ຊີເອັນພີ ຮັບໂກຕ້າສົ່ງອອກແຮ່ 2 ແສນໂຕນ ໄປຕະຫຼາດຈີນ

  ບໍລິສັດຊີເອັນພີ ສຳຫຼວດ ແລະຂຸດຄົ້ນບໍ່ແຮ່ເປັນບໍລິສັດຖືວ່າຢູ່ລະດັບແຖວໜ້າຂອງລາວທີ່ມີປະສົບການຫຼາຍ 20 ກວ່າປີແລະຮັບຄວາມເຊື່ອໝັ້ນລູກຄ້າຊຶ່ງປີນີ້ທາງບໍລິ ສັດໄດ້ຮັບໂກຕາຈາກລັດຖະບານໃຫ້ສົ່ງແຮ່ອອກສູ່ຕະຫຼາດຈີນຈຳນວນ2 ແສນໂຕນ ແລະສະເພາະເດືອນກໍລະກົດ ຜ່ານມາສົ່ງໄປແລ້ວ 50 ພັນໂຕນ.

  ເມື່ອບໍ່ດົນມານີ້ ທ່ານ ນາງ ຈັນນະພາ ວົງສະໝໍລະພູມ ປະທານບໍລິສັດຊີເອັນພີສຳຫຼວດ-ຂຸດຄົ້ນບໍ່ແຮ່ ຈຳກັດ ໃຫ້ສຳພາດວ່າ: ບໍລິສັດ ຊີເອັນພີ ສຳຫຼວດ-ຂຸດຄົ້ນບໍ່ແຮ່ຂາເຂົ້າ-ຂາອອກຈຳກັດສ້າງຕັ້ງໃນປີ 2004 ຈຶ່ງໄດ້ດຳເນີນການຊອກຂຸດຄົ້ນບໍ່ເຫຼັກຢູ່ ເມືອງຫຼາ ແຂວງອຸດົມໄຊ, ບໍ່ທອງແດງ ແລະບໍ່ຊືນສັງກະສີ, ຊຶ່ງເປັນທຸລະກິດໜຶ່ງທີ່ກ້າວມາຈາກການດຳເນີນຂຸດຄົ້ນບໍ່ແຮ່ແລະໄດ້ເຊັນສັນຍາກັບລັດຖະບານເພື່ອຊອກຄົ້ນສຳຫຼວດບໍ່ແຮ່ເຫຼັກ, ຊືນ ແລະ ສັງກະສີ, ພ້ອມທັງໄດ້ລົງສ້າງຕັ້ງໂຮງງານຂຸດຄົ້ນແຮ່ໃນປີ 2011 ແລະມາໃນປີ 2013-2014 ໄດ້ເລີ່ມຂຸດຄົ້ນແຮ່ເຫຼັກສົ່ງອອກຈຳນວນ 5 ແສນໂຕນ, ໂດຍແຮ່ທັງໝົດແມ່ນໄດ້ຜ່ານການປຸງແຕ່ງສຳເລັດເພື່ອສົ່ງອອກໄປຈີນ.

  ມາຮອດປະຈຸບັນບໍລິສັດມີສິນຄ້າສະສົມໄວ້ 7 ແສນໂຕນ ເພື່ອສ້າງລາຍຮັບໃຫ້ແກ່ລັດຖະບານ, ຊ່ວຍໃຫ້ປະຊາຊົນມີວຽກເຮັດງານທຳປົກກະຕິ, ແຕ່ນີ້ຮອດທ້າຍປີພວກເຮົາຈະຜະລິດ ແລະສົ່ງອອກໃຫ້ໄດ້ຄາດໝາຍຖ້າຜ່ານພົ້ນວິກິດໂຄວິດບໍລິສັດຈະສາມາດຂົນສົ່ງໄດ້ 3-5 ພັນໂຕນຕໍ່ວັນ.

  ທ່ານ ນາງ ຈັນນະພາ ວົງສະໝໍລະພູມ ໃຫ້ຮູ້ຕື່ມວ່າ: ໃນໄລຍະວິກິດໂຄວິດຜ່ານມາ, ການດຳເນີນທຸລະກິດຂອງບໍລິສັດແມ່ນໄດ້ຮັບຄວາມເອົາໃຈໃສ່ຈາກລັດຖະບານ ແລະຄະນະສະເພາະກິດທີ່ໄດ້ລົງໄປຢ້ຽມຢາມ, ເຮັດວຽກຢູ່ພາກສະໜາມຮ່ວມກັບບໍລິສັດ ເພື່ອໃຫ້ທຸລະກິດໄດ້ດຳເນີນເປັນປົກກະຕິ, ເພື່ອໃຫ້ປະຊາຊົນ 80-90% ໄດ້ມີວຽກເຮັດງານທຳ, ໃນນັ້ນ 70% ແມ່ນຄົນທ້ອງຖິ່ນນັ້ນ, ຊຶ່ງໃນໄລຍະວິກິດໂຄວິດບໍລິສັດໄດ້ປິດຊົ່ວຄາວແຕ່ກໍຍັງສືບຕໍ່ຈ່າຍເງິນໃຫ້ກັບພະນັກງານເປັນປົກກະຕິ, ຄຽງຄູ່ກັບການຈ່າຍເງິນໃຫ້ກັບພະນັກງານເປັນປົກກະຕິແລ້ວ, ບໍລິສັດຍັງໄດ້ປະກອບສ່ວນຊ່ວຍເຫຼືອສັງຄົມທັງກ່ອນ ແລະຫຼັງມີການລະບາດພະຍາດໂຄວິດເຂົ້າມາ.

  ທ່ານ ນາງ ເພັດນະພາ ວົງສະໝໍລະພູມ ຜູ້ຈັດການບໍລິສັດຊີເອັນພີສຳຫຼວດ-ຂຸດຄົ້ນບໍ່ແຮ່ຈຳກັດ ໄດ້ໃຫ້ຮູ້ວ່າ: ສະເພາະໄລຍະໂຄວິດ-19, ບໍລິສັດໄດ້ຊ່ວຍເຫຼືອສັງຄົມ ເປັນຕົ້ນແມ່ນອາຫານ, ເຄື່ອງປ້ອງກັນພະຍາດໂຄວິດໃຫ້ແກ່ພະນັກງານ ແລະ ຊຸມຊົນອ້ອມຂ້າງເຂດສຳປະທານ ແລະ ກ່ອນໜ້ານີ້ກໍໄດ້ສ້າງໂຮງຮຽນ, ວັດ, ເສັ້ນທາງ ແລະ ຕໍ່ໜ້າຍັງຈະສ້າງສຸກສາລາໃຫ້ແກ່ບ້ານອີກດ້ວຍ, ແຕ່ລະໄລຍະຜ່ານມາທາງບໍລິສັດກໍໄດ້ໃຫ້ການຊ່ວຍເຫຼືອສັງຄົມໃນໄລຍະຜ່ານມາ...ສ້າງໂຮງຮຽນ, ວັດ, ເສັ້ນ ທາງ ແລະຕໍ່ໜ້າຍັງຈະສ້າງສຸກສາລາໃຫ້ແກ່ບ້ານອີກດ້ວຍ.

   ປະຈຸບັນເຖິງສະພາບໂຄວິດ 19 ຢູ່ປະເທດຂອງພວກເຮົາສາມາດຄວບຄຸມໄດ້, ແຕ່ທົ່ວໂລກຍັງມີການລະບາດຢູ່, ສະນັ້ນເພື່ອຄວາມປອດໄພຂອງພະນັກງານ, ບໍລິສັດຈຶ່ງໄດ້ມີມາດຕະການໃນການຄຸ້ມຄອງດ້ວຍການຜັດປ່ຽນພະນັກງານເຂົ້າ-ອອກ, ຮັກສາໄລຍະຫ່າງ ແລະໃສ່ຜ້າອັດປາກດັງ.

แชร์