ສະຫວັນນະເຂດ ປະຊຸມຜູ້ບໍລິຫານການສຶກສາ

  ໃນລະຫວ່າງວັນທີ 17-18 ກັນຍາ 2020 ທີ່ຫ້ອງປະຊຸມພະແນກສຶກສາທິການ ແລະກີລາແຂວງສະຫວັນນະເຂດໄດ້ຈັດກອງປະຊຸມຜູ້ບໍລິຫານການສຶກ ແລະກີລາປະຈຳສົກປີ 2019- 2020 ທົ່ວແຂວງຂຶ້ນໂດຍໃຫ້ກຽດການເປັນປະທານຂອງທ່ານ ວຽງ ທະວີສອນ ເທບພະຈັນ ຄະນະປະຈຳພັກແຂວງຜູ້ຊີ້ນຳວຽກງານວັດທະນະທຳສັງຄົມ, ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະກີລາແຂວງ, ທ່ານ ສີອຸດອນ ທອງສຸວັນ ຮອງຫົວໜ້າພະແນກສຶກສາທິການ ແລະກີລາແຂວງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ສີອຸດອນ ທອງສຸວັນ ກໍໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານປະຈຳສົກປີ 2019-2020 ວ່າ: ໃນສົກຮຽນປີ 2019-2020 ມີອັດຕາເຂົ້າໂຮງຮຽນຂອງ ເດັກອາຍຸ 5 ປີປະຕິບັນໄດ້ 77,3% ເພີ່ມຂຶ້ນຈາກສົກຮຽນຜ່ານມາ 6,1%, ອັດຕາເຂົ້າຮຽນໃໝ່ສຸດທິຊັ້ນປະຖົມປະຕິບັດໄດ້ 98,7% ທຽບໃສ່ສົກຮຽນຜ່ານມາຫຼຸດລົງ 0,2%, ອັດຕາຄ້າງຫ້ອງ ປ1 ປະ ຕິບັດໄດ້ 5,9%, ຫຼຸດລົງ 6,5% ອັດຕາຄ້າງຫ້ອງສຸດທິຊັ້ນປະຖົມປະຕິ ບັດໄດ້ 2,8% ເພີ່ມ 0,2%, ອັດຕາເຂົ້າຮຽນມັດທະຍົມຕົ້ນປະຕິບັດໄດ້ 27,7% ເພີ່ມຂຶ້ນ 0,4%, ອັດຕາເຂົ້າຮຽນລວມຊັ້ນມັດທະຍົມປາຍປະຕິບັດໄດ້ 46,3% ເພີ່ມ ຂຶ້ນ 5,6%, ສົ່ງເສີມໃຫ້ມວນຊົນທຸກເພດ, ທຸກໄວໄດ້ເຂົ້າຮ່ວມການຫັດກາຍຍະບໍລິຫານ, ອອກກຳລັງກາຍແລະການຫຼິ້ນກີລາ-ກາຍະກຳໃຫ້ໄດ້ 26% ຂອງພົນລະເມືອງ ໃນທົ່ວແຂວງປະຕິບັດໄດ້ 30,2% ເພີ່ມຂຶ້ນ 11,8%, ສົ່ງເສີມໃຫ້ນັກຮຽນທີ່ຈົບມັດທະຍົມຕົ້ນໄດ້ເຂົ້າຮຽນຕໍ່ໃນສາຍອາຊີວະສຶກສາປະຕິບັດໄດ້ 6,37% ເພີ່ມຂຶ້ນ 2,1% ທຽບໃສ່ຄາດໝາຍ 5% ແມ່ນບັນລຸຕາມຄາດໝາຍ.

  ທ່ານ ວຽງທະວີສອນ ເທບພະຈັນ ໃຫ້ຮູ້ວ່າ: ການຈັດກອງປະຊຸມຄັ້ງນີ້ແມ່ນມີຄວາມໝາຍຄວາມສຳຄັນສຳລັບຜູ້ບໍລິຫານການສຶກສາ ເພາະເປັນການສະ ຫຼຸບຕີລາຄາຄືນສະພາບການຈັດຕັ້ງປະຕິບັດວຽກງານຮອບດ້ານໃນທົ່ວຂະແໜງການສຶກໃນໄລຍະຜ່ານມາເພື່ອພ້ອມກັນຊອກໃຫ້ເຫັນສິ່ງທີ່ມີຜົນງານ, ຜົນສໍາເລັດ ແລະສິ່ງທີ່ຍັງຄົງຄ້າງພ້ອມກັນກໍານົດທິດທາງ, ວິທີການ ແລະມາດຕະການອັນຈໍາເປັນເພື່ອສືບຕໍ່ຊີ້ນໍາໆພາຈັດຕັ້ງວຽກງານການສຶກສາທົ່ວແຂວງໃນສົກປີຕໍ່ໜ້າໃຫ້ ບັນລຸຜົນຕ້ອງເພີ່ມທະວີເປັນເອກະພາບ ແລະໃຫ້ມີປະສິດຕິພາບຂອງການບໍລິຫານລະບົບການສຶກສາ ໃນທົ່ວແຂວງ, ເພາະການສຶກສາຄືກຸນແຈທີ່ສໍາຄັນທີ່ສຸດ.

----

ໜັງສືພິມ ເສດຖະກິດ-ສັງຄົມ

แชร์