ສະມາຄົມການຄ້າໄອຊີທີລາວ ຜຸ້ສົ່ງເສີມພາກທຸລະກິດ

  ກອງປະຊຸມໃຫຍ່ປະຈຳປີ 2020 ຂອງສະມາຄົມໄອຊີທີລາວ ຫຼື LICA ໄດ້ຈັດຂຶ້ນໃນວັນທີ 16 ກັນຍາ 2020 ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະການສື່ສານ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາ ຫະກຳແຫ່ງຊາດລາວພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

  ທ່ານ ທະນົງສິນ ກັນລະຍາ ປະທານ ກິຕິມະສັກ, ອະດີດປະທານສະມາຄົມໄອຊີທີລາວໃຫ້ຮູ້ວ່າ: ໄລຍະ 5 ປີຜ່ານມາ LICA ໄດ້ມີບົດບາດໃນການສົ່ງເສີມຜູ້ປະກອບການທຸລະກິດລິເລີ່ມ (Startup) ຢ່າງຫຼວງຫຼາຍ ແລະໄດ້ຮ່ວມມືກັບພາກລັດໃນການຈັດງານເພື່ອສົ່ງເສີມຂະແໜງການເຊັ່ນ: ງານວາງສະແດງໄອຊີທີລາວ, ການແຂ່ງຂັນຂອງນັກສຶກສາ, ໄວໜຸ່ມ, ກອງປະຊຸມຝຶກອົບຮົມຕ່າງໆ ເພື່ອສ້າງຂະບວນການວຽກງານໄອຊີທີໃຫ້ມີຄວາມຟົດຟື້ນ, ນອກນັ້ນ LICA ຍັງໄດ້ເຂົ້າຮ່ວມກອງປະຊຸມລະດັບໂລກໃນທຸກໆປີໂດຍສະເພາະກອງປະຊຸມໄອທີໂລກ, ກອງປະຊຸມລະດັບອາຊຽນ ແລະອື່ນໆ, ຊຶ່ງເວທີ່ເຫຼົ່ານີ້ໄດ້ເຮັດໃຫ້ LICA ສາມາດນໍາສະເໜີໂອກາດດ້ານການລົງທຶນ, ການດໍາເນີນທຸລະກິດ ແລະແນະນໍາຕະຫຼາດໃໝ່ໆຂອງ ສປປ ລາວ ໃຫ້ແກ່ບັນດາປະເທດໃນໂລກ.

  ທ່ານ ທະນູສອນ ພົນອາມາດ ປະທານສະມາຄົມການຄ້າໄອຊີທີລາວໄດ້ນຳສະເໜີກ່ຽວກັບວິໄສທັດຂອງສະມາຄົມ ແລະແຜນງານຕໍ່ໜ້າວ່າ: LICA ເປັນອົງກອນລະ ດັບຊາດທີ່ເຊື່ອມໂຍງກັບທຸກພາກສ່ວນທັງພາຍໃນ ແລະຕ່າງປະເທດໂດຍນຳໃຊ້ດິຈິຕອລເຕັກໂນໂລຊີ ແລະນະວັດຕະກຳເຂົ້າໃນການພັດທະນາເສດຖະກິດ-ສັງຄົມແບບກ້າວກະໂດດ ແລະຍືນຍົງ, ຊຶ່ງມີ 4 ເປົ້າໝາຍຫຼັກຄື: 1) ຮ່ວມມືກັບບັນດາສະຖາບັນການສຶກສາ ແລະບັນດາສູນພັດທະນາສີມືແຮງງານໃນວຽກງານການສ້າງຊັບພະ ຍາກອນມະນຸດໃນຂະແໜງການດິຈິຕອນເຕັກໂນໂລຊີ ແລະນະວັດຕະກໍາເພື່ອຮອງຮັບຄວາມຕ້ອງການຂອງແຮງງານໃນຍຸກເສດຖະກິດດິຈິຕອລ; 2) ຮ່ວມມືກັບທຸກພາກສ່ວນທີ່ກ່ຽວຂ້ອງໃນການສ້າງ ແລະດັດແກ້ກົດໝາຍ ແລະນະໂຍບາຍຕ່າງໆທີ່ຈະເອື້ອອຳນວຍໃຫ້ທຸລະກິດໃນຂະແໜງການດິຈິຕອລເຕັກໂນໂລຊີ ແລະ ນະວັດຕະກໍາ; 3) ສົ່ງເສີມ ແລະມີສ່ວນຮ່ວມໃນວຽກງານການຫັນເປັນທັນສະໄໝໂດຍນຳໃຊ້ເຕັກໂນໂລຊີດິຈິຕອລໃຫ້ທັງພາກທຸລະກິດ ແລະພາກລັດພ້ອມທັງປະກອບສ່ວນເຂົ້າໃນການສ້າງເສດຖະກິດດິຈິຕອລ; 4) ສົ່ງເສີມສັງຄົມດ້ວຍການສ້າງຄວາມຮັບຮູ້ ແລະເຫັນໄດ້ຄວາມສຳຄັນຂອງຂະແໜງການດິຈິຕອລເຕັກໂນໂລຊີ ແລະນະວັດຕະກໍາ.

  ໂອກາດດັ່ງກ່າວ, ທ່ານ ທັນສະໄໝ ກົມມະສິດ ໄດ້ເນັ້ນໃຫ້ສະມາຄົມໄອຊີທີລາວເລັ່ງສ້າງບົດບາດ, ສ້າງຄວາມເຂັ້ມແຂງຂອງສະມາຄົມ, ເພີ່ມບັນດາສະມາຊິກ ແລະເປັນບ່ອນເຕົ້າໂຮມຂອງບັນດາບໍລິສັດຜູ້ປະກອບການດ້ານໄອຊີທີຂອງລາວ,ຮ່ວມມືກັບພາກລັດ-ພາກເອກະຊົນເພື່ອເຮັດໃຫ້ບັນດາບໍລິສັດສະມາຊິກສາມາດຍາດແຍ່ງວຽກຂອງພາກລັດໄດ້, ເປັນຄູ່ຮ່ວມມືກັບລັດຖະບານໃນການຫັນເປັນດິຈິຕອລ ແລະການສ້າງເສດຖະກິດດິຈິຕອລຂອງລາວ, ເລັ່ງສ້າງຄວາມເຂັ້ມແຂງ, ສ້າງບຸກຄະລາກອນທີ່ມີຄວາມຮູ້ຄວາມສາມາດ, ທັກສະທີ່ສາມາດສ້າງບັນດາຮາດແວ, ຊັອບແວ, ລະບົບ ແລະເຕັກໂນໂລຊີດິຈິຕອລຂອງລາວເຮົາໄດ້, ຫຼຸດຜ່ອນການນໍາເຂົ້າຈາກຕ່າງປະເທດ, ສົ່ງເສີມແລະສ້າງເງື່ອນໄຂໃຫ້ໄວໝຸ່ມ ແລະນັກສຶກສາຈົບໃໝ່ໃນການສ້າງທຸລະກິດແບບ Startup, ເຮັດໃຫ້ມີນະວັດຕະກໍາໃໝ່, ສິນຄ້າ ແລະການບໍລິການໃໝ່, ປັບ ປຸງກົນໄກເພື່ອດຶງດູດການລົງທຶນຈາກຕ່າງປະເທດເພື່ອດຶງດູດບັນດາຊ່ຽວຊານດ້ານໄອຊີທີເຂົ້າມາເຮັດວຽກຢູ່ລາວ ແລະບໍລິສັດຂອງລາວສາມາດອອກແຂ່ງຂັນຢູ່ພາກພື້ນ ແລະສາກົນໄດ້.

แชร์