ຫົວໜ້າ ຄອສພ ລົງຢ້ຽມຢາມໂຄງການສ້າງທາງດ່ວນວຽງຈັນ-ວັງວຽງ

  ວັນທີ 15 ກັນຍາຜ່ານມາ ທ່ານ ຄໍາພັນ ພົມມະທັດ ຫົວໜ້າຄະນະໂຄສະນາອົບຮົມສູນກາງພັກ (ຄອສພ), ຫົວໜ້າອະນຸກໍາມະການເນື້ອໃນກອງປະຊຸມໃຫຍ່ຄັ້ງທີ XI ຂອງພັກພ້ອມດ້ວຍຄະນະໄດ້ລົງຢ້ຽມຢາມໂຄງການກໍ່ສ້າງທາງດ່ວນວຽງຈັນ-ວັງວຽງ ໂດຍໃຫ້ການຕ້ອນຮັບຂອງທ່ານ ມາຫົງຫວາງ ກໍາມະການສະພາບໍລິຫານ ຂອງກຸ່ມບໍລິສັດຢູນານກໍ່ສ້າງ-ລົງທຶນ ແລະ ຖືຮຸ້ນຈໍາກັດ, ຈຸດປະສົງຂອງການລົງຢ້ຽມຢາມຄັ້ງນີ້ແມ່ນເພື່ອເກັບກໍາຂໍ້ມູນຕົວຈິງກ່ຽວກັບການພັດທະນາຕາມແລວທາງເສດຖະກິດລາວ-ຈີນ ໂດຍສະເພາະແມ່ນໂຄງການກໍ່ສ້າງທາງລົດໄຟລາວ-ຈີນ ແລະໂຄງການກໍ່ສ້າງທາງດ່ວນລາວ-ຈີນ ເພື່ອເປັນບ່ອນອີງໃຫ້ແກ່ການປັບປຸງຮ່າງລາຍ ງານການເມືອງກອງປະຊຸມໃຫຍ່ຄັ້ງທີ XI ຂອງພັກຊຶ່ງກອງປະຊຸມຈະໄດ້ໄຂຂຶ້ນໃນຕົ້ນປີ 2021 ນີ້.


  ການຢ້ຽມຢາມໃນຄັ້ງນີ້, ທ່ານຫົວໜ້າຄະນະໂຄສະນາອົບຮົມສູນກາງພັກໄດ້ລົງເບິ່ງແຕ່ລະຈຸດຂອງເສັ້ນທາງດ່ວນນະຄອນຫຼວງວຽງຈັນ-ວັງວຽງເຊັ່ນ: ສະຖານີວຽງ ຈັນ, ຈຸດຂຶ້ນ-ລົງນາຊອນ, ຂົວໂພນສູງ, ຈຸດຂົວນໍ້າລີກ ແລະອື່ນໆ, ການກໍ່ສ້າງທາງດ່ວນວຽງຈັນ-ວັງວຽງ ແມ່ນໄດ້ເລີ່ມລົງມືກໍ່ສ້າງນັບແຕ່ວັນທີ 30 ທັນວາ2018 ມາຮອດປະຈຸບັນແມ່ນສໍາເລັດປະມານ 90%,ຄາດວ່າຈະເປີດການນໍາໃຊ້ຢ່າງເປັນທາງການໃນວັນທີ 2 ທັນວາ 2020 ຊຶ່ງກົງກັບວັນຊາດຂອງ ສປປ ລາວ, ທາງດ່ວນວຽງຈັນ-ວັງວຽງ ມີຄວາມຍາວທັງໝົດປະມານ 109,1 ກິໂລແມັດ, ກວ້າງ 23 ແມັດ, ຖືກອອກແບບຕາມມາດຕະຖານທາງດ່ວນຂອງ ສປ ຈີນ, ມີ 4 ຊ່ອງຈະລາ ຈອນ, ມີ 2 ແລວໄປ-ກັບ ຜ່ານ 4 ເມືອງ ນັບແຕ່ເມືອງນາຊາຍທອງ ນະຄອນຫຼວງວຽງຈັນ, ເມືອງໂພນໂຮງ, ຫີນເຫີບ ແລະ ເມືອງວັງວຽງ ແຂວງວຽງຈັນ, ຄວາມ ໄວອອກແບບແມ່ນ 80-100 ກິໂລແມັດ ຕໍ່ຊົ່ວໂມງ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ມີອຸໂມງ 1 ແຫ່ງ (ເຂດພູພະນັງ), ມີຂົວຂ້າມທັງໝົດ 34 ແຫ່ງ ຊຶ່ງປະກອບດ້ວຍຂົວຂ້າມທາງເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະຂ້າມທາງເຂົ້າບ້ານທົ່ວໄປ 23 ຈຸດ.


    ການລົງຢ້ຽມຢາມໂຄງການກໍ່ສ້າງທາງດ່ວນວຽງຈັນ-ວັງວຽງຄັ້ງນີ້ ທ່ານ ຄໍາພັນ ພົມມະທັດ ກໍໄດ້ຕີລາຄາສູງຕໍ່ຄວາມພະຍາມຂອງກຸ່ມບໍລິສັດຢູນານກໍ່ສ້າງ-ລົງທຶນ ແລະຖືຮຸ້ນທີ່ສາມາດເຮັດສໍາເລັດຕາມແຜນການ ແລະ ຈະໄດ້ມອບຂອງຂວັນອັນລໍ້າຄ່າໃຫ້ແກ່ພັກ-ລັດຖະບານ ແລະ ປະຊາຊົນລາວໃນໂອກາດວັນຊາດທີ 2 ທັນວາ ຄົບ ຮອບ 45 ປີ ທີ່ຈະມາເຖິງນີ້.

------------------

ຂ່າວ: ຫົງລຶດີ ສາຍຊໍາພັນ,   ຮູບພາບ: #ຫນັງສືພິມເສດຖະກິດສັງຄົມ

    

แชร์