ເລຂາທິການ ສພຊ ເຄື່ອນໄຫວເຮັດວຽກຢູ່ໄຊຍະ

  (ສພຊ) ໃນລະຫວ່າງວັນທີ 14-15 ກັນຍາ 2020 ທີ່ສະພາປະຊາຊົນແຂວງໄຊຍະບູລີ,ທ່ານ ນາງ ສວນສະຫວັນ ວິຍະເກດ ຄະນະປະຈໍາສະພາແຫ່ງຊາດ,ເລຂາ ທິການສະພາແຫ່ງຊາດພ້ອມດ້ວຍຄະນະໄດ້ລົງຕິດຕາມຊຸກຍູ້ ແລະເກັບກຳຂໍ້ມູນການເຄື່ອນໄຫວວຽກງານຂອງຄະນະເລຂາທິການສະພາປະຊາຊົນແຂວງ,ເຂົ້າຮ່ວມມີທ່ານ ນາງ ອິດມະນີ ຈັນທະຄູນ, ຮອງປະທານສະພາປະຊາຊົນແຂວງໄຊຍະບູລີ, ຄະນະເລຂາທິການສະພາປະຊາຊົນແຂວງ, ບັນດາຄະນະກຳມະການພ້ອມດ້ວຍພາກສ່ວນທີ່ກ່ຽວຂ້ອງ.

  ການລົງຕິດຕາມ ແລະເກັບກໍາຂໍ້ມູນໃນຄັ້ງນີ້ກໍເພື່ອຕິດຕາມຊຸກຍູ້ ແລະເກັບກໍາຂໍ້ມູນການເຄື່ອນໄຫວປະຕິບັດໜ້າທີ່ວຽກງານຂອງຄະນະເລຂາທິການສະພາປະຊາຊົນແຂວງໂດຍສະເພາະໃນການເປັນເສນາທິການຮັບໃຊ້ສະພາປະຊາຊົນແຂວງ ແລະຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງໂດຍສະເພາະການຈັດຕັ້ງປະຕິ ບັດວຽກງານດ້ານງົບປະມານ, ດ້ານກົງຈັກການຈັດຕັ້ງ ແລະບຸກຄະລາກອນທີ່ເປັນເສນາທິການ, ເພື່ອສ້າງເງື່ອນໄຂໃຫ້ບັນດາກົມຂອງຄະນະເລຂາທິການສະພາແຫ່ງ ຊາດໄດ້ແລກປ່ຽນບົດຮຽນກັບຂະແໜງການທີ່ກ່ຽວຂ້ອງຂອງຄະນະເລຂາທິການສະພາປະຊາຊົນແຂວງ, ແນໃສ່ເກັບກຳສະພາບຂໍ້ສະດວກ, ຂໍ້ຫຍຸ້ງຍາກ ແລະບັນດາຂໍ້ສະເໜີຕ່າງໆໃນການປະຕິບັດໜ້າທີ່ການເມືອງຂອງຄະນະເລຂາທິການສະພາປະຊາຊົນແຂວງທັງເປັນການກະກຽມຮັບໃຊ້ໃຫ້ແກ່ການດຳເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII ໃຫ້ໄດ້ຮັບຜົນດີ ແລະສອດຄ່ອງກັບຄວາມສະພາບຂອງສູນກາງ ແລະທ້ອງຖິ່ນໃນປະຈຸບັນ.

  ການລົງເຄື່ອນໄຫວ ແລະເຮັດວຽກຂອງຄະນະເລຂາທິການສະພາແຫ່ງຊາດຮ່ວມກັບຄະນະເລຂາທິການສະພາປະຊາຊົນແຂວງໄຊຍະບູລີໄດ້ປຶກສາຫາລື ແລະ ແລກ ປ່ຽນບົດຮຽນຮ່ວມກັນໃນວຽກງານດ້ານຕ່າງໆເປັນຕົ້ນວຽກງານເລຂານຸການ, ວຽກງານຈັດຕັ້ງ-ພະນັກງານ,ວຽກງານບໍລິຫານ-ພິທີການ,ວຽກງານສື່ມວນຊົນ, ວຽກ ງານການເງິນ, ວຽກງານກວດກາແລະວຽກງານປິ່ນອ້ອມອື່ນ.

   ທ່ານ ນາງ ສວນສະຫວັນ ວິຍະເກດ ໄດ້ມີຄຳເຫັນຊີ້ນໍາແຕ່ລະວຽກງານໃຫ້ພາກສ່ວນທີ່ກ່ຽວຂ້ອງເພື່ອນໍາໄປເປັນທິດໃນການສືບຕໍ່ປະຕິບັດໜ້າທີ່ວຽກງານຂອງຕົນ ພ້ອມທັງຮັບຂໍ້ສະເໜີຂອງສະພາປະຊາຊົນແຂວງເພື່ອນໍາໄປສະຫຼຸບລາຍງານຄະນະປະຈໍາສະພາແຫ່ງຊາດເພື່ອພິຈາລະນາ.

----------------

ຂ່າວ: ສົມນຶກ ແກ້ວໄຊຍະຈັກ #ຫນັງສືພິມເສດຖະກິດສັງຄົມ

แชร์