ປະຊຸມຜູ້ບໍລິຫານການສຶກສາເມືອງນາກາຍ

  ເມື່ອອາທິດຜ່ານມາ ທີ່ຫ້ອງການສຶກສາທິການ ແລະກີລາເມືອງ ນາກາຍ ໄດ້ຈັດກອງປະຊຸມຜູ້ບໍລິຫານການສຶກສາເມືອງນາກາຍ ສົກປີ 2019–2020 ໂດຍການໃຫ້ກຽດເປັນປະທານຮ່ວມຂອງ ທ່ານ ບຸນມີ ທານຸວົງ ຜູ້ຊີ້ນຳວຽກງານແນວຄິດກໍ່ສ້າງພັກ-ພະນັກງານ, ທ່ານ ຫົງທອງ ຈັນທະວົງ ຮອງຫົວໜ້າພະແນກສຶກສາທິການ ແລະກີລາແຂວງຄຳມ່ວນ, ເຂົ້າຮ່ວມໂດຍ ທ່ານ ບຸນທັນ ໄຊຍະລາດ ຫົວໜ້າຫ້ອງການສຶກສາທິການ ແລະກີລາເມືອງນາກາຍ, ມີຄະນະຫ້ອງການ, ພະນັກງານລັດຖະກອນ, ຄູ-ອາຈານໃນທົ່ວເທສະບານເມືອງ ເຂົ້າຮ່ວມ.

 ກອງປະຊຸມທ່ານ ນະລິນສັກ ເບັງຄຳສັກສິດ ຮອງຫົວໜ້າຫ້ອງການສຶກສາທິການ ແລະກີລາເມືອງໄດ້ຂຶ້ນຜ່ານບົດສະຫຼຸບ 1 ປີ ແລະທິດທາງແຜນການ 5 ປີ, ທ່ານ ຄຳໄພ ວາດສະວົງ ຮອງຫົວໜ້າຫ້ອງການສຶກສາທິການ ແລະກີລາ ເມືອງ ຂຶ້ນຜ່ານມະຕິກອງປະຊຸມຂອງແຂວງໃນນັ້ນຍັງມີວຽກກຸ່ມໂຮງຮຽນ-ການເລື່ອນຂັ້ນແບບຕໍ່ເນື່ອງ, ການຈັດສັນຄູ-ມາດຖານການປະເມີນ, ການເກັບກໍາຂໍ້ມູນ ແລະການສິດສອນບຳລຸງ-ປະຖົມ ແລະມັດທະຍົມ.

  ໃນຂົງເຂດວັດທະນະທຳ-ສັງຄົມໄດ້ຮັບການພັດທະນາ ໂດຍສະເພາະແມ່ນການເຂົ້າເຖິງການບໍລິການດ້ານການສຶກສາ, ສຸຂະພາບ ແລະພະລານະໄມການສຶກສາກ່ອນໄວຮຽນ ແລະການສຶກສາສາຍສາມັນແມ່ນໄດ້ຂະຫຍາຍໄປສູ່ເຂດຫ່າງໄກສອກຫຼີກຢ່າງຕໍ່ເນື່ອງນັກຮຽນທີ່ຮຽນຈົບ ມ ຕົ້ນ ແລະ ມ ປາຍໄດ້ຫັນເຂົ້າມາຮຽນຢູ່ຂະແໜງການ ຮຽນເຕັກນິກໃນໂຮງຮຽນວິຊາຊີບຂອງແຂວງ ແລະພາກເອກະຊົນຫຼາຍຂຶ້ນ, ສ້າງ ແລະພັດທະນາສີມືແຮງງານໃຫ້ຊາວໜຸ່ມມີອາຊີບໄດ້ຫຼາຍຂຶ້ນ, ພັດທະນາກີລາກາ ຍະກຳໃຫ້ເປັນອາຊີບ, ສົ່ງເສີມກີລາກາຍະກຳພື້ນເມືອງບັນດາເຜົ່າບາງຊະນິດທີ່ເໝາະສົມໄດ້ກາຍເປັນກີລາລະດັບຊາດ ແລະກຽມພ້ອມເຂົ້າຮ່ວມງານມະຫາກຳກີລາຕ່າງໆ.

--------

ໂດຍ: ວິພາກອນ

แชร์