ຫຼວງພະບາງເລັ່ງແປງທາງເພຫຼາຍຈຸດ

 ປະຈຸບັນແຂວງຫຼວງພະບາງໄດ້ມີການສ້າງຂະບວນການເພື່ອຂໍ່ານັບຮັບຕ້ອນກອງປະຊຸມໃຫຍ່ຂອງອົງຄະນະພັກແຂວງຄັ້ງທີ Vlll ຊຶ່ງຈະຈັດຂຶ້ນໃນມໍ່ໆນີ້ໃນນັ້ນຂະບວນ ການອັນພົ້ນເດັ່ນກໍແມ່ນການປັບປຸງບັນດາເສັ້ນທາງຕ່າງໆ ພາຍໃນເທສະບານຂອງນະຄອນຫຼວງພະບາງຈຸດທີ່ເປ່ເພ ແລະເປັນຂຸມ, ຂຸມເລິກເພື່ອຄວາມສວຍງາມ ແລະສະດວກຕໍ່ການສັນຈອນໄປມາຂອງປະຊາຊົນ.

  ທ່ານ ບົງວ່າງ ຫວ່າງເຈຍຊາ ຫົວໜ້າພະແນກໂຍທາທິການ ແລະຂົນສົ່ງແຂວງຫຼວງພະບາງໄດ້ໃຫ້ສໍາພາດຕໍ່ທີມຂ່າວພວກເຮົາວ່າງບໍ່ດົນມານີ້ວ່າ: ເພື່ອເປັນການສ້າງຂະບວນ ການເພື່ອຂໍ່ານັບຮັບຕ້ອນກອງປະຊຸມໃຫຍ່ຂອງອົງຄະນະພັກແຂວງຄັ້ງທີ Vlll ຈະຈັດຂຶ້ນໃນມໍ່ໆນີ້ທາງພະແນກ ຍທຂ ແຂວງຫຼວງພະບາງ ໄດ້ມີການເລັ່ງປັບ ປຸງສ້ອມແປງເສັ້ນທາງ ແລະຖົມຂຸມຕາມເທສະບານນະຄອນຫຼວງພະບາງເປັນຕົ້ນແມ່ນຈຸດແຕ່ 4 ແຍກຕະຫຼາດຊົນເຜົ່າໄປຫາປາກຄານ, ຈຸດ 4 ແຍກວົງວຽນສວນລ້ານຊ້າງທາງໄປສະໜາມບິນພ້ອມນັ້ນກໍໄດ້ປຸກລະດົມປະຊາຊົນສົມທົບທຶນຮອນກັບພາກລັດເພື່ອກໍ່ສ້າງເສັ້ນທາງເຂົ້າຮ່ອມບ້ານເປັນຕົ້ນແມ່ນຮ່ອມບ້ານປ່ອງຄໍາ, ບ້ານນາສໍາພັນໂດຍໄດ້ສົມທົບກັບນະຄອນຫຼວງພະບາງ ແລະ ຫ້ອງການໂຍທາເມືອງພ້ອມກັນຈັດຕັ້ງປະຕິບັດ ແລະ ເສັ້ນທາງແຕ່ສາມແຍກສະຖານີຂອງວິທະຍຸຫາທາງເຂົ້າສະໜາມກ໋ອຟ.

  ນອກຈາກນີ້ແລ້ວກໍຍັງໄດ້ແບ່ງໜ້າວຽກໃຫ້ບັນດາບໍລິສັດຜູ້ຮັບເໝົາແຕ່ລະຈຸດປະຈໍາຢູ່ເສັ້ນທາງຫຼັກເຂົ້າໄປຫາບັນດາເມືອງ ແລະເສັ້ນທາງຫຼວງແຫ່ງຊາດເລກ 13 ເໜືອໃນຂົງເຂດຂອງແຂວງຫຼວງພະບາງຮັບຜິດຊອບເພື່ອແນໃສ່ຊ່ວຍໃຫ້ການແກ້ໄຂເປີດເສັ້ນທາງເມື່ອເກີດມີຝົນຕົກດິນຖະຫຼົ່ມຖົມເສັ້ນທາງໃຫ້ສາມາດທ່ຽວໄດ້ເປັນປົກກະຕິ.

  ພ້ອມນີ້ທ່ານຫົວໜ້າພະແນກໂຍທາທິການ ແລະຂົນສົ່ງ ແຂວງຫຼວງພະບາງ ຍັງໄດ້ຮຽກຮ້ອງເຖິງຜູ້ຂັບຂີ່ທີ່ໃຊ້ລົດໃຊ້ຖະໜົນໃນການເດີນທາງໄປມາໃຫ້ມີສະຕິເນື່ອງຈາກສະພາບອາກາດມີການປ່ຽນແປງມັກເກີດມີຝົນຕົກເຮັດໃຫ້ເສັ້ນທາງມື່ນອັນຈະພາໄປສູ່ການເກີດອຸບັດເຫດຊຶ່ງຈະນໍາຜົນເສຍຫາຍມາສູ່ຕົນເອງກໍຄືຄອບຄົວ.

--------------

ຂ່າວ: ສີສຸວັນ, ຮູບພາບ: #ຫນັງສືພິມເສດຖະກິດສັງຄົມ

แชร์