ອັດຕະປື ປະເມີນການປະຕິບັດກົດໝາຍໄຟຟ້າ

  ວັນທີ 3 ກັນຍາ 2020 ແຂວງອັດຕະປື ໄດ້ຈັດກອງປະຊຸມປະເມີນການຈັດຕັ້ງປະຕິບັດກົດໝາຍວ່າດ້ວຍໄຟຟ້າ ແລະກົດໝາຍວ່າດ້ວຍແຮ່ທາດປະຈຳປີ 2020 ຂຶ້ນທີ່ຫ້ອງປະຊຸມສະພາປະຊາຊົນແຂວງ. ໂດຍການເປັນປະທານຂອງທ່ານ ວິທະຍາ ພົມມະຈັນ ຫົວໜ້າພະແນກພະລັງງານ ແລະບໍ່ແຮ່ແຂວງອັດຕະປື, ທ່ານ ຈິດປະສົງ ສິງສະຫັວດ ຮອງປະທານກວດກາພັກ-ລັດ ແຂວງອັດຕະປື, ມີຂະແໜງການພະລັງງານ ແລະ ບໍ່ແຮ່ແຂວງ, ເມືອງ, ມີບັນດາບໍລິສັດ ຫົວໜ່ວຍທຸລະກິດ ແລະ ບັນດາໂຄງການດ້ານພະລັງງານ ແລະບໍ່ແຮ່ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 ທ່ານ ວິທະຍາ ພົມມະຈັນ ໄດ້ກ່າວການວ່າ: ການປະເມີນການຈັດຕັ້ງປະຕິບັດກົດໝາຍວ່າດ້ວຍໄຟຟ້າ ແລະແຮ່ທາດປະຈໍາປີ 2020 ກໍ່ເພື່ອເປັນກຳນົດດ້ານຫຼັກການລະບຽບການ ແລະມາດຕະການກ່ຽວກັບການຈັດຕັ້ງເຄື່ອນໄຫວການຄຸ້ມຄອງກວດກາການດຳເນີນກິດຈະການໄຟຟ້າ-ແຮ່ທາດ ໃຫ້ມີປະສິດທິຜົນສູງໂປ່ງໃສຮັບປະກັນຄວາມປອດໄພ ແລະສຸຂະພາບຂອງຜູ້ອອກແຮງງານ ແລະ ແກ້ໄຂຟື້ນຟູຊຸມຊົນທີ່ຖືກຜົນກະທົບທັງປົກປັກຮັກສາສະພາບແວດລ້ອມແນໃສ່ເພື່ອນຳໃຊ້ທ່າແຮງຊັບພະຍາ ກອນ ທຳມະຊາດຢ່າງປະຢັດສີຂຽວ ແລະຍືນຍົງຕາມທິດຫັນເປັນອຸດສາຫະກຳທັນສະໄໝປະກອບສ່ວນຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດກໍ່ຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງອັດຕະປືເພື່ອຍົກສູງຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ.

  ກອງປະຊຸມໄດ້ຮັບຟັງຜົນການຈັດຕັ້ງປະຕິບັດວຽກນິຕິກຳກ່ຽວກັບການປະເມີນກົດໝາຍວ່າດ້ວຍໄຟຟ້າ ແລະແຮ່ທາດເປັນຕົ້ນ: ການຈັດຕັ້ງປະຕິບັດກົດໝາຍວ່າດ້ວຍໄຟຟ້າ ສະບັບປັບປຸງປີ 2017 ຊຶ່ງມີ 6 ພາກ,4 ໝວດ 31 ມາດຕາ ທີ່ຕິດພັນກັບທ້ອງຖິ່ນໂດຍສະເພາະການພັດທະນາເຂື່ອນໄຟຟ້ານໍ້າຕົກທັງໝົດໃນທົ່ວແຂວງມີ 31 ໂຄງການ, ເຂື່ອນໄຟ້າຂະໜາດໃຫ່ຍກວ່າ 5 ເມກາວັດ ມີ 29 ໂຄງການມີກໍາລັງຕິດຕັງທັງໝົດ 1.882 ເມກາວັດ ທຽບໃສ່ ປີ 2015 ເພີ່ມຂຶ້ນ 7 ໂຄງການ  ແລະເຂື່ອນໄຟຟ້າຂະໜາດນ້ອຍ ຫຼືເທົ່າກັບ 5 ເມັກກາວັດມີ 2 ໂຄງການລວມມີກໍາລັງຕິດຕັ້ງ 5,56 ເມກາວັດ ທຽບໃສ່ປີ 2015 ເພີ່ມຂຶ້ນ 1 ໂຄງການ.

  ການຈັດຕັ້ງປະຕິບັດກົດໝາຍວ່າດ້ວຍແຮ່ທາດສະບັບປັບປຸງ ປີ 2017  ຊຶ່ງມີ 12 ພາກ, 13 ໝວດ 52 ມາດຕາ ທີ່ຕິດພັນກັບທ້ອງຖິ່ນທີ່ໄດ້ຮັບອະນຸຍາດການຊອກຄົ້ນ ແລະສຳຫຼວດທັງໝົດ 20 ກິດຈະການຊຶ່ງກວມເອົາພື້ນທີ່ ທັງໝົດ 2.600 ກວ່າກິໂລຕາແມັດ, ປະກອບມີ 5 ປະເພດແຮ່ທາດທີ່ໄດ້ຮັບຮັບອະນຸຍາດສຳ ຫຼວດ ແລະເປັນເສດຖະກິດໃນນີ້ກິດຈະການທີ່ແຂວງອະນຸຍາດ ມີ 10 ກິດຈະການ  9 ບໍລິສັດ ສ່ວນຫຼາຍແມ່ນການຂຸດຄົ້ນແຮ່,ອະໂລຫະເປັນຕົ້ນຫີນພູ, ຫີນຜາ, ຫີນອຸດສາຫະກຳ, ຫີນກໍ່ສ້າງ ແລະດິນແດງ, ດິນດຳ, ຖ່ານຕົມ.

-------------

ຂ່າວ: ວັດທະນາ ຫຼວງອາໄພ

#ຫນັງສືພິມເສດຖະກິດສັງຄົມ

แชร์