ມສ ທົ່ງມີໄຊ ປະຊຸມສະມາຄົມພໍ່່ແມ່ນັກຮຽນ

  ວັນທີ 17 ກັນຍາ 2020 ທີ່ໂຮງຮຽນ ມສ ທົ່ງມີໄຊ ແຂວງໄຊຍະບູລີ ໄດ້ຈັດກອງປະຊຸມສະມາຄົມພໍ່ແມ່ນັກຮຽນຂຶ້ນຢ່າງເປັນທາງການໂດຍການເປັນປະ ທານຂອງທ່ານ ສຸກັນ ທອງປະເສີດ ຜູ້ອຳນວຍການໂຮງຮຽນ ມສ ທົ່ງມີໄຊ, ເຂົ້າຮ່ວມຂອງທ່ານ ສົມພອນ ໄຊດວງຕາ ເຈົ້າເມືອງໆທົ່ງມີໄຊ, ມີຄະນະປະຈຳພັກເມືອງ, ກຳມະການພັກເມືອງ,ຫົວໜ້າຫ້ອງການ,ຄູ-ອາຈານ, ອຳນາດການປົກຄອງບ້ານ,ສະມາຄົມພໍ່ແມ່ນັກຮຽນຜູ້ປົກຄອງນັກຮຽນຕະຫຼອດຮອດນ້ອງນັກຮຽນເຂົ້າຮ່ວມຢ່າງພ້ອມພຽງ.  

  ໃນກອງປະຊຸມທ່ານ ສຸກັນ ທອງປະເສີດ ຜູ້ອຳນວຍການໂຮງຮຽນ ມສ ທົ່ງມີໄຊ ຂຶ້ນຜ່ານບົດສະຫຼຸບປະຈຳສົກຮຽນ 2019-2020 ຊຶ່ງ ໂຮງຮຽນ ມສ ທົ່ງມີໄຊ ເປັນໂຮງຮຽນທີ່ມີສາຍຕັ້ງຂຶ້ນກັບພະແນກສຶກສາທິການ ແລະກີລາແຂວງໄຊຍະບູລີ, ມີລະບົບການຄຸ້ມຄອງແນວຄິດການເມືອງ, ການຈັດຕັ້ງພາຍໃຕ້ການຊີ້ນຳໆ ພາຂອງຫົວໜ້າຫ້ອງການສຶກສາທິການ ແລະກີລາເມືອງທົ່ງມີໄຊໃນສົກຮຽນ 2019-2020 ມີອາຄານຮຽນ 3 ຫຼັງ ມີ 19 ຫ້ອງຮຽນແຕ່ ມ1 ຮອດ ມ7, ມີພະນັກງານຄູ-ອາຈານທັງໝົດ 52 ຄົນ,ຍິງ 31 ຄົນ ມີນັກຮຽນທັງໝົດ 478 ນ້ອງ ຍິງ 238 ນ້ອງມີຄະນະສະມາຄົມພໍ່ແມ່ນັກຮຽນ 7 ທ່ານ ຍິງ 2 ທ່ານກຳມະການ 9 ທ່ານ ຍິງ 1 ທ່ານ.

   ໃນໜຶ່ງສົກຮຽນຜ່ານມາເຫັນວ່າພະນັກງານຄູ-ອາຈານ ແລະນ້ອງນັກຮຽນຄະນະສະມາຄົມພໍ່ແມ່ນັກຮຽນໄດ້ມີແນວຄິດການເມືອງທີ່ໜັກແໜ້ນມີຄວາມຈູບຈ້າວຫ້າວຫັນຕໍ່ໜ້າທີ່ວຽກງານຂອງຕົນຢ່າງຕັ້ງໜ້າ ແລະມີຜົນສຳເລັດດີ, ໄດ້ເອົາໃຈໃສ່ສົມທົບກັບຄະນະອຳນວຍການໂຮງຮຽນສຶກສາອົບຮົມ, ຕິດຕາມການປະຕິບັດການຮຽນ-ການສອນຂອງຄູ-ອາຈານ ແລະນ້ອງນັກຮຽນຢ່າງເປັນປົກກະຕິ, ເຮັດໃຫ້ຄູ-ອາຈານສາມາດປະຕິບັດໂຄງການຫຼັກສູດໄດ້ 100% ສາມາດສ້າງນັກຮຽນເກັ່ງເປັນຕົວແທນຂອງເມືອງເຂົ້າຮ່ວມການສອບເສັງຂັ້ນແຂວງໄດ້ທັງໝົດ 6 ນ້ອງ ຍິງ 6 ນ້ອງ, ໄດ້ເຂົ້າຮ່ວມງານຕອບຖາມຄວາມຮູ້ວິທະຍາສາດຂັ້ນແຂວງ 1 ຄັ້ງ ຜົນການ ແຂ່ງຂັນສາມາດຍາດໄດ້ທີ 1 ຂອງແຂວງ, ການສອບເສັງປະຈຳປີສາມາດບັນລຸໄດ້ຄືມັດທະຍົມຕອນຕົ້ນໄດ້ 100%, ມັດທະຍົມຕອນປາຍ ໄດ້ 100%.

  ພ້ອມດຽວກັນນີ້ກອງປະຊຸມຍັງໄດ້ເປັນເອກະພາບກັນຮັບຮອງເອົາຄະນະປະທານສະມາຄົມຊຸດໃໝ່ຈຳນວນ 9 ທ່ານ, ຍິງ 3 ທ່ານ, ກໍາມະການ 14 ທ່ານ, ຍິງ 2 ທ່ານ ແລະໄດ້ຮັບຮອງເອົາກົດລະບຽບຂອງໂຮງຮຽນບາງມາດຕາທີ່ປັບປຸງໃໝ່ໃຫ້ສອດຄ່ອງກັບສະພາບຕົວຈິງ, ຈາກນັ້ນກອງປະຊຸມຍັງໄດ້ມອບໃບກຽດຕິຄຸນ ແລະໃບຊົມເຊີຍຂອງທ່ານເຈົ້າເມືອງໃຫ້ກັບຜູ້ທີ່ມີຄຸນງາມ, ຄວາມດີປະກອບຊຸກຍູ້ເປັນວັດຖຸ, ສິ່ງຂອງຕ່າງໆ ເຂົ້າໃນການຮຽນການສອນຂອງໂຮງຮຽນນຳອີກ.

 

แชร์