ທຳລາຍສວນຝິ່ນ ພ້ອມກ່າວເຕືອນຜູ້ລັກລອບປູກ 126 ຄອບຄົວ

  ຕາມການໃຫ້ຂໍ້ມູນຂອງສະຫາຍ ພັຕ ສິນນະກອນ ຄູນວົງພົມ ຮອງຫົວໜ້າກອງບັນຊາການ ປກສ ເມືອງລອງ ແຂວງຫຼວງນໍ້າທາ ໃຫ້ຮູ້ວ່າ: ໂດຍປະຕິບັດຕາມຄຳສັ່ງເລກທີ 01 ຂອງທ່ານ ເຈົ້າແຂວງໆຫຼວງນໍ້າທາວ່າດ້ວຍການກວດກາຄວບຄຸມ ແລະສະກັດກັ້ນການລັກລອບປູກຝິ່ນ, ສູບຝິ່ນຄືນໃໝ່ ແລະ ການລັກລອບຄ້າ-ຂາຍຢາເສບຕິດປະເພດຕ່າງໆເລ່ີມແຕ່ວັນທີ 28 ມັງກອນ-10 ກຸມພາ 2019 ກອງບັນຊາການ ປກສ ເມືອງລອງ ໂດຍສົມທົບກັບພະແນກຕໍາຫຼວດກວດກາ ແລະຄວບຄຸມຢາເສບຕິດ ປກສ ແຂວງ, ໄອຍະການ, ຍຸຕິທໍາ, ແຜນການ, ກອງບັນຊາການທະຫານເມືອງ, ກອງກໍ່ສ້າງຮາກຖານ ແລະອຳນາດການປົກຄອງບ້ານທີຂຶ້ນກັບກຸ່ມຈົງກາ, ກຸມພາງົວລົງສຳຫຼວດພື້ນທີ່ຕາມແຫຼ່ງຂ່າວຈາກພົນລະເມືອງດີວ່າມີປະຊາຊົນບ້ານໝາກພ້າວ ແລະບ້ານພິ່ນຫໍ້ທີ່ຂຶ້ນກັບກຸ່ມຈົງກາລັກລອບປູກຝິ່ນເນື້ອທີປະມານ 10 ພັນກ່ວາເຮັກຕາ ແລະປະຊາຊົນບ້ານແມ່ຂົງ, ບ້ານສາມສົບ, ບ້ານຈ່າຄຳລື, ບ້ານຜາງົວ, ບ້ານໄອແສງ, ບ້ານສົບປານເກົ່າ, ບ້ານຈ່າຄຳຕັນ ແລະ ບ້ານສົບປານໃໝ່ທີ່ຂຶ້ນກັບກຸ່ມຜາງົວລັກລອບປູກຝິ່ນເນື້ອທ່ີປະມານ 17 ພັນກ່ວາເຮັກຕາ.

  ຜ່ານການລົງກວດກາ ແລະເອົາຂໍ້ມູນຕົວຈິງທັງສອງກຸ່ມມີໄດ້ເຕົ້າໂຮມສຶກສາອົບຮົມ 126 ຄອບຄົວ ລັກລອບປູກຝິ່ນຈາກນັ້ນຈຶ່ງໄດ້ສຶກສາອົບຮົມກ່າວເຕືອນພ້ອມທັງສ້າງບົດບັນທຶກລົງລາຍເຊັ່ນເພືອໄວ້ເປັນຫຼັກຖານບໍ່ໃຫ້ເຂົາເຈົ້າສືບຕໍ່ປູກຝິ່ນອີກ.

  ສະຫາຍ ພັຕ ສິນນະກອນ ຄູນວົງພົມ ໃຫ້ຮູ້ຕືມອີກວ່າ: ພາຍຫຼັງສ້າງບົດບັນທຶກສຶກສາອົບຮົມແລ້ວກໍ່ໄດ້ນຳພາທີມງານລົງທຳລາຍຕົ້ນໝາກຢາຝິ່ນດ້ວຍວິທີການຫຼົກ, ເອົາພ້າຖາງ ແລະຮູບການອ່ືນໆເພ່ືອບໍ່ໃຫ້ເຈົ້າຂອງສ່ວນຫຼືຜູ້ອືນໆສາມາດເກັບກູ້ເອົານໍ້າຢາຝິ່ນໄດ້ຕື່ມອີກ.

 ພາຍຫຼັງສຳເລັດການທຳລາຍຢູ່ສອງຈຸດດັ່ງກ່າວແລ້ວຍັງຈະສືບຕໍ່ລົງທຳລາຍຢູ່ເຂດກຸ່ມບ້ານສີວິໄລຕືມອີກ.

• 19/02/2019