ຮອງປະທານ ສນຊ ເຜີຍແຜ່ກ່ຽວກັບການສະຫຼອງວັນບຸນ ຢູ່ຊຽງຂວາງ

  ໃນຕອນເຊົ້າຂອງວັນທີ 16 ກັນຍາ 2020 ທ່ານ ເຍ່ຍ ເກີຢ່າ ໜໍຈໍຈົງຕົວຮອງປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະໄດ້ລົງເຜີຍແຜ່ຄໍາແນະນໍາກ່ຽວກັບການສະເຫຼີມສະຫຼອງວັນບຸນຕ່າງໆ ແລະ ປະຕິບັດບາງຮີດຄອງປະເພນີຂອງປະຊາຊົນລາວບັນດາຊົນເຜົ່າຢູ່ຫ້ອງວ່າການແຂວງຊຽງຂວາງ, ເປັນກຽດເຂົ້າ ຮ່ວມມີ ທ່ານ ດຳດີ ນັນທະວົງ ປະທານແນວລາວສ້າງຊາດແຂວງຊຽງຂວາງ, ພະອາຈານ ວັນນະສົມ ບຸດດາວົງ ປະທານອົງການພຸດທະສາສະໜາສຳພັນລາວແຂວງຊຽງຂວາງມີບັນດາຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ຜູ້ຊົງຄຸນວຸດທິ, ເຈົ້າກົກ-ເຈົ້າເຫຼົ່າຕະຫຼອດຮອດພະນັກງານແນວລາວສ້າງຊາດແຂວງເຂົ້າ ຮ່ວມ.

  ຈຸດປະສົງການລົງເຜີຍແຜ່ຄັ້ງນີ້ກໍ່ເພື່ອເປັນການອະນຸລັກ ແລະເສີມຂະຫຍາຍຮີດຄອງປະເພນີວັດທະນະທໍາອັນດີງາມແນ່ໃສ່ເພີ່ມທະວີຄວາມສະເໝີພາບ ແລະຄວາມສາມັກຄີປອງດອງຂອງປະຊາຊົນລາວບັນດາເຜົ່າ, ພ້ອມກັນຍົກສູງສະຕິຄວາມເປັນເຈົ້າຕົນເອງຈັດຕັ້ງການສະເຫຼີມສະຫຼອງວັນບຸນຕ່າງໆ ແລະດໍາເນີນຮີດຄອງປະເພນີອື່ນໆ ໃຫ້ເປັນເອກະພາບທາງດ້ານເນື້ອໃນ, ຮູບການ, ວິທີການ, ເວລາ ແລະແກ້ໄຂສິ່ງກີດຂວາງ,ປາກົດການຫຍໍ້ຕ່າງໆໃນສັງຄົມຕໍ່ການພັດທະນາໃນເງື່ອນໄຂປະຈຸບັນ.

  ທ່ານຮອງປະທານສູນກາງແນວລາວສ້າງຊາດ ໃຫ້ຮູ້ອີກວ່າ: ການສະເຫຼີມສະຫຼອງວັນບຸນແມ່ນແນ່ໃສ່ອະນຸລັກ, ປົກປັກຮັກສາ ແລະສົ່ງເສີມກິດຈະກໍາທີ່ເປັນເອກະລັກທາງດ້ານຮີດຄອງປະເພນີ, ວັດທະນະທໍາອັນດີງາມຂອງຊາດ ແລະຂອງຊົນເຜົ່າ; ເອົາໃຈໃສ່ປ້ອງກັນຄວາມສະຫງົບ ແລະຄວາມປອດໄພໃນໄລຍະເວລາກ່ອນ ແລະຫຼັງການຈັດຕັ້ງປະຕິບັດ, ທັງເປັນການຫຼຸດຜ່ອນການຫຼິ້ນກິນຟູມເຟື້ອຍ, ຄຽງຄູ່ກັນນັ້ນ, ທ່ານໄດ້ເນັ້ນບາງບັນຫາຕື່ມອີກເຊັ່ນ: ໃຫ້ເພີ່ມທະວີການຕ້ານ ແລະ ສະກັດກັ້ນການສ້າງຄອບຄົວໃໝ່ທີ່ບໍ່ຖືກຕ້ອງຕາມລະບຽບກົດໝາຍວາງອອກ, ດ້ານຄວາມເຊື່ອຖືສາສະໜາຕ່າງໆຕ້ອງໃຫ້ຖືກ ຕ້ອງ, ສອດຄ່ອງກັບແນວທາງນະໂຍບາຍຂອງພັກ, ກົດໝາຍເປັນຕົ້ນດ້ານປາກົດການຫຍໍ້ທໍ້ຕ່າງໆທີ່ເກີດຂຶ້ນຢູ່ໃນບຸນປະເພນີຕ່າງໆ,ເກີດຂຶ້ນຢູ່ໃນການຈັດຕັ້ງສັງຄົມເພື່ອມີທິດທາງການແກ້ໄຂຕໍ່ໄປເຮັດໃຫ້ແຂວງຊຽງຂວາງມີການພັດທະນາ ແລະມີຄວາມສະຫງົບສຸກໂດຍພື້ນຖານ.

• 21/09/2020