ຝຶກອົບຮົມກຽມພ້ອມສໍາລັບບໍລິການຕະຫຼາດທ່ອງທ່ຽວຈີນ

   ໃນວັນທີ 15 ກັນຍາ 2020 ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງໄຊຍະບູລີ ໄດ້ຈັດຊຸດອົບຮົມການກຽມພ້ອມສໍາລັບບໍລິການຕະຫຼາດທ່ອງທ່ຽວຈີນ, ໂດຍເປັນກຽດເຂົ້າຮ່ວມຂອງທ່ານ ນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງ, ມີວິທະຍາກອນຈາກສະຖາບັນສື່ມວນຊົນ, ວັດທະນະທໍາ ແລະທ່ອງທ່ຽວກະຊວງ ຖວທ, ມີບັນດານັກທຸລະກິດ, ຜູ້ປະກອບການເຮືອນພັກ-ຮ້ານອາຫານເຂົ້າຮ່ວມ.

  ທ່ານ ນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງໄດ້ໃຫ້ຮູ້ວ່າ: ໃນປີ 2019 ຜ່ານມາ ລັດຖະບານໄດ້ເປີດໃຫ້ເປັນປີທ່ອງທ່ຽວລາວ-ຈີນ, ຊຶ່ງແຂວງໄຊຍະບູລີກໍ່ໄດ້ຈັດຕັ້ງປະຕິບັດບັນດາກິດຈະກໍາສົ່ງເສີມປີທ່ອງ ທ່ຽວລາວ-ຈີນ 2019 ຂຶ້ນຢ່າງເປັນຂະບວນ ກວ້າງຂວາງ ໂດຍສຸມໃສ່ຈັດຕັ້ງປະຕິບັດບັນດາກິດຈະກໍາທີ່ເປັນກິດຈະກໍາຫຼັກ ແລະກິດຈະກໍາປິ່ນອ້ອມ ເພື່ອໂຄສະນາ ແລະດຶງດູດນັກທ່ອງ ທ່ຽວທັງພາຍໃນ ແລະຕ່າງປະເທດໂດຍສະເພາະແມ່ນນັກທ່ອງທ່ຽວ ສປ ຈີນ, ປະຈຸບັນທົ່ວແຂວງມີແຫຼ່ງທ່ອງທ່ຽວທັງໝົດ 96 ແຫ່ງຄື: ແຫຼ່ງທ່ອງທ່ຽວທໍາມະຊາດມີ 71 ແຫ່ງ, ແຫຼ່ງທ່ອງທ່ຽວວັດທະນະທໍາ 18 ແຫ່ງ ແລະແຫຼ່ງທ່ອງທ່ຽວປະຫວັດສາດ 7 ແຫ່ງ, ໄດ້ເປີດບໍລິການແລ້ວ 52 ແຫ່ງ, ມີບໍລິສັດທ່ອງທ່ຽວ 16 ບໍລິສັດ, ໂຮງແຮມ 7 ແຫ່ງ,ເຮືອນພັກ 177 ແຫ່ງ, ລີສອດ 4 ແຫ່ງ,ຮ້ານອາຫານ 90 ຮ້ານ, ຮ້ານບັນເທີງ 22 ຮ້ານ ແລະຮ້ານກິນດື່ມ 34 ແຫ່ງ; ມີນັກທ່ອງທ່ຽວເຂົ້າແຂວງໄຊຍະບູລີທັງໝົດ 146.394 ຄົນໃນນັ້ນເປັນນັກທ່ອງທ່ຽວຈີນ 1.668 ຄົນ ສາມາດສ້າງລາຍຮັບຈາກການທ່ອງທ່ຽວໄດ້ 7,7 ລ້ານກວ່າໂດລາ.

  ຊຸດອົບຮົມຄັ້ງນີ້ບັນດາຜູ້ເຂົ້າຮ່ວມຈະໄດ້ຮຽນຮູ້ຂໍ້ມູນພື້ນຖານກ່ຽວກັບປະເທດຈີນ, ການຈະເລີນເຕີບໂຕ ແລະສະພາບການທ່ອງທ່ຽວຈີນ, ຕະຫຼາດການທ່ອງທ່ຽວຈີນ ໂດຍລວມ, ສ່ວນແບ່ງຕະຫຼາດ ການທ່ອງທ່ຽວຈີນ, ຄຸນລັກສະນະ ແລະພຶດຕິກໍາຂອງນັກທ່ອງທ່ຽວ ຈີນ, ຄວາມຕ້ອງການ ແລະຄວາມຄາດຫວັງ, ການສ້າງຄວາມປະທັບໃຈໃນການຕ້ອນຮັບນັກທ່ອງທ່ຽວຈີນ, ການປັບຜະລິດຕະພັນໃຫ້ແທດເໝາະກັບຕະຫຼາດຕ່າງໆຂອງຈີນ (ການປັບຜະລິດຕະພັນຈາກກວ້າງຫາສະເພາະເຈາະ ຈົງ, ສ້າງເອກະລັກ), ສ້າງໂອກາດໃນການຖ່າຍຮູບ, ການຕິດຕາມຜູ້ນໍາທີ່ມີຊື່ສຽງ, ສ້າງຈຸດເດັ່ນ ຫຼື ເອກະລັກທີ່ນັກທ່ອງທ່ຽວຈີນສາມາດຄິດເຫັນພາບໄດ້, ຕະຫຼາດນັກທ່ອງທ່ຽວລະດັບຫຼູ, ລັກສະນະ ແລະຄວາມມັກຂອງນັກທ່ອງທ່ຽວເສດຖີຈີນ, ການເລືອກຈຸດໝາຍປາຍທາງ ແລະພຶດຕິກໍາການເດີນທາງແບ່ງຕາມອາຍຸ, ຊ່ອງທາງການສື່ສານ ແລະການແຈກຈ່າຍຜະລິດຕະພັນ, ວິທີການເຮັດການຕະຫຼາດonline ແລະoffline ສໍາລັບຕະຫຼາດຈີນ.

 

แชร์