ຄືບໜ້າເກືອບ 20% ໂຄງການຂະຫຍາຍລະບົບນໍ້າປະປາ ເມືອງອາດສະພອນ

  ໂຄງການຂະຫຍາຍພື້ນຖານໂຄງລ່າງນໍ້າສະອາດ ແລະໂພຊະນາການ, ການປັບປຸງລະບົບນໍ້າປະປາເຂດຕົວເມືອງນ້ອຍ ຫຼື KFW ໄດ້ໃຫ້ທຶນກໍ່ສ້າງລະບົບນໍ້າປະປາ 6 ເມືອງຂອງແຂວງສະ ຫວັນນະເຂດຄື: ເມືອງໄຊພູທອງ, ອຸທຸມພອນ, ອາດສະພອນ, ເມືອງພີນ, ເຊໂປນ ແລະເມືອງນອງ ເພື່ອເປັນການຢ້ຽມຢາມເບິ່ງຄວາມຄືບໜ້າໃນການຈັດຕັ້ງປະຕິບັດບັນດາໂຄງການ ດັ່ງນັ້ນ, ໃນວັນທີ 9 ກັນຍາ 2020 ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດພ້ອມຄະນະໄດ້ລົງຢ້ຽມຢາມເບິ່ງໂຄງການດັ່ງກ່າວໃນເຂດເທສະບານເມືອງອາດສະພອນ ແຂວງສະຫວັນນະເຂດ.
   ຕາມການລາຍງານຂອງວິຊາການພາກສະໜາມໂຄງການໃຫ້ຮູ້ວ່າ: ໂຄງການກໍ່ສ້າງລະບົບນໍ້າປະປາເທສະບານ ເມືອງອາດສະພອນ ແມ່ນທຶນຊ່ວຍເຫຼືອລ້າຂອງສະ ຫະພາບເອີຣົບໂດຍຜ່ານທະນາຄານພັດທະນາເຢຍລະມັນ KFW ເປັນຜູ້ຈ່າຍ 85%, ທຶນສົມທົບຂອງກະຊວງໂຍທາທິການ ແລະຂົນສົ່ງ 10% ແລະທຶນສົມທົບຂອງແຂວງອີກ 5%, ໃນເທສະບານເມືອງອາດສະພອນມີ 6 ບ້ານເປົ້າໝາຍທີ່ຈະໄດ້ຮັບຜົນປະໂຫຍດໄດ້ແກ່: ບ້ານນາເດື່ອ,ຜັກຂະຫຍ່າ,ໜອງເດີ່ນ, ທາດດອກແກ້ວ, ດົງນາງາມ ແລະ ບ້ານນາ ກຸດຈານ, ມີມູນຄ່າ ທັງໝົດ 13,7 ຕື້ກີບ; ໃນນັ້ນມີອາຄານຫ້ອງການ ແລະ ຫ້ອງນໍ້າ 1 ອາຄານ, ສາງເກັບເຄື່ອງ 1 ຫຼັງ, ອ່າງເກັບນໍ້າ 4 ອ່າງ ຊຶ່ງມີອ່າງ 250 ແມັດ ກ້ອນ ຢູ່ບ້ານທາດດອກແກ້ວ, ອ່າງ 50 ແມັດກ້ອນ ຢູ່ບ້ານຜັກຂະຫຍ່າ, ອ່າງ 50 ແມັດກ້ອນ ຢູ່ບ້ານໜອງເດີ່ນ, ອ່າງ50 ແມັດກ້ອນ ຢູ່ບ້ານນາເດື່ອ ມີການວາງທໍ່ແຈກຢາຍ, ເຈາະບາດານ 27 ແຫ່ງ, ຕິດຕັ້ງກົງເຕີເຂົ້າເຮືອນປະຊາຊົນ 1.305 ຫຼັງຄາເຮືອນ.
ນອກນັ້ນຍັງມີການກໍ່ສ້າງຢູ່ຈຸດສຸມໂນນມີໄຊ ມີ 7 ບ້ານເປົ້າໝາຍທີ່ຈະໄດ້ຮັບຜົນປະໂຫຍດໄດ້ແກ່: ບ້ານໂນນມີໄຊ, ຄຳພູ, ໂນນຍາງ, ກາງທ່າ, ກາງບອນ, ດົງຄຳກວນ ແລະບ້ານນາແຄມີມູນຄ່າ 9,27 ຕື້ກີບ ປະກອບມີ: ອ່າງເກັບນໍ້າ 7 ອ່າງ, ເຈາະບາດານ 27 ແຫ່ງ ແລະຕິດຕັ້ງກົງເຕີເຂົ້າເຮືອນປະຊາຊົນ 1.128 ຫຼັງຄາເຮືອນ; ໂດຍບໍລິສັດໜູຄຳກໍ່ສ້າງຈຳກັດເປັນຜູ້ຮັບເໝົາ, ຄວາມຄືບໜ້າຂອງວຽກ ສະເພາະໃນເທສະບານ ເມືອງອາດສະພອນ ປະຕິບັດໄດ້ທັງໝົດເກືອບ 20% ໃນນັ້ນຍັງມີຫຼາຍໜ້າວຽກສຳຄັນທີ່ຕ້ອງໄດ້ເຮັດ, ຊຶ່ງລວມປະລິມານນໍ້າທີ່ເຈາະໄດ້ 106 ແມັດກ້ອນຕໍ່ມື້ ປະລິມານນໍ້າທີ່ຍັງບໍ່ພໍ 158 ແມັດກ້ອນຕໍ່ມື້.
  ໂອກາດນີ້, ທ່ານຮອງເຈົ້າແຂວງສະຫວັນນະເຂດກໍ່ໄດ້ແນະນຳໃຫ້ພາກສ່ວນທີ່ກ່ຽວຂ້ອງທັງວິຊາການ ແລະຜູ້ຮັບເໝົາຈົ່ງໄດ້ເອົາໃຈໃສ່ປະຕິບັດໃຫ້ໄດ້ຕາມມາດຕະຖານ ແລະໃຫ້ສຳເລັດຕາມເວລາທີ່ກຳນົດໄວ້ເພື່ອໃຫ້ປະຊາຊົນໄດ້ຊົມໃຊ້ນໍ້າທີ່ສະອາດຕາມແຜນການ, ພ້ອມດຽວກັນນີ້, ພະແນກອຸດສາຫະ ກຳ-ການຄ້າ, ພະລັງງານ-ບໍ່ແຮ່, ການເງິນກໍ່ໄດ້ມອບຊຸດກິລາໃຫ້ການນຳເມືອງ ແລະພະແນກແຜນການ ແລະ ການລົງທຶນກໍ່ໄດ້ມອບຄອມພິວເຕີຈຳນວນ 1 ຊຸດໃຫ້ຫ້ອງການແຜນການ ແລະ ການລົງ ທຶນເມືອງນຳອີກໂດຍການເຂົ້າຮ່ວມເປັນສັກຄີພິຍານຂອງທ່ານ ທ່ອນແກ້ວ ພຸດທະໄກຍະລາດ ແລະທ່ານ ຄຳແພງ ເພັດທຸມພອນ ເຈົ້າເມືອງອາດສະພອນກໍ່ໄດ້ຕາງໜ້າກ່າວຮັບ.

แชร์