ໄຊຍະບູລີ ຈັດອົບຮົມກ່ຽວກັບສິດ ແລະຄວາມສະເໝີພາບຂອງຄົນພິການ

  ພະແນກ ຮສສ ແຂວງໄຊຍະບູລີ ໄດ້ຈັດຊຸດອົບຮົມສິດສະເໝີພາບຂອງຄົນພິການຂຶ້ນທີ່ພະແນກດັ່ງກ່າວໃນລະຫວ່າງວັນທີ 14-15 ກັນຍາຜ່ານມາໂດຍໃຫ້ກຽດເຂົ້າ ຮ່ວມມີທ່ານ ນາງແພງຈັນ ແກ້ວມະນີວົງ ຫົວໜ້າພະແນກ ຮສສ ແຂວງ, ມີທ່ານ ທອງຈັນ ດວງມະລາໄລ ປະທານສະມາຄົມຄົນພິການແຫ່ງຊາດລາວ, ທ່ານ ນາງ ຄາຊິມິ ຄູໂບຕ້າ ຕາງໜ້າສະມາຄົມຊ່ວຍເຫຼືອ ແລະສົງເຄາະແຫ່ງປະເທດຍີ່ປຸ່ນປະຈໍາລາວ, ມີວິທະຍາກອນຈາກສູນກາງ ແລະສໍາມະນາກອນທີ່ມາຈາກພະແນກການ, ຫ້ອງການອ້ອມຂ້າງແຂວງ ແລະເມືອງປາກລາຍເຂົ້າຮ່ວມ.

  ໃນໂອກາດນີ້ ທ່ານ ນາງ ແພງຈັນ ແກ້ວມະນີວົງ ຫົວໜ້າພະແນກ ຮສສ ແຂວງໄຊຍະບູລີ ໄດ້ກ່າວວ່າ: ການຝຶກອົບຮົມຄັ້ງນີ້ສໍາມະນາກອນຈະໄດ້ຮຽນຮູ້ສົນທິສັນຍາສາ ກົນວ່າດ້ວຍສິດທິຄົນພິການ ແລະກົດໝາຍວ່າດ້ວຍຄົນພິການ, ຄົນພິການແມ່ນຄົນແນວໃດ, ປະເພດຄົນພິການ, ຄວາມເປັນພິການ, ສາເຫດ ແລະການປ້ອງກັນຄວາມເປັນພິການແຕ່ຫົວທີ, ແນະນໍາກ່ຽວກັບສະມາຄົມຄົນພິການ ແລະວຽກງານພັດທະນາຄົນພິການໃນ ສປປ ລາວ, ລັກສະນະສະເພາະນິໄສໃຈຄໍຂອງຄົນພິການ ແລະຄົນບໍ່ພິການ, ຄວາມຕ້ອງການຂອງຄົນພິການ ແລະຄົນບໍ່ພິການ, ວົງຈອນການຈໍາແນກສິ່ງກີດຂວາງຫຼັກທີ່ມີຕໍ່ຄົນພິການ,ແນວທາງຂອງສິດທິມະນຸດຕໍ່ກັບຄວາມເປັນພິການ ແລະການພັດທະນາ, ສິດທິມະນຸດແມ່ນຫຍັງ, ສິດໝາຍເຖິງຫຍັງ ແລະມີສິດໄວ້ເພື່ອຫຍັງ, ຄົນພິການມີສິດຫຍັງແດ່, ການເຂົ້າເຖິງການສຶກສາຂອງຄົນພິການ, ການມີວຽກເຮັດງານທໍາ, ການເຂົ້າເຖິງຂໍ້ມູນຂ່າວສານ ແລະການມີສ່ວນຮ່ວມຂອງຄົນພິການ, ການລິເລີ່ມໃຫ້ຄົນພິການມີສ່ວນຮ່ວມການປະຕິບັດແບບຄູ່ຂະ ໜານ ແລະວິທີເຊື່ອມ ສານວຽກງານຄົນພິການ; ການ ຊ່ວຍເຫຼືອຄົນພິການເບື້ອງຕົ້ນ ຄືດັ່ງ ພວກເຮົາຮູ້ແລ້ວວ່າ ຄົນພິການແມ່ນ ອົງປະກອບໜຶ່ງແມ່ນບຸກຄົນທີ່ຜິດ ປົກກະຕິ ຫຼືບົກຜ່ອງທາງດ້ານຮ່າງກາຍ, ຈິດໃຈ, ມັນສະໝອງ, ສະຕິປັນຍາລວມທັງການເບິ່ງເຫັນ, ການໄດ້ຍິນ ແລະການປາກເວົ້າເປັນໄລຍະຍາວນານຊຶ່ງເປັນອຸປະ ສັກໃນການເຄື່ອນໄຫວກິດຈະກໍາວັນ ແລະການເຂົ້າຮ່ວມຂອງເຂົາເຈົ້າໃນສັງຄົມ.
  ສະນັ້ນເພື່ອເຮັດໃຫ້ຄົນພິການໄດ້ຮັບການພັດທະນາ ແລະສ້າງຕົວເອງໃຫ້ເຂັ້ມແຂງສາມາດເພິ່ງຕົນເອງກຸ້ມຕົນເອງໄດ້ເທື່ອລະກ້າວບໍ່ໃຫ້ຕົກຢູ່ໃນກໍລະນີພາລະຂອງສັງ ຄົມ ແລະກ້າວໄປເຖິງການພົບຄວາມຫຍຸ້ງຍາກການເຂົ້າເຖິງບໍລິການສາທາລະນະສຸກຕ່າງໆໃນຂັ້ນພື້ນຖານ. ການພັດທະນາຄົນພິການແມ່ນໜ້າທີ່ຂອງສັງຄົມຕ້ອງ ໄດ້ເອົາໃຈໃສ່ໃນການຮ່ວມມືໃຫ້ການສະໜັບສະໜູນຊ່ວຍເຫຼືອທັງສະຕິປັນຍາເຫື່ອແຮງ, ຈິດໃຈພ້ອມທັງດ້ານງົບປະມານເຂົ້າໃນການພັດທະນາຄົນພິການໃຫ້ຄຽງຄູ່ກັບ ແຜນພັດທະນາເສດຖະກິດ-ສັງຄົມ ທີ່ການຈັດຕັ້ງພັກ-ລັດໄດ້ກໍານົດໃນການລຶບລ້າງຄວາມທຸກຍາກຂອງປະຊາຊົນບັນດາເຜົ່າໃຫ້ໄດ້ໂດຍພື້ນຖານ.

-------------

ຂ່າວ: ບຸນທີ, ໜັງສືພິມເສດຖະກິດ-ສັງຄົມ

• 16/09/2020