6 ບ້ານ ແລະເສຍຊີວິດ 1 ຄົນ ຜົນເສຍຫາຍເບື້ອງຕົ້ນຈາກພາຍຸໂນອຶນ

  ພາຍຸໂນອຶນ ໄດ້ສົ່ງຜົນກະທົບຢ່າງຫຼວງຫຼາຍແກ່ປະຊາຊົນລາວແຕ່ເໜືອຮອດໃຕ້ຊຶ່ງໄດ້ສ້າງຄວາມເສຍຫາຍທາງດ້ານຊັບສິນແລະຊີວິດໂດຍໄດ້ສົ່ງຜົນເຮັດໃຫ້ເຮືອນປະຊາຊົນເສຍຫາຍ ແລະເປ່ເພ, ຖະໜົນຂົນທາງ, ຂົວຂາດ ແລະ ອື່ນໆ ຈາກຂໍ້ມູນລາຍງານເບື້ອງຕົ້ນພາຍຸດັ່ງກ່າວໄດ້ສ້າງຄວາມເສຍຫາຍໃຫ້ປະຊາຊົນ 6 ບ້ານ 4 ແຂວງ ແລະຍັງມີຜູ້ເສຍຊີວິດອີກ 1 ຄົນປະຈຸບັນຍັງຄົ້ນຫາຢູ່.

ພາບປະກອບຂ່າວ

  ອີງໃສ່ຂໍ້ມູນກົມອຸຕຸນິຍົມ ແລະອຸທົກກະສາດແຈ້ງໃຫ້ຮູ້ກ່ອນໜ້ານີ້ເນື່ອງຈາກພາຍຸໜຸນເຂດຮ້ອນໂນອຶນຫົວທີ 11 ປະຈຳປີ 2020 ຊຶ່ງເວລາ 7:30 ໂມງ ຂອງວັນທີ 16 ກັນຍາ 2020 ມີຈຸດສູນກາງຢູ່ເສັ້ນຂະໜານທີ 13,0 ອົງສາ ເໜືອ ແລະເສັ້ນແວງທີ 117,8 ອົງສາ ຕາເວັນອອກເຄື່ອນທີ່ມາທາງທິດຕາເວັນຕົກດ້ວຍຄວາມໄວ 15 ກິແມັດຕໍ່ຊົ່ວໂມງພາຍຸຫົວນີ້ຈະຂຶ້ນຝັ່ງເຂດເມືອງດານັງ ສສ ຫວຽດນາມ ໃນຕອນບ່າຍຂອງວັນທີ 18 ກັນຍາ ແລະຈະສືບຕໍ່ເຄື່ອນຜ່ານແຂວງສາລະວັນ, ສະ ຫວັນນະເຂດ, ຄຳມ່ວນໃນຄືນວັນທີ 18-19 ກັນຍາຈາກນັ້ນຈະອ່ອນກຳລັງລົງເປັນພາຍຸດີເປຣຊັນ ແລະເຄື່ອນຜ່ານປະເທດໄທຕາມລຳດັບຊຶ່ງຈະເຮັດໃຫ້ມີຝົນຕົກໜັກ ແລະລົມພັດແຮງຢູ່ບັນດາແຂວງພາກເໜືອລົງຫາພາກໃຕ້ໃນວັນທີ 18-20 ກັນຍາ 2020.

ພາບປະກອບຂ່າວ

   ດັ່ງນັ້ນ, ຈຶ່ງແຈ້ງເຕືອນເຖິງພໍ່ແມ່ປະຊາຊົນທຸກພາກສ່ວນພາກເໜືອ ແລະ ພາກໃຕ້ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງທີ່ຈະເຮັດໃຫ້ມີ ຕົ້ນໄມ້ຫັກ, ເສົາໄຟຟ້າລົ້ມ, ເຮືອນເປ່ເພ, ນໍ້າຖ້ວມຊຸ, ດິນເຈື່ອນ ແລະນໍ້າຖ້ວມອັ່ງພ້ອມນີ້ກໍ່ໃຫ້ຕິດຕາມການແຈ້ງການເຕື່ອນໄພຈາກກົມອຸຕຸນິຍົມ ແລະອຸທົກກະສາດ ຢ່າງຕໍ່ເນື່ອງ.

 ຢ່າງໃດກໍຕາມອີງຕາມຂໍ້ມູນລາຍງານຈາກສູນຂ່າວສານແຮງງານ ແລະສະຫວັດດີການສັງຄົມໃຫ້ຮູ້ໃນວັນທີ 20 ກັນຍາວ່າ: ພາຍຸໂນອຶນໄດ້ສົ່ງຜົນກະທົບແກ່ປະຊາຊົນລາວຫຼາຍແຂວງຊຶ່ງແຂວງທີ່ໄດ້ຮັບຄວາມເສຍຫາຍຫຼາຍແມ່ນມີແຂວງ, ຊຽງຂວາງ, ແຂວງສະຫວັນນະເຂດ, ຈຳປາສັກ ແລະ ເຊກອງໃນນັ້ນແຂວງຊຽງຂວາງແມ່ນເມືອງໜອງແຮດມີ 1 ບ້ານ, 6 ຄອບຄົວ 36 ຄົນ, ເຮືອນເສຍຫາຍ 100% ຈຳນວນ 1 ຫຼັງ ແລະເສຍຫາຍບາງສ່ວນ 5 ຫຼັງ.

ພາບປະກອບຂ່າວ

   ສ່ວນຢູ່ແຂວງສະຫວັນນະເຂດແມ່ນເມືອງນອງ 2 ບ້ານ, ເຮືອນເສຍຫາຍ 1 ຫຼັງ ແລະຂົວຂາດ 2 ແຫ່ງ, ສຳລັບແຂວງຈຳປາສັກເສຍຫາຍຫຼາຍແມ່ນເມືອງຊະນະສົມບູນ 2 ບ້ານ ອົບພະຍົບຜູ້ອ່ອນແອປະຈຸບັນກັນຄືນທີ່ພັກອາໄສຂອງຕົນແລ້ວ, ສ່ວນເມືອງກະລຶມແຂວງເຊກອງມີ 1 ບ້ານ, ເສຍຊີວິດ 1 ຄົນ ກຳລັງຄົ້ນຫາແນວໃດກໍດີຂໍ້ມູນດັ່ງກ່າວແມ່ນເປັນຂໍ້ມູນທີ່ລາຍງານເບື້ອງຕົ້ນເທົ່ານັ້ນສ່ວນຜົນເສຍຫາຍທັງໝົດແນວໃດທີມງານຂ່າວຈະໄດ້ລາຍງານຕື່ມອີກ.

-----------------

ຂ່າວ: ສະເຫຼີມໄຊ, ຮູບພາບ: #ຫນັງສືພິມເສດຖະກິດສັງຄົມ

 

แชร์