ໂຮງຮຽນມັດທະຍົມສົມບູນສະຫວັນ ເປີີດສົກຮຽນໃໝ່

   ໂຮງຮຽນມັດທະຍົມສົມບູນ ສະຫວັນ ໄດ້ຈັດພິທີສະຫຼຸບການຈັດຕັ້ງປະຕິບັດແຜນພັດທະນາການສຶກສາສົກຮຽນ 2018-2019 ແລະໄຂສົກຮຽນໃໝ່ 2020-2021 ຂຶ້ນໃນວັນທີ 11 ກັນຍາ ຜ່ານມາ ທີ່ສະໂມສອນໂຮງຮຽນມັດທະຍົມສົມບູນສະຫວັນ ໂດຍໃຫ້ກຽດເຂົ້າຮ່ວມຂອງທ່ານ ຖາວອນ ອິນສີ ຊຽງໃໝ່ ຮອງຫົວໜ້າພະແນກສຶກສາທິການ ແລະກີລາແຂວງສະຫວັນນະເຂດ, ທ່ານ ແກ່ນຕາ ແກ້ວ ສຸເດືອນ ວ່າການຮັກສາການຜູ້ອໍານວຍການໂຮງຮຽນມັດທະຍົມສົມບູນສະຫວັນ, ມີບັນດາ, ຄູ-ອາຈານໂຮງຮຽນປະຖົມອ້ອມຂ້າງ ແລະນ້ອງນັກຮຽນເຂົ້າຮ່ວມ.

  ທ່ານ ແກ່ນຕາ ແກ້ວສຸເດືອນ ໃຫ້ຮູ້ວ່າ: ໄດ້ສະຫຼຸບຄືນການເຄື່ອນໄຫວວຽກງານດ້ານຕ່າງໆ ໃນໄລຍະຜ່ານມາເປັນຕົ້ນ: ວຽກພັດທະນາຫຼັກສູດ, ວຽກປັບປຸງຄຸນນະພາບ ການຮຽນ-ການສອນ, ວຽກບໍລິຫານຄຸ້ມຄອງການສຶກສາ, ການປັບປຸງການຈັດຕັ້ງ, ການເຄື່ອນໄຫວນອກຫຼັກສູດ ໂດຍສະເພາະ 5 ຫຼັກ ມູນຂອງການສຶກສາ, ການຈັດຕັ້ງນະໂຍບາຍ ແລະອື່ນໆ, ສຳລັບວຽກການຮຽນ-ການສອນສົກຮຽນ ຜ່ານມານັກຮຽນສາມາດເສັງເລື່ອນຊັ້ນ ແລະຈົບຊັ້ນໄດ້ລື່ນຄາດໝາຍ ຕາມແຜນການ, ຊັ້ນ ມ1 ມີນັກ ຮຽນ 75 ຄົນຍິງ 46 ຄົນເສັງ ໄດ້ 100%, ມ2 ມີ 53 ຄົນ ຍິງ 31 ຄົນເສັງໄດ້ 100%, ມ3 ມີ 49 ຍິງ 29 ເສັງໄດ້ 100% , ມ4 ມີ 57 ຍິງ27 ເສັງໄດ້ 100% , ມ5 ມີ 425 ຄົນ ຍິງ, 213 ຄົນ ເສັງໄດ້ 96,47%, ມ6 ມີ 409 ຄົນ ຍິງ 228 ເສັງໄດ້ 97,6% ແລະມ7 ມີ 434 ຄົນຍິງ 239 ຄົນ ເສັງໄດ້ 100%, ນອກຈາກການຮຽນໄດ້ດີພາຍໃນໂຮງຮຽນ ແລ້ວຍັງໄດ້ສົ່ງນັກຮຽນເຂົ້າໄປ  ເສັງນັກຮຽນເກັ່ງຂັ້ນແຂວງໃນວິຊາຕ່າງໆຕື່ມອີກ, ສຳລັບວຽກກິດຈະກຳກໍ່ມີການເຄື່ອນໄຫວປະດິດບົດຟ້ອນ, ເຄື່ອນໄຫວຝຶກຊ້ອມ ແລະສະແດງສິລະປະ-ວັນນະຄະດີ ຮັບໃຊ້ງານສຳຄັນຕ່າງໆໄດ້ຫຼາຍ ຄັ້ງ, ແຂ່ງຂັນກີລາມິດຕະພາບ, ການເພີ່ມພູນຜະລິດຜົນ ແລະວຽກ ອື່ນໆ, ສ່ວນສົກຮຽນ 2020-2021 ເລັ່ງໃສ່ປະຕິບັດໃຫ້ຄົບຕາມ 5 ຫຼັກມູນຂອງການສຶກສາຄືຄຸນສົມບັດສຶກສາ, ປັນຍາສຶກສາ, ແຮງ ງານສຶກສາ, ສິລະປະສຶກສາ ແລະພາລະສຶກສາ, ພ້ອມສືບຕໍ່ປັບປຸງຫຼັກສູດການຮຽນ-ການສອນໃຫ້ມີຄຸນນະພາບສູງຂຶ້ນ.

  ທ່ານ ຖາວອນ ອິນສີຊຽງໃໝ່ໄດ້ເນັ້ນໜັກວຽກສຶກສາອົບຮົມການ ເມືອງແນວຄິດໃຫ້ພະນັກງານຄູ-ອາຈານ, ວຽກພັດທະນາ ແລະຍົກສູງຄຸນນະພາບການຮຽນ-ການ ສອນໃຫ້ສູງກວ່າເກົ່າສ້າງສື່ການ ຮຽນ-ການສອນໃຫ້ຫຼາກຫຼາຍ, ສຳລັບວຽກກິດຈະກຳກໍ່ເປັນວຽກສຳຄັນ ແລະຕິດພັນກັບການຮຽນ ຊຶ່ງ ມັນເປັນການປູກຈິດສຳນຶກໃຫ້ນັກຮຽນຮັກການຮຽນຮັກການອອກແຮງງານ, ການປ້ອງກັນສະກັດກັ້ນສິ່ງເສບຕິດ ແລະປາກົດການຫຍໍ້ທໍ້ໃນໝູ່ນັກຮຽນ , ວຽກພັດທະນາພື້ນຖານຍາດແຍ່ງ ແລະຂໍການຊ່ວຍເຫຼືອຈາກສັງຄົມ ແລະພາກສ່ວນອື່ນໆ ເພື່ອພັດທະນາໂຮງຮຽນ.

---------

ໜັງສືພິມເສດຖະກິດ-ສັງຄົມ

แชร์