ສືກສາຄວາມເປັນໄປໄດ້ ໂຄງການປູກພືດຢູ່ເມືອງອະນຸວົງ

  ວັນທີ 11 ກັນຍາຜ່ານມາທີ່ສະໂມສອນກອງບັນຊາການທະຫານແຂວງໄຊສົມບູນ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາ-ສໍາຫລວດຄວາມເປັນໄປໄດ້ທາງດ້ານເສດຖະກິດ-ເຕັກນິກໂຄງການປູກຂີງດໍາ, ພິກໄທ, ໝາກເຜັດ ແລະ ປູກພຶດຜັກຕ່າງໆ ຢູ່ເຂດບ້ານທົ່ງຄູນ (ບ້ານພູແຮ່ເກົ່າ) ເມືອງອະນຸວົງ ແຂວງໄຊສົມບູນ ລະຫວ່າງທ່ານ ຈັນທະໜອມ ວົງສົມຈິດ ຫົວໜ້າພະແນກແຜນການ ແລະການລົງ ທຶນແຂວງ ແລະທ່ານ ສີສະໝຸດ ເກສອນ ຮອງຜູ້ອໍານວຍການບໍລິສັດກຸນຈະເລີນ ຈໍາກັດ ໂດຍການເຂົ້າຮ່ວມຂອງທ່ານ ພົຕ ຄໍາລຽງ ອຸທະໄກສອນເຈົ້າ ແຂວງໄຊສົມບູນ, ມີປະທານສະພາປະຊາຊົນແຂວງ, ບັນດາຮອງເຈົ້າແຂວງ, ການນໍາເມືອງອະນຸວົງ, ປະທານບໍລິສັດ ກຸນຈະເລີນ ໄຊສົມບູນ ຈໍາກັດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
 ທ່ານ ບຸນລິດ ສຸພັດດີ ຮອງຫົວໜ້າພະແນກແຜນການ ແລະການລົງທຶນແຂວງໄດ້ຂຶ້ນລາຍງານກ່ຽວກັບຂໍ້ມູນພື້ນຖານຂອງໂຄງການ ແລະເນື້ອໃນຂອງບົດບັນທຶກທີ່ຈະໄດ້ລົງນາມກັນຊຶ່ງໂຄງການດັ່ງກ່າວແມ່ນໂຄງການສຶກສາ-ສໍາຫລວດ ຄວາມເປັນໄປໄດ້ທາງດ້ານເສດຖະກິດ-ເຕັກນິກໂຄງການປູກຂີງດໍາ, ພິກໄທ, ໝາກເຜັດ ແລະປູກພຶດຜັກຕ່າງໆຢູ່ເຂດບ້ານທົ່ງຄູນ(ບ້ານພູແຮ່ເກົ່າ) ເມືອງອະນຸວົງ ໃນເນື້ອທີ່ 236 ເຮັກຕາ ຂອງບໍລິສັດ ກຸນຈະເລີນ ຈໍາກັດ ເປັນບໍລິສັດເອກະຊົນພາຍໃນຊຶ່ງເປັນບໍລິສັດລູກໃນກຸ່ມຂອງບໍລິສັດ ທີເຮັດບີກຣຸບ ຈໍາກັດ ຊຶ່ງໄລ ຍະເວລາຂອງບົດບັນທຶກຄວາມເຂົ້າໃຈສະບັບນີ້ແມ່ນ 18 ເດືອນ ໃນນັ້ນໜ້າວຽກໂຄງການຂອງບໍລິສັດທີ່ຈະຕ້ອງໄດ້ຈັດຕັ້ງປະຕິບັດຄື: ສຶກສາ-ສໍາຫລວດ, ສ້າງບົດວິພາກເສດຖະກິດ-ເຕັກນິກ ແລະບົດສຶກສາຜົນກະທົບຕໍ່ສິ່ງແວດລ້ອມ-ສັງຄົມ ແລະທໍາມະຊາດເບື້ອງຕົ້ນ ແລະໃນການ ປະຕິບັດພັນທະແມ່ນທາງບໍລິສັດຕ້ອງປະກອບສ່ວນພັນທະຕ່າງໆ ໃນໄລຍະຈັດຕັ້ງປະຕິບັດອາຍຸຂອງບົດບັນທຶກຄວາມເຂົ້າໃຈ ເປັນຕົ້ນເງິນຕິດຕາມ ແລະຄຸ້ມຄອງ, ເງິນຕິດຕາມທາງດ້ານວິຊາການ ແລະຕ້ອງປະກອບສ່ວນເງິນໃນການຕິດຕາມກວດກາສິ່ງແວດລ້ອມ-ສັງຄົມ ແລະທໍາມະຊາດຕາມແຜນຄຸ້ມຄອງ, ຕິດຕາມກວດກາ.
  ໂອກາດດັ່ງກ່າວ ທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ ໄດ້ມີຄໍາເຫັນຕໍ່ພິທີຊຶ່ງທ່ານໄດ້ຍົກໃຫ້ເຫັນເຖິງຄວາມສໍາຄັນໃນການສ້າງສາພັດທະນາແຂວງໄຊສົມບູນ ພ້ອມນີ້ທ່ານຍັງໄດ້ສະແດງຄວາມຍ້ອງຍໍຊົມເຊີຍຕໍ່ບໍລິສັດທີ່ໄດ້ປະກອບສ່ວນທຶນຮອນໃນການພັດທະນາແຂວງຂອງພວກເຮົາກໍຄືໂຄງການສຶກສາ-ສໍາຫລວດ ຄວາມເປັນໄປໄດ້ທາງດ້ານເສດຖະກິດ-ເຕັກນິກໂຄງການປູກຂີງດໍາ, ພິກໄທ, ໝາກເຜັດ ແລະປູກພຶດຜັກຕ່າງໆ ໃນຄັ້ງນີ້ຊຶ່ງຈະເປັນການປະກອບສ່ວນທີ່ສໍາຄັນເຂົ້າໃນການພັດທະນາເສດຖະກິດ-ສັງຄົມຂອງແຂວງກໍຄືການສ້າງວຽກເຮັດງານທໍາໃຫ້ແກ່ປະຊາຊົນ.

-----------------

ຂ່າວ: ສຸກສັນ ອ້ວນລິທິກຸນ, ໜັງສືພິມເສດຖະກິດ-ສັງຄົມ

   

แชร์