ເສີມທັກສະໃຫ້ຄູຝືກຜູ້ນຳທ່ຽວ 4 ແຂວງພາກເໜືອ

  ວັນທີ 18 ກັນຍາ 2020 ທີ່ສູນຝຶກອົບຮົມພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງຫຼວງນໍ້າທາ, ໄດ້ສໍາເລັດການຝຶກອົບຮົມໃຫ້ຄູຝຶກໃນການນໍາສະເໜີການຮຽນ-ການສອນສໍາລັບພະນັກງານໃນຂະແໜງການທ່ອງທ່ຽວຕາມແລວທາງເສດຖະກິດເໜືອ-ໃຕ້, ໂດຍການເປັນປະທານຂອງທ່ານ ວຽງຄໍາ ໄຊຍະວົງ ຮອງຫົວໜ້າພະແນກ ຖວທ ແຂວງ, ມີບັນດາວິທະຍາກອນຈາກສະຖາບັນສື່ມວນຊົນ,ວັດທະນະທໍາ ແລະທ່ອງທ່ຽວກະຊວງຖະແຫຼງຂ່າວ,ວັດທະນະທໍາ ແລະ ທ່ອງ ທ່ຽວ, ສໍາມະນາກອນມາຈາກແຂວງບໍ່ແກ້ວ, ຜົ້ງສາລີ, ອຸດົມໄຊແລະແຂວງຫຼວງນໍ້າທາເຂົ້າຮ່ວມ.

  ຊຸດຝຶກອົບຮົມສໍາມະນາກອນໄດ້ຮຽນຮູ້ກ່ຽວກັບຄວາມໝາຍ-ຄວາມສໍາຄັນຂອງການນໍາສະເໜີການຮຽນ-ການສອນສໍາລັບພະນັກງານໃນຂະແໜງການທ່ອງທ່ຽວທີ່ດີ, ຄວາມສໍາຄັນຂອງການນໍາສະເໜີທີ່ດີ, ຄຸນສົມບັດທີ່ດີຂອງຜູ້ນໍາສະເໜີ, ການອອກແບບການນໍາສະເໜີ, ການສ້າງໂຄງສ້າງການນໍາສະເໜີ, ເຕັກນິກການຄວບຄຸມຄວາມຕື່ນເຕັ້ນ, ຄວາມສໍາຄັນ ແລະໜ້າທີ່ຂອງຄູຝຶກ, ການແຕ່ງບົດສອນ, ການແນະນໍາຕົນເອງກ່ອນປະກອບຄວາມເຫັນໃນກອງປະຊຸມ ແລະການເປັນພິທີກອນແນະນໍາວິທະຍາກອນ.

  ພ້ອມນັ້ນຍັງໄດ້ເນັ້ນການຮຽນ-ການສອນແລ້ວເອົາໄປນໍາໃຊ້ຕົວຈິງເປັນຕົ້ນແມ່ນການສົ່ງຄວາມຮູ້ໃຫ້ວິທະຍາກອນໄດ້ປະສົບການຕົວຈິງ ແລະສັງເກດການ-ວິທີການແກ້ໄຂຂໍ້ບົກຜ່ອງ ແລະ ກ້ານໍາສະເໜີ, ດ້ານຄວາມຮູ້ເລື່ອງການບໍລິການ ແລະ ການທ່ອງທ່ຽວ, ດ້ານປະສົບການ-ການສອນ, ການຈັດງານການບໍລິການ ແລະ ການທ່ອງທ່ຽວ-ການຕ້ອນຮັບ, ດ້ານການສຶກສາ ແລະປະສົບການໃນການເດີນທາງ ແລະ ການທ່ອງທ່ຽວມັນເປັນສ່ວນໜຶ່ງຂອງຄວາມສໍາເລັດດ້ານອາຊີບເພື່ອໃຫ້ປະສົບຜົນສໍາເລັດໃນການນໍາສະເໜີທີດີ ແລະຜູ້ນໍາສະເໜີຕ້ອງມີຄວາມເຂົ້າໃຈກ່ຽວກັບຄວາມໝາຍຄວາມສໍາຄັນຂອງການນໍາສະເໜີຂັ້ນຕອນ, ຄຸນລັກສະນະທີ່ດີຂອງການນໍາສະ ເໜີເພີ່ອເສີມສ້າງຄຸນລັກສະນະຕ່າງໆ ລວມທັງການພັດທະນາທັກສະທີ່ເປັນເອກະລັກສະເພາະຂອງຕົນໃນການນໍາສະເໜີຢ່າງມີປະສິດຕິຜົນ.

ໂອກາດດັ່ງກ່າວຍັງໄດ້ມອບໃບຢັ້ງຢືນສຳເລັດຊຸດຝືກອົບຮົມໃຫ້ສຳມະນາກອນມອບໂດຍທ່ານ ວຽງຄຳ ໄຊຍະວົງ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະທ່ອງທ່ຽວ.

-----------------

ຂ່າວ: ມຸນຕີ, ຮູບພາບ: #ຫນັງສືພິມເສດຖະກິດສັງຄົມ

แชร์