ໄຂກອງປະຊຸມໃຫຍ່ອົງຄະນະພັກ ທຫລ

  ກອງປະຊຸມໃຫຍ່ຜູ້ແທນອົງຄະນະພັກທະນາຄານແຫ່ງ ສປປ ລາວ (ທຫລ) ຄັ້ງທີ IV ໄດ້ຈັດຂຶ້ນຢ່າງເປັນທາງການໃນລະຫວ່າງວັນທີ 14-15 ກັນຍາ 2020, ທີ່ສະຖາບັນການທະນາຄານພາຍໃຕ້ການເປັນປະທານຂອງ ສະຫາຍ ສອນໄຊ ສິດພະໄຊ ກຳມະການສຳຮອງສູນກາງພັກ, ເລຂາຄະນະພັກ ທຫລ, ໂດຍໃຫ້ກຽດເຂົ້າ ຮ່ວມຂອງສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ມີຜູ້ຕາງໜ້າຈາກຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ພະນັກງານປະຕິວັດອາວຸໂສບຳນານ, ບັນດາຜູ້ແທນສົມບູນທີ່ເປັນຕົວແທນໃຫ້ແກ່ສະມາຊິກພັກທັງໝົດຈຳນວນ 909 ສະ ຫາຍໃນທົ່ວອົງຄະນະພັກ ທຫລ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ໃນກອງປະຊຸມສະຫາຍ ສອນໄຊ ສິດພະໄຊ ໄດ້ຍົກໃຫ້ເຫັນຜົນງານການເຄື່ອນໄຫວໃນໄລຍະ 5 ປີ ຜ່ານມາພາຍໃຕ້ການຊີ້ນຳ-ນຳພາຂອງ ສູນກາງພັກ, ຄະນະພັກຂັ້ນຕ່າງໆ ພ້ອມດ້ວຍສະມາຊິກພັກ-ພະນັກງານຂອງຂະແໜງທະນາຄານທີ່ໄດ້ຜ່ານຜ່າສິ່ງທ້າທາຍທົດສອບນາໆ ປະການ ແລະພ້ອມກັນສູ້ຊົນຍາດໄດ້ຜົນງານອັນໃຫຍ່ ຫຼວງຫຼາຍດ້ານເປັນຕົ້ນສາມາດຮັກສາສະຖຽນລະພາບເງິນຕາແຫ່ງຊາດ ໃຫ້ມີຄວາມໝັ້ນທ່ຽງໂດຍພື້ນຖານ, ອັດຕາເງິນເຟີ້, ປະລິມານເງິນ, ອັດຕາແລກປ່ຽນ ແລະ ຄັງສຳ ຮອງເງິນຕາຕ່າງປະເທດຢູ່ໃນລະດັບທີ່ກຳນົດໄວ້; ລະບົບທະນາຄານທຸລະກິດ ແລະສະຖາບັນການເງິນມີການຂະຫຍາຍຕົວ ແລະການເຄື່ອນໄຫວມີປະສິດທິພາບ ດີສົມຄວນ; ການລະດົມທຶນ ແລະການສະ ໜອງສິນເຊື່ອສະເລ່ຍເພີ່ມຂຶ້ນ, ຫຼຸດຜ່ອນ ບັນດາເມືອງທີ່ບໍ່ມີຕາໜ່າງທະນາຄານ ໃນເມື່ອກ່ອນມີ 38 ເມືອງ ແຕ່ປະຈຸບັນຍັງ ເຫຼືອແຕ່ 6 ເມືອງ; ລະບົບການຊຳລະ ແລະການບໍລິການຂອງທະນາຄານຫັນໄປສູ່ຄວາມທັນສະໄໝລວມສູນ ແລະປອດໄພ; ການຮ່ວມມືກັບສາກົນນັບມື້ນັບກວ້າງ ຂວາງ ແລະ ເຄື່ອນໄຫວຕາມແນວທາງການຕ່າງປະເທດຂອງພັກໂດຍສະເພາະການຮ່ວມມືສອງຝ່າຍ, ຫຼາຍຝ່າຍໃນຫຼາຍ ລະດັບຊຶ່ງສາມາດຍາດແຍ່ງທຶນຮອນ ແລະການຊ່ວຍເຫຼືອດ້ານວິຊາການນັບມື້ເພີ່ມຂຶ້ນເຮັດໃຫ້ຖານະບົດບາດຂະແໜງທະນາຄານຂອງ ສປປ ລາວ ໃນເວທີ ພາກພື້ນ ແລະສາກົນໄດ້ຮັບການຍົກສູງຂຶ້ນກວ່າເກົ່າ.

  ສ່ວນວຽກງານກໍ່ສ້າງພັກ-ພະນັກງານ ໄດ້ຖືເອົາການກໍ່ສ້າງໜ່ວຍພັກປອດໃສ,ເຂັ້ມແຂງ, ໜັກແໜ້ນເປັນວຽກໃຈກາງຂອງການເຄື່ອນໄຫວປະຕິບັດໜ້າທີ່ການເມືອງຂອງແຕ່ລະຮາກ ຖານພັກ; ໄດ້ປັບປຸງການຈັດຕັ້ງໃຫ້ມີຄວາມເຂັ້ມແຂງຢູ່ 48 ຮາກຖານພັກ, ສ້າງຕັ້ງໃໝ່ 2 ໜ່ວຍພັກຮາກຖານ ແລະປັບປຸງໜ່ວຍພັກທີ່ມີສະມາຊິກພັກຈໍານວນຫຼາຍໂດຍແຍກ ແລະສ້າງຕັ້ງໃໝ່ 8 ໜ່ວຍພັກ, ປັບປຸງຄະນະໜ່ວຍພັກ-ຄະນະພັກຮາກຖານໃຫ້ສອດຄ່ອງກັບການປັບປຸງເບື້ອງລັດ; ເອົາໃຈໃສ່ປັບປຸງຄຸນ ນະພາບຂອງສະມາ ຊິກພັກໃຫ້ມີຄຸນນະພາບສູງຍິ່ງຂຶ້ນໄປຄຽງຄູ່ກັບການຂະຫຍາຍສະມາຊິກພັກ, ຊຶ່ງຜ່ານການຕີລາຄາຄຸນນະພາບຂອງໜ່ວຍພັກໃນການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານໃນປີ 2015-2017 ສາມາດຮັບຮອງໜ່ວຍພັກປະເພດດັ່ງກ່າວໄດ້ກວມ 60% ຂອງຈໍານວນໜ່ວຍພັກທີ່ໄດ້ຮັບການຕີລາຄາ; ສຳ ລັບປີ 2018-2019ສາມາດຮັບຮອງໜ່ວຍພັກປະເພດປອດໃສ, ເຂັ້ມແຂງ,ໜັກແໜ້ນກວມ 33,3% ແລະ 45% ທຽບໃສ່ໜ່ວຍພັກທີ່ໄດ້ຮັບການຕີລາຄາຕາມລຳດັບ.

  ຄະນະພັກ ທຫລ ໄດ້ເອົາໃຈໃສ່ຊີ້ນຳໆ ພາປັບປຸງກົງຈັກການຈັດຕັ້ງລັດແຕລະຂັ້ນໃຫ້ສອດຄ່ອງກັບສະພາບການເລັ່ງ ທວງຂອງວຽກງານຕົວຈິງຢ່າງເປັນລະບົບຄົບຊຸດເພື່ອໃຫ້ເຄື່ອນໄຫວໄດ້ຢ່າງຄ່ອງຕົວຍິ່ງຂຶ້ນເປັນຕົ້ນແມ່ນການປັບປຸງພາລະບົດບາດ ແລະສັບຊ້ອນກົງຈັກຈຳນວນໜຶ່ງຄືນໃໝ່; ໄດ້ເອົາໃຈໃສ່ໃນການບຳລຸງ-ກໍ່ສ້າງ, ສັບ ຊ້ອນ-ຈັດວາງ ແລະປະຕິບັດລະບອບນະໂຍບາຍອຸດໜູນຕ່າງໆຕໍ່ພະນັກງານຕາມລະບຽບການ ແລະເງື່ອນໄຂຕົວຈິງ; ສິ່ງສຳຄັນມາເຖິງປະຈຸບັນຢູ່ຂະແໜງທະນາຄານໄດ້ສ້າງ ແລະຮັບຮອງແຜນກຳນົດພະນັກງານນຳ-ຄຸ້ມຄອງຂັ້ນຕ່າງໆສຳເລັດຊຶ່ງເປັນພື້ນຖານອັນໜັກແໜ້ນໃນການກໍ່ສ້າງ ແລະນຳໃຊ້ໃນຕໍ່ໜ້າ;ຫັນບາງນິຕິກຳກ່ຽວ ກັບວຽກງານນະໂຍບາຍຂອງຂັ້ນເທິງເພື່ອສ້າງ ແລະປັບປຸງລະບຽບການພາຍໃນຂອງຕົນ,ນອກນີ້ຍັງໄດ້ຊຸກຍູ້ບັນດາອົງການຈັດຕັ້ງມະຫາຊົນໃຫ້ເຄື່ອນໄຫວຕາມພາລະບົດບາດຂອງຕົນໂດຍສະເພາະເປັນເຈົ້າການເຕົ້າໂຮມຄວາມສາມັກຄີຂອງສະມາຊິກຕົນເພື່ອຂັບເຂື່ອນວຽກງານວິຊາສະເພາະຂອງຂະແໜງທະນາຄານໃຫ້ບັນລຸຜົນສຳ ເລັດຕາມຄາດໝາຍທີ່ວາງໄວ້.

  ສຳລັບທິດທາງ 5 ປີຕໍ່ໜ້າ ທຫລ ແມ່ນສືບຕໍ່ເພີ່ມທະວີຄວາມສາມັກຄີເປັນເອກະພາບພາຍໃນພັກ; ສືບຕໍ່ປັບປຸງການຈັດຕັ້ງແຕ່ລະຂັ້ນໃຫ້ມີຄວາມປອດໃສເຂັ້ມແຂງໜັກແໜ້ນຕົ້ນຕໍ; ເຂັ້ມງວດດ້ານລະບຽບວິໄນໃນການປັບປຸງກໍ່ສ້າງພັກ-ພະນັກງານ; ບຳລຸງກໍ່ສ້າງພັກ-ພະນັກງານໃຫ້ຮັບປະກັນທາງດ້ານປະລິມານ ແລະຄຸນນະ ພາບ; ສືບຕໍ່ປັບປຸງແບບແຜນ ການນຳພາ-ວິທີເຮັດວຽກຂອງຄະນະພັກຂັ້ນຕ່າງໆ ໃຫ້ສອດຄ່ອງຕາມຫຼັກການຂອງພັກ; ພັດທະນາລະບົບການເງິນ-ເງິນຕາຂອງ ສປປ ລາວດ້ວຍການໝູນໃຊ້ເສດຖະກິດຕະຫຼາດທີ່ມີການຄຸ້ມຄອງຂອງລັດຢ່າງມີວິທະຍາສາດເພື່ອຮັບປະກັນສະຖຽນລະພາບດ້ານເງິນຕາແຫ່ງຊາດໃຫ້ໝັ້ນທ່ຽງ, ພັດທະນາລະບົບສະຖາບັນການເງິນ-ເງິນຕາໃຫ້ເຂັ້ມແຂງ-ໝັ້ນຄົງ;ຄົ້ນຄວ້ານະໂຍບາຍເພື່ອຫຼຸດຜ່ອນການນຳເຂົ້າ ແລະສົ່ງເສີມການສົ່ງອອກເພື່ອຫຼຸດຜ່ອນການຂາດດຸນກັບຕ່າງປະເທດປະກອບສ່ວນຊຸກຍູ້ການພັດທະນາເສດຖະກິດ-ສັງຄົມໃຫ້ຂະຫຍາຍຕົວຢ່າງມີຄຸນນະພາບ,ສົມດຸນ ແລະຍືນຍົງເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບດີຂຶ້ນ ແລະສາມາດແຂ່ງຂັນໃນເງື່ອນໄຂການເຊື່ອມໂຍງກັບສາກົນ.

แชร์