ເຊກອງ ຕ້ອງການທຶນ 716 ຕື້ກີບ ເພື່ອພັດທະນາ

  ແນໃສ່ເຮັດໃຫ້ເສດຖະກິດໃນປີ 2019 ສືບຕໍ່ຂະຫຍາຍຕົວຕໍ່ເນື່ອງ ແລະ ໄປຕາມທິດຍືນຍົງ,ສູ້ຊົນລວມຍອດມູນຄ່າຜະລິດຕະພັນພາຍໃນ (GDP) ໃຫ້ບັນລຸຢູ່ໃນລະດັບ 8% ຂຶ້ນໄປການນໍາຂອງແຂວງໄດ້ຄາດຄະເນຈະມີຄວາມຕ້ອງການທຶນເພື່ອການພັດທະນາທັງໝົດ 716 ຕື້ກີບ ຫຼືປະມານ 40% ຂອງ GDP.

  ທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງເປີດເຜີຍໃຫ້ຮູ້ເມື່ອບໍ່ດົນນີ້ວ່າ: ໃນປີ 2019 ນີ້ ຕາມການຄາດຄະເນເຫັນວ່າເສດຖະກິດຂອງແຂວງຍັງຈະ ສືບຕໍ່ເຕີບໂຕຢູ່ໃນລະດັບ 8%, ແຕ່ສະພາບຄ່ອງຕົວຈິງໃນລະບົບເສດຖະກິດຍັງມີຄວາມພືດເຄືອງ, ເສດຖະກິດມະຫາພາກບາງຈຸດຍັງບອບບາງ, ໜີ້ສິນການລົງທຶນຂອງລັດຍັງມີຈໍານວນຫຼາຍ, ສະພາບງົບປະມານຂອງລັດໂດຍລວມຍັງສືບຕໍ່ຫຍຸ້ງຍາກ,

  ບວກກັບສະພາບໄພທໍາມະຊາດທີ່ເກີດຂຶ້ນອັນເປັນຜົນກະທົບຕໍ່ການປະຕິບັດແຜນລາຍຮັບ-ລາຍຈ່າຍຂອງແຂວງພໍສົມຄວນ, ເງື່ອນໄຂທາງດ້ານການເງິນ ແລະ ບັນຫາອື່ນໆຍັງມີຄວາມຫຍຸ້ງຍາກຊຶ່ງຈະເຮັດໃຫ້ມີຜົນກະທົບຕໍ່ສະຖຽນລະພາບທາງດ້ານເສດຖະກິດມະຫາພາກກໍຄືເປັນຄວາມສ່ຽງໃນການປະຕິບັດແຜ ນພັດທະນາເສດຖະກິດ-ສັງຄົມ ແລະແຜນງົບ ປະມານແຫ່ງລັດ.

  ສະເພາະປີ 2019 ການນໍາແຂວງຄາດຄະເນຈະສູ້ຊົນໃຫ້ລວມຍອດມູນຄ່າຜະລິດຕະພັນພາຍໃນເພີ່ມຂຶ້ນ 8% ຂຶ້ນໄປ ແລະມູນຄ່າເພີ່ມຕາມລາຄາໃນປີໃຫ້ໄດ້ 1.789 ຕື້ກີບ, ໃນນີ້ຂະແໜງກະສິກໍາ-ປ່າໄມ້ກວມເອົາ 40,2%; ອຸດສາຫະກໍາກວມເອົາ 22,9% ແລະການບໍລິການກວມເອົາ 36,9% ໂດຍລາຍໄດ້ສະເລ່ຍຕໍ່ຫົວຄົນປະມານ 1.772 ໂດລາສະຫະລັດທຽບໃສ່ປີ 2018 ເພີ່ມຂຶ້ນ 149 ໂດລາສະຫະລັດ.

  ດ້ວຍເຫດນີ້ການນໍາຂອງແຂວງຈິ່ງມີຄວາມຕ້ອງການທຶນເພື່ອການພັດທະນາທັງໝົດ 716 ຕື້ກີບ ຫຼືປະມານ 40% ຂອງຈີດີພີໃນນັ້ນ: ງົບປະມານການລົງທຶນຂອງລັດ 123,19 ຕື້ກີບ ກວມເອົາ 17,2%; ທຶນຊ່ວຍເຫຼືອທາງການເພື່ອການພັດທະນາ 57 ຕື້ກີບກວມເອົາ 8%; ການລົງທຶນຂອງເອກະຊົນພາຍໃນ ແລະຕ່າງປະເທດ 117 ຕື້ກີບກວມເອົາ 24,8% ແລະການລົງທຶນສິນເຊື່ອຂອງທະນາຄານ 358 ຕື້ກີບ ກວມເອົາ 50% ຂອງການລົງທຶນທັງ ໝົດ.

  ທັງໝົດນີ້ກໍເພື່ອແນໃສ່ເຮັດໃຫ້ເສດຖະກິດຂອງແຂວງສືບຕໍ່ຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ແລະໄປຕາມທິດຍືນຍົງ, ຮັບປະກັນການຮັກສາສະຖຽນລະພາບຂອງເສດຖະກິດມະຫາພາກ, ສືບຕໍ່ຟື້ນຟູ ແລະປັບປຸງບັນດາພື້ນຖານໂຄງລ່າງທີ່ໄດ້ຮັບຜົນເສຍຫາຍຈາກໄພພິບັດທໍາມະຊາດໃຫ້ເຂົ້າສູ່ສະພາບປົກກະຕິ, ສຸມໃສ່ພັດທະນາຊົນນະບົດ ແລະລົບລ້າງຄວາມທຸກຍາກ, ພັດທະນາຊັບພະຍາກອນມະນຸດໂດຍເອົາໃຈໃສ່ຂະແໜງການສຶກສາ, ສາທາລະນະສຸກ ແລະຍົກສູງສີມືແຮງງານ.

ຂ່າວ: ສັນຍາ - ນສພ ເສດຖະກິດ-ສັງຄົມ

แชร์