່ນຄຳຢັ້ງຢືນຂອງທ່ານ ຟຸ່ງດຶກ ຕຽນ ຢູ່ກອງປະຊຸມຮັບປະກັນຄຸນນະພາບສຸຂະອະນາໄມດ້ານສະບຽງອາຫານ, ຄວາມປອດໄພໃນໄລຍະເກີດໂລກລະບາດ ເພື່ອຊຸກຍູ້ການຜະລິດ, ຈຳໜ່າຍສັດນໍ້າໂດຍ ກະຊວງກະສິກຳ ແລະພັດທະນາຊົນນະບົດຈັດຕັ້ງຂຶ້ນໃນວັນທີ 19 ກັນຍາ ຢູ່ເກິ່ນເທີ, ຂະນະນີ້ຜະລິດພັນກຸ້ງກໍາລັງມີເງື່ອນ ໄຂທີ່ສະດວກທັງດ້ານປະລິມານ ແລະລາຄາຂາຍນັບຕັ້ງແຕ່ຂໍ້ຕົກລົງການຄ້າລະຫວ່າງຫວຽດນາມກັບສະຫະພາບເອີຣົບ (ອີວີເອຟທີເອ) ມີຜົນບັງຄັບໃຊ້ເມື່ອຕົ້ນເດືອນສິງຫາທີ່ຜ່ານມາ ໃບສັ່ງຊື້ກຸ້ງໄດ້ເພີ່ມຂຶ້ນຫຼາຍກວ່າ 10%.

  ຕະຫຼາດຕົ້ນຕໍທີ່ນໍາເຂົ້າກຸ້ງຂອງຫວຽດນາມຄື: ອາເມລິກາ, ຍີ່ປຸ່ນ, ສປ ຈີນ, ອີຢູ ແລະສ.ເກົາຫຼີ ຈົນເຖິງວັນທີ 15 ສິງຫາ ມູນຄ່າການສົ່ງອອກກຸ້ງຢູ່ທີ່ 2,1 ຕື້ໂດລາຄິດເປັນຫຼາຍກວ່າ 43% ຂອງຍອດມູນຄ່າການສົ່ງອອກສັດນໍ້າ ໂດຍຕະຫຼາດນໍ້າເຂົ້າກຸ້ງສອງແຫ່ງຂອງຫວຽດນາມທີ່ຂະຫຍາຍຕົວຄືອາເມລິ ກາເພີ່ມຂຶ້ນ 32% ແລະສ.ເກົາຫຼີເພີ່ມຂຶ້ນ 8,5%.

----

ໜັງສືພິມ ເສດຖະກິດ-ສັງຄົມ

แชร์