ບຸນນະມັດສະການ ພະທາດຕຸມພະວັງ

  ໃນລະຫວ່າງວັນທີ 13-20 ກຸມພາ 2019 ພໍ່ແມ່ປະຊາຊົນກຸ່ມບ້ານນາວາງໃຫຍ່ ເມືອງໜອງບົກ ແຂວງຄຳມ່ວນໄດ້ຈັດພິທີເປີດງານ ບຸນນະມັດສະການ  ພະທາດຕຸມພະ ວັງປູສະນີຍະຖານອັນເກົ່າແກ່  ແລະ ເຊື່ອວ່າຄວາມສັກສິດທີ່ໄດ້ຮັບ ຄວາມເຄົາລົບນັບຖືຈາກປະຊາຊົນ ພາຍໃນບ້ານ ແລະນັກທ່ອງທ່ຽວ ໄປນົບໄຫວ້ຂໍພອນ.

  ໃນພິທີທ່ານ ພູເງິນ ລັດຖະຈັກ ນາຍບ້ານໆນາວາງໃຫຍ່ ໄດ້ວ່າ: ງານບຸນນະມັດສະການພະທາດ ຕຸມພະວັງ ເຄີຍປະຕິບັດທຸກໆປີນັບຕັ້ງແຕ່ມື້ທີ່ໄດ້ຮັບກໍ່ສ້າງອົງພະທາດສຳເລັດມາຮອດປະຈຸບັນ ຊຶ່ງໄດ້ ສືບທອດ ແລະຖືເອົາເດືອນສາມ ເພັງຂອງທຸກໆປີເປັນວັນຈັດງານ ບຸນພ້ອມກັບງານບຸນນະມັດສະການ ພະທາດສີໂຄດຕະບອງ ແລະພະທາດພະນົມໃນເມື່ອກອ່ນປະຊາຊົນ ເອີ້ນວ່າບຸນໄຫວ້ພະທາດແຕ່ວ່າ ງານດັ່ງກ່າວຍັງມີລັກສະນະແຄບ ແລະບໍ່ກວ້າງຂວາງເທົ່າທີຄວນດັ່ງ ນັ້ນເພື່ອເຮັດໃຫ້ສະຖານທີ່ອັນສຳ ຄັນທາງດ້ານວັດທະນະທຳເປັນປະຫວັດສາດທີ່ມີການສັກກະລະບູຊາ ໄດ້ຮັບການປົກປັກຮັກສາ  ແລະປະ ຕິສັງຂອນໃຫ້ຄົງຢູ່ຕະຫຼອດໄປ ຈຶ່ງໄດ້ມີການເສີມຂະຫຍາຍກິດຈະກຳ ທ່ອງທ່ຽວງານບຸນນະມັດສະການ ພະທາດຕຸມພະວັງ ໃຫ້ມີການແຜ່ຂະ ຫຍາຍອອກຢ່າງກວ້າງຂວາງພ້ອມທັງເປັນການອານຸລັກສົ່ງເສີມໃຫ້  ກາຍເປັນງານບຸນປະເພນີຂອງບ້ານ ນາວາງໃຫຍ່ ເມືອງໜອງບົກ ກໍ່ຄື ແຂວງຄຳມ່ວນ.

  ນອກນັ້ນຍັງໄດ້ມີການຊົມການ ສະແດງສິລະປະວັນນະຄະດີຂອງ ເຜົ່າທ້ອງຖິ່ນຢ່າງເປັນຂະບວນການທີ່ມີຄວາມສວຍສົດງົດງາມ ເຕັມໄປດ້ວຍບັນຍາກາດອັນເບີກ ບານມ່ວນຊື່ນ. ທັງນີ້ກໍເພື່ອເປັນ ການອະນຸລັກຮັກສາຮີດຄອງອັນດີ ງາມຂອງພໍ່ແມ່ປະຊາຊົນໃນກຸ່ມ ບ້ານນາວາງໃຫຍ່ ເມືອງໜອງບົກ ແຂວງຄຳມ່ວນ.

ຮຽບຮຽງໂດຍ: ນໍ້າເໝີຍ

• 19/02/2019